Vkangpè Yesuí shvngøt dvtú we Dvrá

(23rd Sunday in ordinary time year A)

Kristu vdòng taq Vpø’ íwe pèmè vnvmchvng, shvngømré rvzvngcerì shvngbe mvdvm Gvray mongzøl lòng laqtuqdaq shvngbe svng Pamvra.

Ya lvban nø Angwa Nár (23) lvban wà lvban svng gòng bø’shà.

Ya lvban taq Rø v-du we Gvray móngkà jømciqrì vzàng shá dvzvr mvyø’ we taq;-

(1)Ezekela 33:7-9
(2)Roma 13:8-10
(3)Mati 18:15-20

Vpø’ íwe pèmè vnvmchvngmaq Mongkà tiqciq taq;- Kadvtutshú
Ezekela 33:7-9 … Vsvng Angcè pè í Ngà svng Israel rvp mvdvmø roqgar lvm, Ngàí na svng rvhiq bøngà, a:lòe.

Roma Shvngømré rì kaq svng Dvzvr Polo í shvrìo we dvshat we móngkà taq,..Vshòngkelv́m lòng wa mø̀í nìnø, kagǿ svng ínìgø kapv̀n shvrv́n gø mènàjø̄ni. Pàwálv́m wa nìnø vsvng kaq shóngshì lòng nø, dvrá svng kø̀m dvgø:mò we íe, wā shvngøt dvtú nø shvdømè.

Mati dvbùshang Mongkà taq nø;- Yesuí Dvzvrì svng shvngøtnò we taq, Vléò rì svng kadø wá lvm shvngøt dvtú nø cvnào we tvrà svng yv’nglúnshìe. Nà nvnvm nvchā:ngí nà svng nàlévt nìnø, nà èdivm nø, nàní wawa èv̀lshi yv́ng a:ngí vléò lòng svng dètúò. Nà kà svng ang tā nìnø, nvnvm gǿ svng nàí lin èlún bǿà we íe, wā tasvng tale vroqké lvm rvt dvla taqkèní shvngøt dvtúè.

Vkangpè Yesuí banchvk pvrvn lvm DVLA zì we taq;-

Kà shvbóng..
Nøngmaq Døngku rì taqkèní gø, vsvng mvngpòng vdòng banchvk rì wá v-dùe, tiqbaq (mø-í ni) tiqbaq vl sháòe. Vkvtdø íwe màbóng we tvrà rì vl ra dvgvp, kadø wā dvtit tvle lvm wàwe àng DVLA svng Vkangpè Yesuí nø, Nøngmaq svng Mongkà taqkèní Paqzí èzí yangshà. Shø’n mvyø’ we taq, Cìpshì we shóngnønt taqkèní dvnúng lúnlvm dvpvt, àngdvja tvrà rì svng shvngøt dvtú cvnàe.

Vkangpè Yesuí shvngøt dvtú we Dvrá

Mati dvbùshang Mongkà 18:15-17 vdòng taq, Vkangpè Yesuí cvnà we (3) pvn svng yv’nglúnshìe. Wè rì nø;-

(1) Banchvk rì svng shø’n ràe angnvm angchvng nvng tiqdø mvr vhø’m rúng nø dvmv’n ràe.

(2) Nvmlat dvkøm taq mà dvtv’ngshì nìnø, vlømvmdaq we shvkse nvng tiqdø, dvhø yv’ngkèní pvrvnà lún we Nønt tø’ng shaqré tiqgø’ gø’ dvzvr nø dvmv’n ràe.

(3) Shvngømré Nønt tø’ng shaqré ( mø-í ni) angnvm angchvng, derì dervp rì taqkèní Nønt yvnggúng í dvtit tvle, pvrvn we wá dvzvr ràe. Ya dvtàng taqgø mà dv’ngnì, Dvrá rúng dvtàng kèní pvrvnà lvm dvpvt dvkv’m ràe, shø’n ràe, wā shvngøt dvtú nø cvnà tvrà svng vkvtdø yv’nglúnshìe.

Vpø’ íwe pèmè vnvmchvngmaq, Vkangpè Yesu ínø nøngmaqò vlún vkvng nvng rvcvngshì lvm lòng svng vpø’ shvringàe. Wè pàdø Angò gønshaq taqkèní èchvng bø’shà we nøngmaq shvngbe svng nàpø’ìe. E shòng íe. Vrá nø, Tiqgø’ gø’ la dv’ng vléshì ra dvgvp gø Vroqā lvm, vdv’ngà we í shvngøt dvtú lvm rvt DVLA hang (3) pvn taqkèní èzí yangshà. Vdv’ng mà shvla, shvngøt Kà gø mvta nìnø, ang svng nø wv́ngzà nvng kùyà gún vsvng dø dvdut dv̀ng íe, wàe. Wè mvdvmø Vkangpè Yesu ínø, Nøngmaq svng Tiqdvng vsvngò Mvra rì svng shvlvngàlvm dvpvt, mvdøng mvdaq shvngøt nø ècvnà íe.

Vrá nø, Ngà bø̀ng taqkèní vsvng vní gǿ ( mø-í ni ) vshø̀m gǿ dvkǿmshi, mvzøq mv-ngúshì we kayv́ngø í nìgø, wè shvra yv́ng angmaq dvhø̀ taqø Ngà gø vbánge,” wā dvkv’mè.

Rvgaq í zí mvlún lòng svng Gvrayí Shvmv’nà lvm rvt røtnímshàì we taq nøngmaq Nønt mvsøn tiqgóng shvngbe vzøm ra íe. Toniò rvtø lvngcha dàm taqkèní í nigø, cìl mvzv’n taqkèní í nigø lutshì lúnlvm dvpvt Vkangpè bøng vdòng taq mvzøq mv-ngúshì taqsórí Kvmnøntní vjúrøt tvleshì laqlúnì.

Vpø’ íwe pèmè vnvmchvngmaq,
Vkvtdø wàì we taq Gvray gvsang nø nøngmaq nvng tiqdø tvpwā vl daqè, walòng svng vlømshàì wvng dvshat nø nònggùn zí mvyøngè. Shvngbe svng Pamvra.