Shvngbe mvdvm Gvray mongzøl lòng laqtuqdaq! Dèni nònggùn lùshì lvm móngkà nø Yohan 6:44-51 vdòng taqkèní íē.Mongkà vzàng røshì lvm wàì.
_Ngà svng dèzv́r dakngà pè Vpèí cøpma:tnò gǿ wa mø̀í nìnø, Ngà yv́ng svng kagǿ gø dí mvlúnshì. Ngà yv́ng di ra gǿ svng nø lv̀ngdø̀m ni taq Ngàí dvzunlv́m íe. u 45 Kàdvtutshúri kàru taq, ‘Angmaq shvngbe nø Gvrayí shvngøtshaq í longe,’ wa nø vrū yà:ngà. Vpè kèní tá lú:nò nø cvnshi lú:nò gǿ vrv̀m nø Ngà yv́ng svng di rae. v 46 Gvray yv́ng kèní dì daqì pè A:ngí wa mø̀í nìnø, Vpè svng yà:ngò we tiq gǿ gø màvl. Ngàí nø Vpè svng vyv́ngshaq íe. w 47 Ngàí kàdøng v̄la:tnìni, Ngà svng kv́m gǿ ang nø dvciq lvpat gø̀nshaq lúne. x 48 Ngà nø gø̀nshaq zidòng ǿngàe. y 49 Namaq nvkop nvkàng maq nø rvgaq mvgūng móngø manna zidòng v̄m nìgø wedøni shì yà:ngì. z 50 Muqlàng kèní la daqà we zidòng vm gǿ mv̀ng nø mvshì long. 51 Ngà nø muqlàng kèní la daqà we cúnshi we zidòng lòng ǿngàe. Zidòng yalòng v́m bǿò gǿ nø dvciq lvpat cúnshìlv́m íe. Vrá rvgaq tø̀m vsvng gø̀nshaq cúnshilv́m dvpvt Ngàí zílv́m Zidòng lòng nø, Ngà sha íe,” a:lòe.
Dèni dvbùshang Mongkà taq Vkangpè Yesu Kristu shøn we nø, ” Ngà svng dèzv́r dakngà pè Vpèí cøpma:tnò gǿ wa mø̀í nìnø, Ngà yv́ng svng kagǿ gø dí mvlúnshì. Ngà yv́ng di ra gǿ svng nø lv̀ngdø̀m ni taq Ngàí dvzunlv́m íe.”(6:44) Vlē a:mì Nár rì taq nøngmaqí tálúnì we móngkà rì svng yangì dvgvp nøngmaqò chutchvng tvrà dvpvt Gvray gvsangí nø tvlú dvgø’shaqìe. Vkangpè í dvgøò we rìng we chutchvng tvrà lòng svng shaqcvmì we nøngmaq taqkèní gø Cìpshì sórí ” pvn vrvm shvngbe nø Vkangpè í dvgøò dø tiqdvchá laq i daq, Ngà ínø vgám lv’m mà-vl” wā vtoshì ra íe.
Kà shvbóng cvmré tiqgø’ kaq, Muk vm mvyø’ pàdø cvmréò nònggùp nø’ shvnvng yv’ng Muk svng dètvpmàò nìnø wè cvmré gø’ nø nø’ áshì nø Muk svng vm lvm wā íe. Wè pàdø Gvray gvsang ígø nøngmaqò nònggùp shvnvng yv’ng svng Cúnshì we gønshaq Muk svng èlvngàvtshà. Nøngmaq gø nø’áshì nø Kvmnøntní vtoshì lúnlvm nø vchvkngè.
Vkangpè ínø nøngmaq svng, ni vrvm Cúnshì we móngkà svng dvdvm vjáng lvm mvtú rì, Mongkà rì, Missa Kàgvp lúm weí nøngmaqò Nønt mvsøn bvngka svng tánà nø shóngnønt vbá we Wur/zú:ní èzí íe. Yalòng svng Nøngmaq gø’ vrvm taqkèní gø vtoshì lúnlvm rvt vchvkngè. Gvray gvsangí nø nøngmaq svng téwa nònggùn kūnga vl dvzvrè. Cúnshì we móngkà svng téwa dvdvm vjáng taqsórí síngràl dvzvr dvgvp nøngmaqò Nønt mvsøn Pvlàcè nø téwa nònggùn kūnga lúnlvm íē. Nøngmaq nvng nøngmaq shvnvng yv’ngø Pvlàcè nvng singdø tìbál vsvngrì mvmè vlē. Mongkà svng nøngmaqí vpø’ shvring nø, Nønt mvsøn vdòng yv’ngø shø’pshì sórí cúnshì lúnlvm nvng Vkangpè Kàgvp vtoshàì vrvm Vkangpè Gvray svng jø’ngjøngni Kvmnøntní vtoshì lúnlvm , Vpø’ we shóngnønt angkang rì wáshì lúnlvm rvt dèshatnìe, shèdømìe.
