Vmpà màv́m vnatshi dāng rø:tnò we tvrà

Shvngbe mvdvm Vkangpè Gvray mongzøl lòng laqtuqdaq.
Dèni nø August shvlá Nár Bunga ni svng gòng bø’shà.

Vpø’ íwe pèmè vnvmchvngmaq,
Dèni tashì nø nònggùn kūnga lùshì lvm Gvray móngkà mvshøl nø Lk 5:33-39 vdòng taqkèní íē.

Vrá angmaqí Vkangpè Yesu svng a:lò we nø, “Yohan coqcv́nrì nvng Farisi coqcv́nrì nø angkvt angkvt v́mpà màv́m vnatshì nø júrøt we íe. Iwe Nà coqcv́nrì nø v̄m nø aq nø lvv̄l nìnø!” a:lòe. l 34 Yesuí angmaq svng, “Zvmì lé bóy taq lvngàshv́rpè shini vl dvgvp, zaqlèrì svng namaqí v́mpà màv́m vnatshi dèzv́rnøng we v̄le ma? 35 Inìgø Lvngàshv́r pè svng angmaq yv́ng kèní lù bǿò we angni tuq rae. Wekvt mv̀ng angmaq gø v́mpà màv́mv́m vnatshì rà longe,” a:lòe.

Dèni tashì lúnì we Gvray Mongkà taq, Kristu Gvrayí lv’ng lú:ngà we Dvrá Upvdì àng shvr, lvpat àngshvr nvng vrá nø Zun lvm lòng dang Yuda vsvngrì í vtoshì lúnlvm dvpvt dvshvng dvzvròe. Gvray gvsangò jèjú ìshøt rì nø nònggùn kūnga vzàm vl rvt Mvra dòngjø’m taqø vman shá ì we nøngmaqò lvpat anglí svng lvpat àngshvr, Dvrá àngshvr, àngshvr í we lvpat taqkèní cúnshì nø nvmlat pvngshì dvzvrè, walòng svng shálúnshìe.

Vkangpè Yesu Kristu í lv’ng lú:ngà we Brimtì àngshvr vdòng taqø Vpè Gvray ínø àngshvr í we lvpat svng ècv’ngà bø’shà. Nøngmaq shvngbe svng gø Vkangpè Yesu Kristu í lv’ng lú:ngà we dvciq lvpat gønshaq svng vtoshì dvzvrè. Brimtì svng è aq bø’ò dvgvp dvbù Nøntshøm byō lòng svng vtoshì dvzvr pàdø, Kristu svng Kvmnøntní vtoshì èlún bø’ò dvgvp lvpat taqø dvbù lvm Jèjú ìshøt ígvn rì svng tiqlvpat yvng màdvt vtoshì lúnlvm vlē , walòng svng dènio Gvray dvbùshang móngkà taqkèní shèdø’mìe, shvngøt dètú íwe móngkà íe. Shvngbe svng Pamvra.