Myanmar móngdàn vdòng móng dvjà lòngsvng Kristu ò mòngzøl tvrà nvng shvrvm shvráshì we tvrà svng tóng dvzaqshì lvm Cardinal Charles Bo í dvtú we
Catholic shvngømré vdòng taqø gø, móng lvmvng vdòng taqø gø tasvng rvwìng we, shvngōkewe, tvle teq kewe tvrà, mvrø we tvràrì, nøt laqyà rì svng gurnø mvrà chutā kewe nvng mòngzøl we tvrà svng tóng dvzaqshì lvm dvkám bøà we íe.
Myanmar móngdàn vdòng móng dvjà rvt kayvng màyvngø cìl mvjàn yølshì nø mvhøt lvm shìwvt rì vhø:mò we móng vsvngrì kaq dvsháza tubúm dvbangā lvm tvrà nø rvcángcèrì mvdò nvng dvgá vsvng mvngpòng mvdò rì vrvmò døngjá íráì we svng dvtú bøà we íe.
Dvzvr rìò lvpat taqø dvbùshvng bvnlì rvt dvshà mvhøt lvpatrì zíshì yvngì we ínì gø we kámnøt taq zøm shvngáshì yv:ngì we tvrà rì mòngkà rì taq yvnglún shìwe íe.
Gvray kaq kámwe kámnøt tvrà taq cvnwe nø mvhøt lvm tvrà rì svng dvshér shìwe møí, Yesu Kristu gø we mvhøt lvm shìwvt tvrà rì svng vhø:mò nø vle ráà we íe.
Vdèò kámnøt tvrà nø kadø íwe nøt mvsøn taq cvndøng we lòng taq cvn nø làngdøm àngni taq we shémo lòng svng vtoshì ràlong we svng shvdøm we íe.
Yanilaò Myanmar móngdàn vdòng móng dvjà taq mvril laril mvhøtlvm shìwvt rvmè vkøn we vdòng kámnøt kèní mòngzøl tvrà svng vrang dvzaqshì lvm vchvk á:mì wanø Cardinal Charles Bo í dvtú bøà we íe.
Tiqgø nvng tiqgø shvngo kewe, tvle teq kewe tvrà kèní kadøgø shvrvm shvrá shì lúnlvm tvrà svng tuqlún daq we møí, wervt shòlaqré rì shvngbe nøt mvsøn vdòngrì taq døngmvn we tvrà kèní mvràchutā kenø shvrvm shvrá shì we tvrà rì nvng mòngzøl lvm tvrà svng tóng dvzaq shàì wanø dvtú bøà we íe.
Myanmar móngdàn vdòng móng vsvngrì taq Yesuí àngwur gáng baqshì ràwe mvhøt lvm tvrà svng vhø:myvngà dø íráì we nø we tvrà zømvm we tiqni Yesu shìyvng kèní vrá zun ráì wedø mòngzøl tvrà svng tuqlún lvm íwe rvt kámnøt kèní tvrà tóng dvzaqshì lvm dvkám bøà we íe.
Dvtú mòngkà làngdøm tut taq móng dvjà rvt mvhøt nø chøm vsvngrì vdòng taq nøt yòl nøt dvshà we shìwvtrìí vtøp kèbøà vsvngrì kaqgø tasvng nøt shvlømā kelvm, cìl mvjàn yølshì vdu bøì we vsvngrì kaq tubúm dvbangā kelvm nvng tasvng vjúrøtā kelvm tvrà kèní mòngzøl tvrà svng wádvzaq shàì we ínìnø Gvrayí cvn cvn shvmv:nā lú:ngìe wanø dvtú bøà we íe.
