Shvngømréò Dvrá nø rvweng lvm dvpvt mø-í, Mongzøl lvm dvpvt Dvbā le í ràe
Argentina móngdàn, Buenos Aires Myōq taqø rvzvngce shvngømré rì nvng dvgá Shvngømré shølshú vgo rì nvng vhø’m dvgvp Svrabyín Koqkvm Leo 14 ínø Shvngømré mvdò v-rvm yv’ngkèní vsvng tiqgø’ò dvgùng svng Ròqgar lvm, vlún vkvng rì svng hángà lúnlvm nvng Mongzøl lòng svng vrvng lúnlvm dvpvt bóngzøp wáshì nø dvnúng lúnlvm rvt dvkv’m bø’ì.
Svrabyín Koqkvm ínø Shvngømré Dvrá rì nø Vsvng rì vdòng taq tasvng tale rvweng we mø-í lvm, tasvng tale vsíngà kélvm, shóngnønt vzøm vzap lúnlvm nvng vsvng mvdò dvpvt vjú zílún lvm rì svng vrvngà lún we shvra í lvm dang dvkv’m bø’ì.
Shvngømré tvrà taq mà bóng we lā dv’ng vl nigø, shvngbe nø muqhøm wurlaq dvpvt tiqdø dvnúng lún ra dang gø, vpø’ Nønt taqkèní shøn bø’ì.
Wè mvdvm, Vjúrøt lòng nø nonggup taqkèní wā shø’nshì we wā mø-í nø, angdè nvng tiqdø vl rì svng shóngshì lvm, tùbùm dvshá zā lvm nvng dvbvng taqsórí chaqdvp dvtàn lún ra dang cvnà bø’ì. Angmè poqā vdòng cvmré gunice pvngshì yv’ngkèní lvpat bēni høqshaq Toni angwaò vtóng dø vsvng tiqgø’ò lvpat svng Ròqgar lvm dvpvt nvng Døngku tvrà, Paqzi tvrà, bvnlì døngjarì nvng Toniò lvngcha rì nø Vsvng rì o Dvgùng svng hángà lúnlvm gø í dang dvkv’m bø’ì.
Svrabyín Koqkvm ínø vlømshì lòng nø, Shvngømré Kvmnønt tvrà lòng ò mvdøng vchvk vtv’ng tiqlòng í dang dvtàn bø’à nø, dvshà mvhøt vhø’mò rì nvng vmv’ng lv’m dv’nshì rìo lvpat mvdvmø v-rvm vrá vzøm vzap lòng vl lvm rvt dvkv’m bø’ì.
Lvngdøm taq, Shvngømré mvdò v-rvm dvhø yv’ng vzøm vzap Kà vrashì lòng nø dvgá tiqdvng vsvngrì kaq ngárlvm rvt mø-í, tasvng tale vsíngà taqsórí vpø’ shvring lvm lòng svng dvbung lúnlvm dang dvkv’m nø lvpshì bø’ì. Wè mvdvm Angdèo Kvmnønt tvrà svng Cúnshì nila taq chaqdvp dvtàn nø vl lúnlvm nvng Mongzøl lòng vrvngshì we taq tiqdø dvbáshì lúnlvm rvt dvkv’m nø dvshat bø’ì.
” Pvn v-rvm Ídv’ngte svng jór lún we Gvray gvsang nø Bāsha dvcirì dvpvt nøngmaqò Nønt mvsøn kūnga vzàm rì svng shemv’nà sha nø, Mongzøl lòng dvpvt nøngmaqò dv’nkà rì nvng dvzaq dvkvngshàì rì svng Tvrà dètúdaqshaq” wā Svrabyín Koqkvm í lvngdøm taq vjúrøt nø dvdv’ng bø’à.
