

Lvngdøm Àngni Ka:ngé we Tvrà
Solemnity of the Feast of Christ the King)
Kristu vdòng taq Vpø’ íwe pèmè vnvmchvngmaq, yalvban nø
Kristu Koqkvm Bóy, tiqnøng vdòng Angwa Nár 34 vl yv’ngkèní lvngdøm lvban svng gòng bø’shà we íe. Tuq ra lvban kèní nø (B)nøng Noqngøm rvtøò nøng àngshvr svng gòng bø’ íe.
yalvban nø Kristu Koqkvm Bóy lvban àngni íe.
Vpø’ íwe pèmè vnvmchvngmaq, Kristu Koqkvm Bóy svng wáshì lúngì we “Mvshøl Àngdung” svng vzàng shá dvzvr mvyø’è.
1925-nøng taq Svrabyín Koqkvm Pius Xl í Kristu Koqkvm Bóy svng wàlvm rvt Dvrá shàng mvsatnò nø wáshì lúngì tvrà, shvngøt dvtú tvrà mvshøl Kàru bok taqkèní yv’nglúnshìe.
(1925-nøng taq Svrabyín Koqkvm Pius Xl ínø, ‘Quas Primas’ wàwe Svrabyín ò vmíng Kàru bok(Encyclical) tiqlòng svng vrù yangà. Wèlong Kàru lega gøm taq, Vkangpè Yesu Kristu svng Pvn v-rvm Shvngbeò Koqkvm wàwe bøng í, shvgùn shvring shvta sórí Noqngøm lv’m rvt mvsatnò nø dvshvng yangà. Wervt Kristu Koqkvm Bóy nø (1925)nøng dvgvp kèní bung lúngì, wáshì lúngì tvrà svng shálúnshìe. Nvmlat dvgvp, October shvlá lvngdøm lvban Nárni taq yalòng Kristu Koqkvm Bóy svng wáshì yangì. Wè dvgvp wè rvtø Mònggvn dvja, rvgaqtømò Nønt mvsøn vjang laqyà (secularism) nvng Dvci cerìo Nønt mvsøn vjang laqyà (nationalism) gvzà vsher nø nònggùn vl rvtø íē. Mònggvn nø Mong mv-zøl lú:ngì. Nvmlat Mònggvn mvzv’n (WWI)ò mèpvngø, Vrá nø àng dvja rì màtuk we mvmè bø’n bung lúngì. Kristu Koqkvm í øp kvng nø shøl lòng svng vtoshì shá lv’m dvpvt shengøt dètú íe.)
Svrabyín Koqkvm Paulu VI lvpat
1969- nøng taq Svrabyín Koqkvm Paulu VI ínø, téwa àng lvjøm vl dø vshøm(3)dang taqkèní shvbóng dvtukngò we taq, Kristu Koqkvm Bóy lvban àngni svng (Adventu) Kristmat bóy svng mongzøl dø góng lúnlvm dvpvt dvgø’shì Nár nvmlat lvban vzàng kaq svng vrá vséò nø mvsat shvdø’ng yangà. Yalòng Bóy àngni svng ring vtv’ng (solemn)àngni ku mvsat ya:ngà. Wervt, Noqngøm àngnøng (liturgical year)bē we àngni ku síngràl sórí cvndvgømshì lòng íe.
Mongkà jømciqrì;–
(1) Ezekela 34:11-12,15-17… Gvray tiqgóng taqkèní Israel dvcirì svng Ròqgarè, wā shø’nè.
(2) 1Korinhtu 15:20-26,28-58.
Kristu nø shì bø’ì yv’ngkèní vrá Zuná:mì rvt, shì bø’ì vsvngrì vrá dvzun lúngò we svng ká:m ràe, wàe.
