Lourdes yv’ng ” Vløm ra Sasvna wa rì” ku vrá búnglvm rvt Svrabyín Koqkvm Leo (14) í dvkv’m we
Byintin móngdàn Lourdes vl Our lady of Lourdes Vjúrøt Noqngøm Chøm taqø September shvlá (27)ni Missa Kàgvp nóng we rvtø Svrabyín Koqkvm Leo 14 í Mònggvn Dø’ngtangò vjúrøt vsvngrì kaq Nønt vwángshì lvm nvng Nønt língshì lvm lòng svng vkvtni pvng ra bø’ì wā dvkv’m bø’ì.
Svrabyín Koqkvm ínø Gvray gvsang kaq vrá tiqkvt vwángshì lòng nø màshvla we tvrà rì svng gùr nø Cúnshì we tvrà svng rvzvngshì lòng í dang dvkv’mè. Lourdes nø zā yv’ng dvjvng, dvshà mvhøt lòng nvng Vsvk te rì dvhø taqgø, vsvng lvpat gø’ v-rvmò dvgùng nvng Dvciq lvpat gønshaq vløm ra lòng svng dvshat we rvzvngcerìo vløm rà shvra tiqlòng í dang shøn bø’ì.
Wè mvdvm Vmè Maria nø St. Benedet yv’ng angboq angboq røtnímshì we ” Nønt vwángshì lvm, Nønt vwángshì lvm, Nønt vwángshì lvm” wàwe go ka svng vrá vpø’ shvringòe. Mònggvn Dø’ngtangò mvjvn rì nvng Mvra mà-vl dvshà mvhøt vhø’mò vsvngrì dvhø taqø Vsvngrìo Nønt mvsøn vjang laqyàrì tvlíng shì lúnlvm rvt ra vchvk nø angdè tiqgóng kèní tvlingshi nø pv’ngshì ràe wā dvkv’m bø’ì.
Vkvtdø Nønt vwángshì lòng nø angdè tiqgóng dvpvt wā mø-í vsvng, Døngku tiqlòng dvpvt shóngnønt nvng v-rvm vrá lòng í wáshì lún we bvnlì i dang dvtàn bø’à.
Svrabyín Koqkvm ínø, shvngømré svng gø angdèo kūnga shaq vnø’n rì, Nønt mvgør lvm rì nvng Kà shvdiq mvdøngman rì svng Cìpshì we í shvdø’ngshì lúnlvm dvpvt dvkv’m bø’ì.
Zā vsvngrì gø angmaqò dvshà mvhøtlvm nvng yvklvmrì svng Kvmnøntní Gvray kaq nóngò nìnø Kristu í rvzvng we bvnlì rì taq lúm lúnlvm i dang dvkv’m bø’ì nø, àngmaq nø Shvngømréò Nønt mvsøn vdòng taq jø’ngjøngni vl rì ínø angmaqò tvrà nø vrá tvle mvlúnshì dang shøn nø dvkv’m bø’ì.
Lvngdøm taq, Svrabyín Koqkvm ínø Lourdes kaq svng tuqlúngì dø tiqdvchá vrá búnglvm mø-í dang,
“Namaq nø Lourdes kèní vløm rà Sasvna bvnlì wa rì ku vrá búnglvm í lungè”, wā dvkv’m bø’ì.
Lourdesò Dalvm gømlā rì nø dvshà mvhøtlvm nvng gun dvtøp we dvhø taqø Vløm ra lòngò dvbù lvm lòng svng dvshat we i dang mvdøng dvkv’m nø shø’n bø’ì.
