Vyvng roqshú shvlá lvban
Kristu vdòng taq Vpø’ íwe pèmè vnvmchvngmaq; Ya lvban nø, Vkangpè Yesu Kristu Zun á:mì mèpvng lvban (4) lvban wà lvban svng gòng bø’shà. Ya lvban nø Vyvng roqshú shvlá lvban gø íe.
Mongkà ciqrì;-
(1) Dvzvr 2:14,36-41.
(2) 1 Piter 2:20-25.
(3) Yohan 10:1-10.
Shóngshø’ng we, Vpø’ íwe pèmè vnvmchvngmaq, Zun Bóy Nár rvtø (4)lvban, ya lvban svng Vyvng roqshú shvlá lvban wā tø’shìe. Vyvng roqshú shvlá Hang sømla nø, vsvng mvmè shvrúng we ” Hang sømla” tiqlòng gø íe. Kàgvp anglíban taq, ” Gvray gvsang kaq svng
” Vyvng roqshú ” wā shø’n lòng svng yv’nglúnshìe. Angò dvci cerì kaq svng nø Vkangpèo ‘ Vyvngré mvdò ‘ wā tø’òe. Zun Bóy Nár (4)lvban, ya lvban svng “Vyvng roqshú” lvban wà shø’nshì lòng nø, Dèni røshì we Yohan Dvbùshang móngkà 10:1-21 svng mvtú shì sórí shø’nshì lòng svng yv’nglúnshìe.
Mongkà ciq rì:-
-Dvzvr 2:14a,36-41….
Shànshér Pvlàcè nø Dvzvr rì mvdvmø lāshìdaqì we Pentecost angni taqø, Piter nø Dvzvr tiqcé vní pè nvng búng lúngì nø, shaq me í Vsvng mvngpòng kaq svng vkiq nø dvshvngòe. Piter í dvshvngò nø Shvkse wáshì Kà svng vtoshì vsvngrì nø, Tìløp kámshì nø, wèni taqnī , vsvng (3,000) gø ‘ dv’ngte shvngømré rvmshì lúngì, wā vrù yangà.
-1Piter 2:20b-25…
Kristu Àng tiqgóng taqqni, Wurgang mvdvmø, nøngmaqò Mvra rì svng è ríà yangshà. Angò dà:má rì taqkèní nøngmaq svng Mvra dongjøm kèní dvshér we vtoshì lún bø’shà. Vkvt nøngmaq nø gønshaq Pvlàcè svng roqgar vsúng we vyvng roqshú mèpvng lō íe, wā Piter í dvshvngò tvrà svng móngkà (2) ciq taq tálúnìe.
-Yawhan 10:1-10… vdòng taq nø Vkangpè Yesu nø vyvng roqshú shvlá í dang svng shø’n yangà.
Shóngshø’ng we pèmè vnvmchvngmaq, Dèni nø, Vyvng roqshú shvlá vtv’ng lvban íe.
Vyvng roqshú shvlá vtv’ng nvng singdø vrù yangà, shøn yangà tvrà svng Yohan Dvbùshang Mongkà 10 tut taq shvlá wace rø lúnshìe. Dènio dvbùshang Mongkà taqkèní gø vrá tiqmaq svng dvtan mvyø’è…
(1) ” Vyv̀ng wáng vdòng svng, bv́ngkà chit kèní mvgòng nø, shø̀ngshang tiq chit kèní rvlv̀ng ra we wegǿ nø vkǿ nvng tø̄lv́mshú íe.”(Yohan 10:1)
(2) Bv́ngkà chit kèní gòng ra gǿ mv̀ng nø vyv̀ngrì svng roqò gǿ íe. (Yohan 10:2)
(3) Vyv̀ngrérì gø ang kà tae.. (Yohan 10:3a)
(4) A:ngí nø ang vyv̀ngrìo bø̀ng svng tǿò sórí goò nø vtv́ng lap svng shø:lòe.(Yohan 10:3b)
(5) Angò rì shvngbe svng léshì dvzá:rò dá:ngí, angmaq vzv̀ngzv̀ng ang dìe.
(Yohan 10: 4a)
(6) Vyv̀ngrìí ang kà zaò rvtnø, ang mèpvng cà:nòe.
( Yohan 10:4b)
(7) Ngà nø Vyvng rì gòng we Bv́ngkà chit lòng ǿngàe.
