Nàò dvbù nøt nvng mòngzø̀l lòng dvgá svng vtv́l mèdè zv́r ni
Pope Leo XIV taqkèní Vatican taq wáshì bǿì we Regina Caeli lvmvng tvyø taq Kristu nø vyv̀ øng roqshú íwe nvng vyv̀:ng kung bv́ngkà ni íwe dang Yohan kàru taq vru yv̀:ngà wedø vyv̀:ng roqshú nvng vkǿ pè dvhø̀ màbóng we tvrà svng mòngkà kèní vtàn bǿà we íe.
Kámnøt tvrà nvng mòngzø̀l we tvrà svng kù:ngà ziwe ìshøt jejú rì dang vdèò mvsø̀n nvrø̀m dòng vshøp shì lv́m nvng we tvrà svng vcat dvzv́:rvtnò we tvrà rì svng vgám we zit nøt gv́lshì lv́m shvngø̀mré vsvngrì kaq dvkám we íe. Vyv̀:ng roqshú nø vyv̀ngrì àng vyv̀ng ré svng sháò rvt vyv̀ng kùng svng dirawe kvt vyv̀ngrì ígø sháò wedang, vkǿ nø dvgá tiqtong kèní dilong nø̀ vyv̀ng kǿ lv́m rvt dirawe dang vtàn ráà we mòngkà taq vru yv̀ngà.
Vyv̀ng roqshúpè Kristu nø gønshaq cúnshì lv́m dvpvt dìráì. Vyv̀ng roqshú nø àng vyv̀ngrì svng lávtnò dø Kristuí gø nøngmaq nvng tiqdø vzø̀m lv́m àngí èláì we íe. Kristuí nø nøngmaq tiqgǿ vrv̀m svng èsháì we írvt nøngmaq svng tvrà èshø:lì nø mèkokìe. Kristu nø nøngmaq gønshaq rì svng chutchv́ng lv́m mòngzø̀l lòng svng zílv́m tuqráì we dang dvkám we ie.
Wervt Kristu svng kám vlǿm shàì we nøngmaq shvngbe nø svre lv́m tvrà mv-vl àngnø nøngmaq shvngbe dvpvt køqzøl rà íwe svng shvdǿm we íe. Wedøni nøngmaq lvpat tvrà taq vkǿ dø íwe ngànshàpè tuqrawe svng gø zitnøt wáshàì nø dǿmshá shìlv́m, ngàshàpè wawe nø nøngmaqò mòngzø̀l we tvrà, dvbù lv́m tvrà rì kaq svng catlv́m tuqrawe dang dvkám we íe.
Mònggv̀nò pø̀ zaqshøprì, vtøl nø catwe, shvwi tì shvyǿòwe mvjànrì nvng mà shvlawe tvrà rì svng tò:ngò we nvng mòngzø̀l we tvrà svng vkǿ tiqgǿ dø catò we dangrì dǿmshá lv́m shvdǿm we íe.
Wervt vdè lvpat svng kagǿ taqkèní tvrà èshøle walòng svnggø síngsháshì lv́m nvng màshvlawe tvrà svng èshøl we ngàshàpè svng gø dǿmshánø gvsat vgám lv́m Svrabín koqkv́mpè taqkèní shvdǿm we íe. Gvray yv́ngsvng kám vlǿmshì we nvng dvbùshvng mòngkà tvrà taq riplv́m Kristu nø bashàrì dvpvt pà tiqpv̀n gø vtø:lò we mv-vl dvciq lvpat gønshaq svng mv̀ng èzíì we dang Svrabín koqkv́mpè taqkèní dvkám we íe.
