Kristu vdòng taq Vpø’ íwe pèmè vnvmchvng shvngømré rvzvngcerì shvngbe mvdvm Gvray mongzøl lòng laqtuqdaq shvngbe svng Pamvra.
Shóngshø’ng we pèmè vnvmchvngmaq, Ya lvban nø Angwa Nár (29) lvban wà lvban svng gòng bø’shà. Rvtø vrvm Gvray jèjú mv-ngú lúnì we mvdvm, ya lvban Mongkà jømciqrì taqkèní vrá tiqkvt Pvlàcè kvmnønt nònggùn kūnga lùshì lvm dvgø’shì lúnì lòng gø Gvray gvsangò jèjú íe.
Mongkà jømciqrì;-
(1) Esaya 45:1,4-6
(2) 1Tesalonia 1:1-5
(3) Mati 22:15-21
Vpø’ íwe pèmè vnvmchvngmaq,
Esaya 45:1,4-6 vdòng taq,..
Gvray ínø Kuru (Cyrus) svng rvcvngò nø, wangza dvcirì svng gvsat jórá:mì. Angò dvzømshú Israel dvcirì svng dvbvng lvm rvt Kuru (Cyrus) svng Koqkvm wáshì lv’m rvt rvcvngshì bø’ì tvrà yv’nglúnshìe.
1Tesalonia 1:1-5.. Dvzvr Polo í Tesalonia shvngømré rvzvngcerì kaq svng dvshvngò we móngkà taq, yadø wàe. Namaq Vkangpè Yesu Kristu taq Dø’ngvng dø nalømshìnøng we shóngnønt nvng bvnlì døngjarì rí dèzaqshìnøng lòng svng dvdvmìe. Namaq yv’ng svng tuqlúngì we dvbùshang Mongkà nø, nònggùn kūnga vl we Shànshér Pvlàcè vbá we móngkà, I lòng svng dvdvm nashatnøng, wā shvdømè.
Mati 22:15-21 … Yesu svng vløt lvm dvpvt, Parisi rì í nø angmaqò dvzømshú rì svng Yesu yv’ng dvzvrò nø, ” Røt Ka” tiqlòng røt dvzvròe.
Vpø’ íwe pèmè vnvmchvngmaq,
Parisi rì í nø, màshvla we Nønt taqkèní Yesu svng shvwá lúnlvm rvt vløtnòe. Àngmaq nø Herod vsvngrì tiqmaq nvng tiqdø rvmja vzøm vzap rì íē. Parisi rì nø ‘Kùyà ‘ gún lòng svng laqni mvshóngshì rì ínø, vgámò rì íē. Herod vsvngrì (Herodians)ínø Herod Antipas kaq tùbùm dvbvngò rì íē. Ya vní mvdò ínø, Roma vsuyaq Ra dv’ng lòng taq tùbùm dvbvngòe. Wervt Kùyà gún lòng svng vtō nø cvndvgømòe. Yuda dvcirì nø Kùyà gún lòng svng mvshóng mvwámshì. Kùyà gún lòng nø dvgá wangza dvcirì í shvnip shvnar mv-nyem kè lòng wā àng lvjøm ku dvdutnòe. Vkvtdø màbóng we party vní lòng taqkèní, Yesu svng shvwálúnlvm dvpvt Paqzi doqò nø vløt yangà.
Koqkvm Kesarò rì nø Kesar svng èzínøng, Gvrayò rì nø Gvray svng èzínøng.
Vkangpè Yesuí nø Parisirì í shøm nø vløt lòng svng yv’ng lúnò rvt, shvlāè, màshvla walòng svng mvshøn, Kùyà gún lòng íwe Vsvng hang gvmsung svng luò nø dvtánòe. Yalòng gvmsung mvdvmø kagø’ò Sømla hang nvng dvzik vcaqè wā røtnò dvgvp, Koqkvm ( Kesar) Sømla nvng dvzik vcaqè wā àngmaq vtánshìe. Wè dvgvp Yesu shøn we Kà nø, vchvk we Kà shø’n lòng íe. “Koqkvm Kesarò rì nø Koqkvm Kesar svng èzínøng; Gvrayò rì nø Gvray svng èzínøng”, wā Ka me taqkèní dvkv’m nø shø’nè. Vkangpè Yesu nø Parisirì í vløt lòng yv’ngkèní vkvtdø mongzøl dø lutshì yangì tvrà yv’nglúnshìe.