Mati 25:31-46 ….. Vkangpè Yesu Kristu í shvngøt dvtú we nø, ‘ Vsvng Angcè pè ‘ jór pòngbang dvgùng gùngshvng taqsórí, dì lú:ng dvgvp, Dvci vrvm svng Kang ngé lú:ngòe. Vyvng roqshú pè ínø Vyvng nvng Dvngchē vwá:lò pàdø, Døngman vsvngrì kaq svng vbàng pa, dvgá vsvngrì kaq svng nø vkwépà kaq, vwál nø gvl lú:ngòe, wā dvkv’mè.
Lvngdøm Àngni Ka:ngé we Tvrà
Noqngøm àngnøng bē we rvtø, wā mvsatshì lòng nø, lvngdøm àngni rvtørì svng dvdvm vjáng dvzvrè. Mònggvn tìsi lvngdøm rvtø angni svng ‘ Ka:ngé we rvtø ‘ nvng tiqdø shvbóng nø shø’nìe.
Ka:ngé we rvtø taq, Vyvng roqshú pè ínø Vyvng rì nvng Dvngchē rì svng vwálò pàdø, Dìngman rì svng vbàng pà, dvgárì svng vkwépà kaq gvlò sórí Ka:ngé lúngòe, wàe. Jór pòngbang rúngtang mvdvmø rung we Vkangpè mvrdvng taqø rìp ra dvgvp, ” àngde í pà wá èlú:nòe, vmíng vkvng kadv’ngte èvlē, Pø’zaqshøp kadv’ngte shøpshì èlún bø’à, kadv’ngte jór èlún bø’à wā røt ra we mø-í.” ‘Dvshá zā mvkok dvdí, tùbùm bvnlì rì svng kadv’ngte wá èlún bø’à walòng svng mv’ng’ mvdøng røtlvm dang Mt25:31-46 ciq vdòng taq chaqdvp dvtàn nø shø’n ya:ngì.
Vbàng pà rìp rì svng shø’n we Mongkà taq;-
Vbàng pà rìp rì svng shø’n we nø, “Ngà svríshø̀ng dvgvp, namaqí ngà svng shèv́m yv̀ngshà. Ngà bál dvgvp, namaqí Ngà svng shèaq yv̀ngshà. Ngà zaqlè wv́ngshø̀ng dvgvp, namaqí nàtō yv̀ngshà. Gwálv́m màdáng dvgvp, namaqí dègwā yv̀ngshà. Ngà zāng dvgvp, namaqí nàcún yv̀ngshà. Ngà tūng rūng dvgvp, namaqí ètìn yv̀ngshà,’ Namaqí ngà svng nēí chaqdvp yv’ng mèlúnshà we íni gø, ‘Ngà vnvm vchv̄ng yarì dvhø̀ taqkèní cv́m vtv̄ng we tiq gǿ svng namaqí èwáā yv̀ngshà dv́ngte nø, namaqí Ngà svng èwáā yv̀ngshà we ni íe,’ v̄l lú:ngòe, wàe.
Vrá nø, Vkwépà vl rì svng shø’n we Mongkà taq;-
Wedá:ngí, Ang vgwé pa vl rì svng, ‘Mvtv́nshaq rì namaqé, Ngà yv́ng kèní èrv́lshìnøng vl lúngòe.
Wekvt angmaqí vtà:ngò nø, ‘Vkàngpèá, Nà svrí èshì we, mø̀íni èbál we, mø̀íni zaqlè èí we, mø̀íni góngsér èí we, mø̀íni èzā we, mø̀íni tūng taq èróng we svng kadvgvp yà:ngì nø, Nà svng màdvbv̄ng yà:ngì ma?’ wa longe. Wekvt Koqkvm pè í, ‘Ngàí namaq svng v̄la:tnìni, yarì dvhø̀ taq cv́m vtv̄ng we tiq gǿ svng namaqí mèwáā yv̀ngnø̀ng lòng nø, Ngà svng mèwáā yv̀ngshà we ni íe,’ v̄l lú:ngòe.
Weyv́ng kèní yamvdò nø, dvciq lvpat mvhøtlv́m yv́ng svng lov̄me; døngman rì mv̀ng nø dvciq lvpat gø̀nshaq cúnshìlv́m yv́ng svng lov̄me.” a:lòe
Vrá nø, Ngào móngdàn nø yalòng rvgaqtømø móngdàn mø-í wàe.
