Ngā gvzà gøpké lú:nò we nvng coqcv́n gōò we tvrà
Shvngbe mvdvm Kristu Gvrayò mongzøl lòng laqtuqdaq.
Ngā gvzà gøpké lú:nò we nvng coqcv́n gōò we tvrà
Dèni nònggùn lùshì lvm Gvray móngkà nø Lk 5:1-11 ciq vdòng taqkèní íē.
Yesuí Mvshǿl shǿn dv́ng bǿà dvgvp A:ngí Simon svng, “Rvnaq yv́ng svng èra:pmò nø shǿmgún rì dègøpnø̀ng,” a:lòe. 5 Simoní vtà:ngò nø, “Vkàngpèá, nøngmaqí pòyaq gø:pmì we, pàgø gøp mvlú:ni! Iwe Nà kà rvt nø dvgøpdv̀ng íe,” a:lòe.
Vpø’ íwe pèmè vnvmchvngmaq,
Ngā vkwi gvzà mvdaq we Simon Piter kaq Vkangpè Yesuí shǿmgún svng vtì rvnaq yv’ng svng kùngshí èra:pmò nø dègøpnøng a:lò dø tiqdvchá vtì rvnaq yv’ng svng ra:pmò nø dvjá bø’à dvgvp ngā gvzà gøpké lúnò tvrà yv’nglúnshìe. Wè mèpvng Vkangpè Yesuí nø Simon, Yaku, Yohanmaq svng gōò nø Vsvng vkwi lvm bvnlì døngja Talen svng shvrìoe.
Dvzvr pè la taqkèní gø Cúnshì we Gvray gvsang móngkà svng dvshvngò we í Kv’m vsvngrì Yesu Kristu yv’ng svng shøl lúngà. Wè yv’ngkèní Sasvna me nø nvmlat pvngshì lúngì nø vsher lúngì. Dèni Nøngmaq gø’ vrvm kaq svng gø Vkangpè Yesu í, cúnshì we Gvray gvsang móngkà dvshér lvm, Vkangpè dvkv’m Kà svng cvndvgøm lvm, Vkangpè svng Kv’m lvm, vlømshì lvm rvt shóngnøntní ègō íe. Àngdeo nònggùn svng vlømshì taqsórí bøn bung we banchvk rì svng pvrvnshì we taq kadvgvp gø jór lúnlvm mà-vl. Bø’n bung we banchvk rì nvng dølòng svng jór lún we Kūnga gá lòng nø Kristu Gvray wā íe.
Wervt vpø’ íwe pèmè vnvmchvngmaq, ni vrvm Cúnshàì lvpat taq vhø’mì we dvshà mvhøtlvm, yvklvm, Shiwvt banchvk rì svng Vkangpè Gvray nvng tiqdø pvrvnì kvtwā nøngmaqí jór lúnlvm vlē, walòng íe. Wervt rvtø vrvm Gvray jèjú vdòng taq Gvray nvng tiqdø vzømì nø cúnshì laqlúnì.