Bāsha vsvngrìo døngja
Vrá nø, Nøngmaq rvgaqtøm taq Cúnshàì we lvpat taqø, Koqkvm rúngtang shvra lu shàì we, vsvngrì mvdvmø nøngmaqí cvndvgøm ra we bvnlì nvng Gvray nvng sing we bvnlì døngja me rì gø vlē. Nøngmaq svng dvtú we móngkà rì nø, móngdàn Koqkvm nvng sing we Kùyà rì nø móngdàn Koqkvm svng èzínøng, Gvray gvsang nvng sing we Kùyà rì nø Gvray kaq èzínøng, wàwe Kà íe. Yalòng Kà me vní lòng svng pø’n nø èshøn lúngò dvgvp, mvmè yvngè. Wervt àngdungce ku (2) wal shø’n mvyø’è.
Nvmlat tiqwal;-
Koqkvm nvng sing lòng nø pà svng wàe mà?
(1) Dvrá Upvdì ( laws) rì svng tá nø cvndvgøm shì lòng íe.
(2) Dvrá shang mvsatshì bø’ì we Kùyà (taxes) rì svng zv’ngshì lòng íe.
(3) Àngde móngdànò Shølshú vgo rì dvpvt vjúrøt dvbvng lvm lòng íe.
(4) Dvci dvgøng bvnlì rì taq Nønt lúm nø dvbáshìlvm lòng íe.
(5) Dvci shóngnønt dvnzøng lòng íe.
(6) Mongzøngcerì vháng vlún lvm dang taq tùbùm dvbvng dvzaqshì lòng íe.
Vní wal;-
2. Gvray gvsang nvng sing we nø pà lòng svng wàe mà?
(1) Noqngøm, shvgùn shvring, oqā wā jèjú shvta lvm lòng íe.
(2) Angò Mongkà svng tashì taqsórí øp kvng we Dvrá rì svng cvndvgøm lvm lòng íe.
(3) Angò Mongkà svng nònggùp taqkèní gø, vjang laqyàrì taqkèní gø dvshvngshì lòng íe.
(4) Kvmnøntní Jèjú gømlā (Sacraments) rì svng vtoshì lòng íe.
(5) Vlu zíshì sórí tùbùm dvbvngshì we bvnlì svng wáshì lòng íe.
(6) Dvbùshang Sasvna bvnlì wáshì we taq Mongzøl dø dvsher lúnlvm dvpvt tùbùm dvbvngshì lòng íe.
Gvray gvsangò hang Sømla dø tiqdvchá
Vpø’ íwe pèmè vnvmchvngmaq,
Jøm Mongkà taq Vsvng nø, Gvray gvsangò shingmvng hang gømlā nvng vbóng dø tiqdvchá, èpv’n èmv’nìe, wā vbáè. Catholic shvngømré Dvrá Kàru mvr:CCC-225/362/382 taq dvtàn nø shø’nè. Wervt vpø’ íwe pèmè vnvmchvngmaq, shvngbe mvdvm té tēwe nø Pv’n mv’n Gvray íe. Bāsha rvzvngcerì svng shvngøt dvtú ra lúng dvgvp, Dari ban taq nø, Shølshú vgo Koqkvm shvlá tiqgø’ gø’ svng bung dvzvrò nø, shvngøt dvtú we í chutchvng dvzvr yangà meban mvshøl svng yv’nglúnshìe.
_ Kadvtutshú Esaya lvpat taq nø vshuq mvyàm íwe Israel dvcirì svng shvlut lúnlvm dvpvt, Kuru (Cyrus) svng Koqkvm dv’ngòe, wā Mongkà taqkèní yv’nglúnshìe, shálúnshìe. Vrá nø,
_ Dvzvr Polo í Tesalonia Shvngømré rvzvngcerì svng dvdvm vshat dvzvr we taq nø, Namaq yv’ng svng tuqlú:ngì we dvbùshang Mongkà nø nònggùn kūnga vzàm vl nø Shànshér Pvlàcè vbá we Cúnshì we Gvray gvsangò móngkà íe, wā shvngøt dvtú yangì. Wè dø tiqdvchá vpø’ íwe pèmè vnvmchvngmaq, Nøngmaq taq vl we, vdá íwe bvnlì døngja rì taqgø, Gvray nvng sing lòng nø Nøngmaq dvpvt té vtv’ng, vpø’ vtv’ng, ring vtv’ng bvnlì døngja gø è íāìe.
Vpø’ íwe pèmè vnvmchvngmaq, Mt 22:21…. “Kesarò rì nø Kesar svng èzínøng, Gvrayò rì nø Gvray kaq èzínøng,” wā shvngøt dvtú dø tiqdvchá Kvmnøntní cvndvgøm nø Pvlàcè tvrà taqgø, Cúnshàì lvpat taqgø téwa vháng vlún lvm dvpvt vjúrøt tvleshì taqsórí dvzaq dvkvngshì laqlúnì wvng dvshat nø nònggùn zí mvyø’è. shvngbe mvdvm Vkangpè Gvray mongzøl lòng vtoshì laqlúnì.
Shvngbe svng Pamvra.
