Rva rvwang Shvngkà tvyø svng ètashìnøng we shóngshø’ng we pèmè vnvmchvngmaq, shvngbe mvdvm taqø Gvray ìshøt, Gvray mongzøl lòng laqtuqdaq, shvngbe svng Pamvra.
Dèni nø October shvlá 23 ni, Nár Bunga ni svng gòng bø’shà. Dèni dvdvm vjáng nø nònggùn lùshì lvm Gvray móngkà nø Luka 12:54-59 vdòng taqkèní íē.
Angni angrvtø̀ rvwv̄n shá rà we
Mongkà taq;–
54 A:ngí rá vsvng loksokrì svng yadø a:lòe. “Nv̀mløp lapmø rvmøt tiq pù būng long we svng èyv̀ng bǿnøng ke namaq nø, ‘Shø̄ zaq daqe èwànø̀nge,’ wedøni bø̀n daqe. b 55 Vrá, tvnuni nv̀mbø̀ng wa ra we èyv̀ng bǿnøng nìnø, ‘Nv̀m gàng rae,’ èwànø̀nge. Wedøni í rae. 56 Nøt vnínøt ècv̀nnø̀ng rìé, muqlàng nvng rvgaq svng èyv̀ngnø̀ng weí lv̀ngcha rvwv̄n dv́ng èshánøng nìnø, rvgaq mvpìm yabàn ang rvtø̀ svng nø pawá dak mèshánøng ma? wā Vkangpè i èrøtnìe.
Kristu vdòng taq Vpø’ íwe pèmè vnvmchvngmaq, Rvgaqtøm vsvngrì ínø, Toni angwaò vtóng àng dvja Lvmik gømlā nvng Mònggvnò gvsat rì àng jøm rì svng lùshàì we taq mvdaqì. Toniò Rvtø lvngcha Dvla rì svng yvngì taqsórí vzàng kaq bønlvm lòng svng tvlú yv’nglúnì pàdø, Nøngmaqí vhø’mì we mvbø’n nvng bvnlì rì taq Gvray gvsang vbá dang nvng Gvrayí dvgø’ò lòng svng vtoshì lúnlvm dvpvt, dènio dvbùshang Mongkà taqkèní shvngøt dètú íe. Wè mvdvmø Dvrá vji rì Wur svng shini mv-tuq dvgvp, Nà nvng nàkokéshi gǿ nvng shvrv’m shvráshì lvm, Banchvk rì svng dvshér lvm, tiqdvshaqí pvrvn lúnlvm rvt Ra vchvk we mvtú rì svng dvtán lúnlvm shvdømè. Gvray gvsangí nø Nøngmaq V-toq V-tip vzømì tvrà yv’ng mongzøl lòng svng dvtàn lúnlvm, vrá vzøm vzap v-rvm vrá tvrà svng Vpø’ shvring nø dvnúng lúnlvm rvt dèkv’mìe. Vrá nø, Banchvk rì svng tiqdvshaqí pvrvn mèlú:nò ni, Nøngmaqò Pvlàcè kvmnønt vháng lvm tvrà rì taq v-tu vgám sháò nø, Gvray gvsangò Shóngnønt, mvré zā lòng nvng Vroqā lòng yv’ngkèní udøudø vcār nø, kà:ngé we vhø’m lvm vlē, walòng svng shèdø’mì we, dèkv’mì we móngkà íe.
Mongkà ètashìnøng we Shvngbeí Vkangpè Gvray mongzøl lòng vtoshì laqlúnì shvngbe svng Pamvra.