( Yohan 10:9a)
(8) Ngà taqkèní gòng ra vsvng kagǿ ínìgø gø̀nshaq shvlut we lún nø, góng mvnshì lé mvnshì sórí shønriqtø̀m lávm lún lú:ngòe. ( Yohan 10:9b)
(9) Ngà mv̀ng nø, angmaq kaq gø̀nshaq lún dvzv́rlv́m dvpvt nvng dvnglún lún dvzv́rlv́m dvpvt dø̀ng dakngà, wàe.
(Yohan 10:10b).
Vpø’ íwe pèmè vnvmchvngmaq,
“Vyvng Wangò Bvngkachit Tvrà”
Vkangpè Yesu dvtut shøn we taq, “Àng nø Vyvng Wang svng gòng lvm dvpvt Bvngka chit” íe.
Vkangpè Yesuò Bvngka chit nø Mongzøl ” lòng íe. Angò Bvngka chit kèní ègòng dvgvp, rvgaqtøm lvpat nvng Tv’n dvgá ni dvciq lvpat gønshaq jø’ngjøngni cúnshì lúnlvm dang shvngøt dvtúè. Nøngmaq Cúnshàì rvtø, Vkangpè Yesuò Bvngka chit taqkèní góng lúnlvm dvpvt cvnà we í shvngøt dvtúè. Vkangpè Yesu nø Bvngka chit wā mø-í, Vyvng roqshú shvlá vtv’ng gø íe. Vyvngrìo gønshaq cúnshì lúnlvm nvng dvciq lvpat Gønshaq cúnshì laqlúnò, wvng døng ra ngà, wā shø’n yangì.
” Vyvng rì svng Àng bøng nvng tvpwā gōò tvrà “
Àng í nø, vyvngrìo àng
bøng nvng tvpwā gōòe, wàe. Yalòng nø gvzà vmun ke vshá kè lòng íe. Vrá nø, Àngde tiqgóng svng røtnímshì lúnlvm, Vkangpè Yesu nvng jø’ngjøngni vtoq v-tip vzøm vzap lún bø’nga mà? Dvdvm shàì. Vkangpè nvng vzømì nìnø, àng mèpvng cvn gø’, wáshì lúnlvm vlē. Vkangpè Yesu nø Vyvng roqshú shvlá, Vyvng Wang nvng Bvngka chit íe. Àng taqkèní gòng vsvngrì nø, chutchvng lòng vtoshì lúnlvm vl nø, lémvnshì, góngmvnshì we lúnlvm nvng mvshøng we shønriqtøm yv’ng lávm lún lú:ngòe, vl lún lúngòe, wā dvkv’mè.
Wervt vpø’ íwe pèmè vnvmchvngmaq, Nøngmaq nø Vkangpè Yesuò vyvngré Wang taq vl lúnì rvt, wè vyvngré mvdò nvng sing rì íshàe. Wervt dvbù Nøntní, Kvmnøntní oqā wàì nø dvgùng shvring shì, nònggùn lùshì laqlúnì. Yalòng nø Vkangpè Yesuò lvksan vmíng kvng Pvlàcè Ìshøt tiqlòng gø íe. Dèni la vsvng tiqmaq, vyvng roqshú mvra, àngde ínø dang vrvm svng síngràl lúnè, Mongkà èrøshì nø èkám kèní ídvng wàe, Tvrà dvtú gø’ mvra wā dvdvmì rì gø v-lìe. Yohan 10:1-21 vdòng svng shvlá wace rø nø dedvm lúngò dvgvp yadang svng téwa síngràl shálúnshìe.
“Ngà mv̀ng nø, Vyvng rì gø̀nshaq lún dvzv́rlv́m dvpvt nvng dvnglún lún dvzv́rlv́m dvpvt dø̀ng dakngà…”wàe.
(Yhn 10:10b)
Vpø’ íwe pèmè vnvmchvngmaq, Ya lvban nø Gvray gvsang bvnlì wà rì íwe ‘ Shvrúngshú Jau, Brother, Sister ‘ Gvray dvzømshú rì luqtvm lvm dvpvt nvng àngmaq dvpvt vjúrøt dvbvng we Angni wā mvsvtshì we àngni gø íē. Vyvng roqshú shvlá, Vkangpè Yesuò shvbóng shvmvtshì ra Gvray dvzømshú bvnlìrì taq shvlá wace téwa cvndvgøm lúnlvm dvpvt vjúrøt dvbvngì taqsórí Pvlàcè kvmnønt nònggùn kūnga lùshì laqlúnì! Shvngbeí Vyvng roqshú shvlá Vkangpè Yesuò Gvray mongzøl lòng vtoshì laqlúnì, shvngbe svng oqā.
