Pope Leo XIV nø àngò shiqshv̀n tvrà dvpvt Assisi myuq svng dìlv́m dvbùshv̀ng zaqlè tvrà svng nvr bǿà
Pope Leo XIV nø vlebǿì we rvtø̀ gv̀ng ngéshì nø̀ cì lvjángshì bǿì we íe. Cìróng kèní yøtshì ráì we nvng àngò shagóng shiqshv̀n tvrà shvlá lúnlv́m dvpvt October 27 ni taq dìlv́m íwe dvbùshv̀ng zaqlè tvrà svng gø nvr bǿà, pàwálv́m wani àngò shiqshv̀n tvrà dvpvt nv̀mbø̀ngshø̀ zaqlè tvrà rì tiqlvng nvr ràwe svng cì svrawon rì taqkèní dvkám bǿà wervt íwe dang vrìng vtnà we íe.
Assisi myuq wawe nø 1986 nǿng St. John Paul II lvpat taqkèní “Unarmed and Disarming Peace” lvmvng tvyø 40 gøm lvmvng svng tuqhøq dìlv́m dvgǿshì shaq íwe ínì gø yadø íwe dvjà rvt nvr vdu bǿì we svng dvtú lú:ngà.
We tvyø svng àng taqkèní shvri kàru shvlvng bǿà we taq àng tiqgǿ taqkèní tuq mvlún bǿà we ínìgø móngdàn 53 móngdàn rì kèní tuqrawe kønmvng rì vhøm lv́m íwe St. Egidio mvdò rì kaq nvnggwòn ziwe kàru svng shvlvng bǿà we íe.
Pope Leo XIV ò shagóng shiqshv̀n tvrà nvng singnø̀ Malignant lung adenocarcinoma rvshú nvng singwe bv̀nchvt shvngbe dvshèr lún bǿì we ínì gø dvtut cì lvjángshì we tvrà wárà we dang dvtú bǿà we íe.
October 27 ni taq wáshì lv́m íwe lìpùngmè “Spirit of Assisi” tvyø nø mònggv̀n mòngzø̀l tvrà dvpvt dvcì shvngbe nvng shvngø̀mré vrv̀m dvpvt gvzà vchvk we tvyø tiqlòng íwe dang svng dvtú bǿà we íe.