Ya Kà nø, Yesu Kristu í Roma móng øp Pilatu svng shø’n Kà íe. Roma Shvngømré vsvngrì kaq shvrìo we Mongkà taq, “Gvray móngdàn nø… døngman we nvng Shànshér Pvlàcè vdòng taq mòngzø̀l we nvng dvbùlv́m lòng lè íe”.(Rom14:17b). Wervt Gvray gvsang móngdàn nø Dvrá rīn vrá we (justice), shóngshì we (love) nvng mongzøl we (peace) nvng sing we móngdàn íe.
Vkangpè Yesu Kristu nø Koqkvm mvdvm Koqkvm pè í dang
Koqkvm wàwe ‘Kàru chang’ nø yabān taq gvzà mvlv’ng bø’à we Kàru tiqlòng gø íe. Íni gø, Vkangpè Yesu Kristu svng yalòng bøng taqkèní Noqngømì nø dvgùng shvring íe. Vrá nø, Kristuò Koqkvm bø’n lòng;-
(1) Kristu nø Gvray íē. Angí nø Pvn v-rvm shvngbe svng pv’n mv’n lúnòe. Ídv’ngte Pvn v-rvm shvngbe mvdvmø øpkvng lúnòe.
(2) Kristu nø chutchvng angkang pè íe. Angò vpø’ vtv’ng we shvwi taqkèní nøngmaq svng Mvra dòngjøm kèní chut èchvng bø’shà. Nøngmaq nø àng nvng sing íwe, Angò ‘angcø angcèrì’ í shàe.
(3) Kristu nø Shvngømréo ‘ Vgo pè ‘ íe.
(4) Vpè Gvray gvsang ínø Kristu svng jór pòngbang nvng vmíng vkvng vyā rì svng vp tvlè nø zí yangà.
Vrá nø, Yesu Kristu nø cvm vtv’ng gø’ nvng vbóng we tvrà
Vkangpè Yesu nø Angò Mongkà taq cvm vtv’ng gø’ nvng vbóng we tvrà dvtánòe.
Svri shí vhø’mò rì, bál vsvngrì,
Góng gwálvm belaq màdá rì, zā vsvngrì, tung rung vsvngrì kaq wáā shì lòng nø, àng svng dvzømshì lòng íe, wā shø’nè. Vkangpè Yesu Kristu Wurgang mvdvm taqø dvshà mvhøt vhø’mò taqsórí, shì bø’ì lòng nø cvm vtv’ng gø’ nvng vbóng dvzvr lòng íe. Vkangpè Yesu svng vtoshì lòng nø, dvshà mvhøt vhø’mò taqsórí Wurgang mvdvmø shì bø’ì lòng svng vtoshì lòng íe. Vkvtdø vtoshàì lòng gø, cvm vtv’ng gø’ svng vtoshàì lòng íe.
Wervt vpø’ íwe pèmè vnvmchvngmaq,.”(Mt 25:40b)taq “Ngà vnvm vchv̄ng yarì dvhø̀ taq, cv́m vtv̄ng we tiq gǿ svng namaqí èwáā yv̀ngshà dv́ngte nø, namaqí Ngà svng èwáā yv̀ngshà we ni íe,’ wā Vkangpè Yesu Kristu taqkèní nøngmaq gø’ vrvm kaq svng gø dèkv’mìe. Wervt Cúnshàì we lvpat taq Sher we Nønt mvsøn tiqgóng shvngbe taqkèní Gvray kaq vp tvleshì nø Kv’mì pàdø, Tiqdvng vsvngrì kaq svng gø àngde tiqgóng dø shóngshì nø Shvkse wáshì laqlúni, Pvlàcè nònggùn kūnga lùshì laqlúnì wvng dvshat nø vrashì mvyø’è, shvngbe í Kristu Koqkvm Gvray Mongzøl lòng vtoshì laqlúnì shvngbe svng oqā.



