Gvrayò àmjàm nòng bàshàrì shvngbe dvpvt dvgøāshaq íe

Castel Gandolfo noqngøm tøm taqø mvngushì ráì we rvcángcèrì kaq Pope Leo XIV taqkèní dvkámwe mòngkà dvtú we taq Kanan svmaré mè dvpvt záyvng shvzømā lvm røtnímshì w rvtø Yesuí dvzømā ráà we mvshøl svng dvdvm dvtøp shàìnø shìwvt tvrà àngdang dang svng Gvray àng Jejú kèní vle lúnshì we svng shvdøm nø pvlàcè nvnggwòn ziwe mòngkà kèní dvshat bøà we íe.

Ya lvbán vdòng taq Solemnity of the Assumption àngni tvyø svng wáshìwe nvng we àngni wáshì we mvtú nø Yesu nvng àngmè Mari nø Gvray tvrà taq tiq dvgàng ku vlwe ínø shagóng nvng pvlàcè nø Gvray àng mvrtaq kadø vzøm we dang dvdam dvtøpshì lún we tvrà svng dvtúā we gø íe.

Ju dvcì íwe Kanan svmaré mè nø Yesu àngò dvcì møí we tiqgø ínìgø àngnvng vtoq vtip shìlvm dvzaqshì yv:ngì nø Uesu àngnvng tiq boq gø vhøm shaq møí we høqshaq àngò kámnøt nø Yesu nvng vzøm nø àng mèpvng cvnwe cvnshú shvlá tiqgø bønlúnlvm nøt mvsøn zángshì we kámnøt tvrà svng vrá kàshvbóng kèní dvshvt we íe.

Kanang svmaré mè nø Yusu Kristu wawe nø chvngshú Meshiya íe walòng svng kámnøtí àngcèmè dvpvt mòngzøl lvm tvrà svng røtnímā ráà we íe.

Mòngkà taq we svmaré mè dang shvng shvng wa vtán shaq íe we dø tiq dvchá Yesuí gø nvmlat taq we svmaré mè ò røtkà dvng vtiqshì yv:ngì we svng yvnglú ln shìwe íe.

Làngdøm taq Svmaré mè àngò kámnøt tewe dø ni àngò røtshì we jejú ìshøt rì kømzøp dø Gvray yvngkèní vtoshì lún ráà we dang yvnglún shìwe gø íe.

Gvray àngò ìshøt jejú rìnø nøngmaq bashàrì mvdàm Vzàng kèní v-vl shaq íwe nvng nøngmaq shvngbe ò dòng nøt mvsønrì shvngbe gø àng dvpvt kadvgvp gø tánshaq vlrà we dang shvdøm we íe.

Kanang svmaré mè døni nøngmaq shvngbe gø Gvray àngmvr dàng, àngshvrà taq tiq shvrà nø v-vl shaq íāì we svng shvdøm we íe.

Yadø íwe kámnøt tvrà kèní nømaq shvngbe nø Gvray kaq nøt vtiq lvm tvrà mv-vl kámnøt taq zøm suvngáng shìlvm dvkám we íe.