Shaqré shaqtvngrì svng mvkok mvsù:ngwe tvrà nø vlìshì we døngjá møí vpø shvringshì lvm ìshøt mvng íe
Yesu Kristuò àngcì, àngkàng íwe Saint Joachim nvng Saint Anne níò bóyni mèpvng 6 biq waboq vsvk téá:mì we shaqré rìò bóy tvyø svng gø wáshì bøì we íe.
Vatican shvngkà dvp nvng Dicastery for Laity, Family and Life Shaqré shaqtvngrì svng mvkok mvsù:ngwe ràlvng dvp nvng dvmvnwe tvyø taq Vsvk tevm we shaqré rì kaq svng shóngnøt kèní nøt shvløm nø vtoq vtip lvm nvng mvkok mvsù:ng lvm tvrà wárà we dang dvmvn bøì we íe.
15 “Svmaré nø nongcøq we angcè svng vnāshì nø, a:ngí gà:lò we angcè svng màmvréò we v̄l dv̄re ma? We rìí ladv́ng vnáò nìgø, Ngàí nø nà svng mànáng. (Esaya 49:15) we mòngkà ciq kèní Pope Leo XIVí dvshvt mòngkà dvtú bøà nø shaqré shaqtvng rì svng vdè taqkèní téwa tvpní shì we vtoq vtip tvrà, nøt shvløm we nvng mvkok dvdí nøtí vsù:ng lvm vchvk we dang dvtú we íe.
Venezuela móngdàn vdòng taq nvmnøn vnvnshì bøì we mvhøt lvm shìwvt døng kèní shaqré shaqtvngrì svng tubúm dvbangā lvm dang svng gø shvdøm nø dvtú bøà we íe.
Køqzøl rà tvrà kèní lvpat cúnshì we àng mvtú nø vsvk téá:mì we shaqré rì nø pvlàcè dang we tvrà vtangvm we møí àngmaq taqkèní gø mònggvn cømsaq mòngzøl lvm tvrà dvpvt vjúrøtā lvm røt ním ràwe svng shvdøm we íe.
Svrabín koqkvnpèí dvtú we ya mòngkà àng lvjøm nø Shaqré shaqtvngrì svng mvkok mvsù:ngwe tvrà nø vlìshì we døngjá møí vpø shvringshì lvm ìshøt mvng íe walòng svng shádvzvr we íe.
