“Yesu svng ngódōrcìí vdø̄:rò we”
Farisi tiq gǿí nø Yesu svng ang nvng tiqdø v́mpà v́mlv́m gōòe. Wekvt Yesu nø Farisi pè chø̀m taq gòngá:mì nø v́mpà v́mlv́m námrunge. o 37 Wekvt wamà welòng taq mvrà wàò we svmaré tiq mè nø, Farisi pè chø̀m taq Yesu v́mpà v̄m we shá bǿà nø, ngórdōrcì zv́ngshì we lóngshú chúng tiq chv̀ng lv́nga:tnà nø; 38 mèpv̄nglap Ang hí shvnvngø rip ráì nø ngø taqsórí ang nēcìí Yesu hí svng dvshaqòe. Vrá ang vnií shøqò sórí, Ang hí svng gø vbú ma:nò nø ngórdorcìí ma:tnòe. p 39 Yesu svng gō bǿà we Farisi pèí welòng svng yv̀ng bǿà kvt, “Vsvng yapè nø kàdvtutshú í nìnø, Ang svng shupma:tnà mè nø kagǿ í we nvng kadøwa mvrà vl mè í we svng nø dǿ:mò ni we,” wa ang nøt vdòngø dvda:mòe.
Vpø’ íwe pèmè vnvmchvngmaq tálúnì we Gvray dvbùshang móngkà taq, Parisi Simon nvng Mvra vl Svmaré gø’ ní kaq svng shvbóng nø dvdvm lvm wàì. Vlu zíshì nø Vmpa tiqdø vmlvm gōshì lòng nø Shvmv’n Jèjú ìshøt vtoshì lúnlvm dvpvt nvng v-toq v-tìp vrvm vrá lvm lòng svng dvtan lvm rvt íe. Íwe Simon ínø Gvray gvsang kaq nítvp dø gun dvtøp dvdvmò taqsórí Mvrà cìplá lúnlvm rvt dvgvng shì lòng svng yv’nglúnshìe (Lk 7;39). Vkangpè Yesu Kristu Gvray kaq svng Angò JaKa taqkèní shvdúnò nø, Angò zidvng kūnga taqkèní mvsat lvm rvt dvzaq dvkvngshìe. Mvrà vl Svmaré me mvng nø Ang Mvrà rì svng Angni dvdvmshìe, Cìpshìe, shá lúnòe, Nønt vwángshìe, Gvray gvsang kaq vlømshì nø Kv’mè ( Lk 7;38 ). Vpø’ íwe pèmè vnvmchvngmaq Svmaré me nø Vkangpè Gvray kaq svng Angò JaKa taqkèní shvdún nø Angò kūnga vzàm zidvng taqkèní mvsat lvm mà dvkvngshì. Pàgø røtnímshì we mv-wào. Gvray gvsang mvrdvng yv’ngø vl lòng vbóng we íni gø, Nønt mvsøn vjang laqya rì mà bóng we í rvt, vtoshì lòng Gvray jèjú Talen gønpaq gø mà bóng we íe.
Wervt vpø’ vtv’ng, ring vtv’ng Dìngman we Gvray gvsang tvrà, dvciq lvpat Pvlàcè gønpaq svng vtō lúnlvm rvt Cìpshì we Kvmnøntní Dìngman lòng taq tiqdvshaqí rip lún we, Mvrà vdòng yv’ngkèní vwángshì lún we kūnga vzàm taqkèní mvng Gvray dvgùng svng shvring shvta nø shvkse wáshì laqlúni wvng nònggùn zí mvyøngè.
