Mari Elizabet yvng dinø̀ vriqò we (May 31)
Muqlàng dvzv́r Gabriel Mari svng Yesu gv̀llv́m dvtá bǿà mèpvng cv̀mré góng íwe àngnvmmè Elizabet yv́ng dìlv́m Mari nøt rvt shìe. Àngnvmmè Elizabet vlwe shìgùng móng tiqmvrìng Mile (70) vrúmwe tvrà svng hí hí dinø̀ vriq á:mà. Mari àngnvmmè Elizabet nvng vhøm bǿì dvgvp pàmvrà wa kà Elizabetí tábǿà chàng àng góng taq cv̀mré gǿ chóngshì lú:ngì nø, Elizabet gø shàshér pvlàcèí dv̀nzø̀ng taqsórí, “Svmarérì í dv́ngte dvhø̀ taq nàí nø ìshøt ìgv̀n èlú:nòe. Nà góng taq vl we cv̀mré cèí gø ìshøt ìgv̀n lú:nòe.” wa vtánò nø̀ Mari svng Gvray àngmè wanø̀ nvmlat dvgùng shvring ráà wegø íe.
“Svmarérì í dv́ngte dvhø̀ taq nàí nø ìshøt ìgv̀n èlú:nòe. Nà góng taq vl we cv̀mré cèí gø ìshøt ìgv̀n lú:nòe. Ngà Vkàngpè àngmè ngà yv́ng svng tùng di høq nø, kadø í nø yadø nàpǿngvtnà má? “wanø̀ dvbù nøtí vkiqe.
Wekvt Mari nø yadø wae: “Ngà dòngnø:tní Vkàngpè svng shvringòe. Ngà pvlàcè gø ngà chv́ngkàngpè Gvray taq dvbònge. Kadø íe wani màpǿng we ang vshuqmè svng a:ngí yv́ng ètv̀mvm bǿngà. Eyv̀ngnøng, akvt kèní kukaq mvril nø mvril vrà:mí ngà svng, ìshøt ìgv̀n lún mè, èvl longe. Kadø íe wani nònggùn jòrpè àngí nø, ngà dvpvt ring we bv̀nlì èwángāng bǿngà ang bø̀ng gø shànshére. Ang svng vpǿ svre vsvngrì kaq nø, mvril laril a:ngí dvsházaòe.
Dùgàmzø̀rì svng nø øpkv́ng rúngtv̀ng kèní dvjáò nø, cipshì rì svng mv̀ng a:ngí shvri:gnòe. Svrí shìrì svng nø gv̄m we v́mpàí dvkāò nø, mvgàmrì svng nø a:ngí vhúng shvlō bǿà. Nøngmaq vkop vkàngmaq svng dv́n yà:ngà dø tiq dvchá, a:ngí nø ang vshuq Israel svng dvbvng daqà” wae,
Mari nø, Elizabet nvng vshø̀m shvlá dv́ngte vl dá:ngí ang chø̀m svng loá:mì. Yadang nvng singnø̀ mvshǿl shøpwe bóy àngni svng AD 1263 nǿng kèní Mari nø Elizabet yv́ng di we bóy àngni svng wápv́ng shì ráì we íe. AD 1389 nǿng Pope Oban VI taqkèní Shvngø̀mré vdòng we bóy àngni svng wàlv́m dvkv́m ráà we íe.
