“Àngdeo rip ra mvdvmø Dinggvng dø zø’mshì we í vrvm vrá lvm lòng svng vrvng mv-lúnshì,” wā Svrabyín Koqkvm í dvkv’mè.
Dvzvr Piter nvng Dvzvr Polo ò bóy ni taqø Svrabyín Koqkvm Leo (14) ínø St. Piter Basilica Noqngøm Chøm me vdòng wà bø’à we vjúrøt bóy ( Missa)taq shvngømréò v-rvm vrá lòng, mà bóng dvrøt dvhvng lòng nvng Vyvng roqshú nvng sing we vjúrøt Kà rì svng mvdøng gvlshì nø dvshvng bø’à.
Svrabyín Koqkvm John Paul (2) taqkèní nvmlat pvng yangà we vtong shvlá tiqlòng svng vrá dvtut dvnóng we í Svrabyín Koqkvm ínø Mònggvn tøngtáng kèní àngshvr dv’ng bø’à we Gaí chuk Svrado gvba (35) gø’ò raqpu mvdvm Vyvng roqshú nvng sing we vlún vkvng svng tvle ku Vyvng mø:lí vraqshaq Vyvng møl múng(Pallium) svng dvgwà bø’à.
Svrabyín Koqkvmò Mongkà kèní mvdøng mvsøngshì lvm rì
Shvmzoqò àng lvjøm: Dvzvr Piter kaq svng mvtúò sórí Svrabyín Koqkvm Leo í shvmzoq wàwe nø bvngka rì svng shvtin gvyaq lvm rvt mø-í nø, v-du vbóng we shvra tiqlòng svng Bø’lømcè í we Chøm tiqchøm shvbø’n lúnlvm poqā lúnlvm rvt i dang dvkv’mè. Shølshú vgo rì taqkèní Angdèo rip ra rì taq wa shvdø’ng shvngvng shì we mø-í lv’m ” Døngman we Mongkà vdòng vhø’m mv-ngú lún we mvtú rì” svng lá lúnlvm rvt dvdut bø’ì.
Màbóng we dvhø yv’ngkèní nònggùn kūnga Dvzvr Piter nvng Dvzvr Polo ní nø àngníò lvpat mvshøl, Sasvna bvnlì nvng Toni kèní nònggùn kūnga vnø’n rì màbóng we íni gø, we rì nø kadvgvp gø vtu vre vgám lòng mø-í we tvrà Svrabyín Koqkvm ínø gvzà vpø’ò taqsórí shøn bø’à. Shànshér Pvlàcè nø màbóng we shaq rì svng v-rvm vrá dvzvr nø gvzà vnvp we tiqlòng ku bóngzøp wáà rvt, angmaqò màbóng màtok lòng nø dvbù lvm ” Shvngkà”ni íē.
Vyvng Roqshú tiqgø’ò bvnlì døngja (Pallium)ò Vyvng mø:l múng nø angdèo Vyvng ré rì svng Vyvng cvmré ce pàdø raqpu mvdvmø paq nø àngmaq dvpvt rvtø, nònggùn kūnga nvng lvpat svng gø zíshì ra we Kà shvdiq svng dvtánò tvrà dang Svrabyín Koqkvm ínø Svrado gvba rì svng dvkv’m bø’à.
Svrado gvba rì Angdèo Sasvna bvnlì Wang kaq vrá tuq lúng rvtø taq ” v-rvm vrá lvm lòng svng vrvngò rì nvng shóngnøntnò nvmlat mvpvng íwe Mongkà Dvrá svng zí lún we dvzømshú dvzvr rì” í lúnlvm dvpvt Svrabyín Koqkvm nvng tiqdø Muqhøm vjúrøt dvbvng lvm wàì.
