RVA rvwang Shvngkà tvyø svng ètashìnøng we shóngshø’ng we pèmè vnvmchvngmaq shvngbe svng Pamvra! Shvngbe mvdvm Gvray mongzøl lòng laqtuqdaq!
Dèsháng vrá Pvlàcè nònggùn lùshì lvm, dvshat kélvm Gvray móngkà nø Yohan 13:16-20 ciq vdòng taqkèní íē.
Dèni rø v-du we, tálúnì we móngkà (1)ciq, Dvzvr 13:13-25 vdòng Tìløp zíshú Yohan shøn we taq, ” Àng nø ngà mèpvng di daqe; ang Híshvnam pǿnalv́m gø ngà màpǿng,” wà shø’n yà:ngì. Híshvnam svng pǿnalv́m nø dvzømshú tiqgø’ò bvnlì íe. Vkangpè Yesu nø Tìløp zíshú Yohan mvdvmø téwa te rvt Vkangpè dvpvt dvzømshú wáshì lvm dvpvt Ngà nø màpø’ng wā shø’n yangì tvrà svng yv’nglúnshìe. Vkangpè Yesuò Døngman lòng svng vzàng kaq dvnúngshú íwe dvzvr Yohan ínø, Cìpshì lòng svng dvtàn yangà.
Dènio Yohan dvbùshang Mongkà Nvmlat wál taq, Vkangpè Yesu ínø Àng lvmboqrìo Hí svng shvlāò tvrà yv’ngkèní nvmlat dvzømshú bvnlì svng wá pvng ya:ngà. Hí shvláè walòng gø Cìpshì lún kvtwā Vkangpè kaq dvzø’m lúnshì we bvnlì íē. Tìløp zíshú Yohan nø dvzømshú tiqgø’ dø Vkangpè Yesu Kristu kaq svng dvzø’m lvm rvt dvzømshú ngà màpø’ng wā shø’n nigø, Vkangpè Yesuí nø dvzømshú tiqgø’ dø lvmboqrìo Hí svng shvlá yangà. Vkangpè Yesuí wà bø’à, dvtàn bø’à we Hí shvlá lòng nø gvzàni vchvk lòng svng dvtánò tvrà íē. Vkangpè Yesuí shvngøt dvtú nø dvkv’m Kà rì svng síngràl lúnshì lòng wā mø-í dø, Vkangpè Yesu àngtiqgóng taqkèní dvtàn bø’à we, wà bø’à we Mvkok dvdí shóngnønt bvnlì svng chaqdvp dvnúng nø Cìpshì we í tāsvng tālè dvzø’m kélvm dèbvng kélvm dang íe.
Vkvtdø Vkangpè Yesu Kristu í Cúnshì we lvpat taq wà yangà, dvtàn yangà Cìpshì lòng nvng Dvzømshì Shóngnønt svng métiq taq gvlshì taqsórí Vpø’ nø ring we Vkangpè Yesuò Mvkok dvti shóngnønt svng shvbóng shvmvtshì rì nø Vkangpè Yesu nvng téwa vzøm lúnlvm vlē. ” Ngàí dvzvrò gø’ svng vtoshì gø’ nø ngà svng nàtōgø’ íe ‘ wā shø’n pàdø, Nøngmaq taqkèní gø tiqdvng vsvngrì kaq shóngnøntní vtoshì lúnlvm rvt Vkangpè Yesu nø shvrúngè. Wervt nøngmaq gø’ v-rvm nø angdè í èlúnò we kūnga vzàm shóngnønt, dvshá zā tùbùm bvnlìrì taq lúm weí mà chalvm, àngde vjú lúnlvm rvt wā lá we mø-í dø tùbùm dvbvngshì sórí Vkangpè nvng shvmvtshì lúnlvm rvt Kvmnøntní dvzaq dvkvngshì laqlúnì wvng dvshat nø nònggùn zí mvyøngè shvngbe svng oqā.
