Nøngmaq tiqgø’ nvng tiqgø’ vléshàì Mvra rì svng Gvray gvsangí èchutnàì pàdø, Nøngmaq gø tasvng tale Mvra vchutké lvm dvkv’mè
(24th Sunday in ordinary time year A)
Kristu vdòng taq Vpø’ íwe pèmè vnvmchvngmaq Yà lvban àngwa Nár (24) lvban wà lvban svng gòng bø’shà.
Ya lvban taq Rø v-du we Gvray gvsang móngkà jømciqrì nø;-
(1) Sirak 27:33_28:9
(2) Roma 14:7-9
(3) Mati 18:21-35
Mongkà (1)ciq Sirak Mongkà taq, Gvray gvsangò dvshá zā mvkok dvdí shóngnønt lòng svng láò gø’ì nø, Tiqdvng vsvng kaq dvshá zā síngà lúnè, wā dvkv’mè.
Mongkà (2) Dvzvr Polo í Roma Shvngømré vsvngrì svng shvrìo we móngkà taq, Nøngmaq nø Cúnshàì we íni gø, Shì ì we íni gø, Vkangpè nvng singì rì í shàe, wā tasvng tale Gvray vdòng taqø vjúrøt dvbvng kélvm dèkv’mìe.
Mongkà (3) Mati Gvray dvbùshang Mongkà taq nø, Vkangpè Yesuí shvngøt dvtú nø cvnàe. Nøngmaq tiqgø’ nvng tiqgø’ vléshàì Mvra rì svng Gvray gvsangí èchutnàì pàdø, Nøngmaq gø tasvng tale Mvra vchutké lvm dvkv’mè.
Vpø’ íwe pèmè vnvmchvngmaq, Dèni nøngmaqí tálúnì we Gvray gvsang móngkà taq, Vkangpè ínø Nøngmaq shvngbe svng Angò shóngnønt taqkèní ègō íē. Vkvtdø ègōì we àng mvtú nø, tiqgø’ nvng tiqgø’ tasvng tale Mvra vchut kélvm nvng tasvng tale vpø shvring kélvm shedø:mìe. Vrá nø, Vroqāe wàwe Kàru (3)vshøm chàng svng Vsvng Shvngbeí àngkang wáshì mvlúnò. Pàwàlvm wàni Vroqāe wàwe kà svng shø’n yòr we í nigø, àngde taqkèní cvn lvm mvyòr, mvmè rvzaq rvt íe, walòng svng shálúnshìe. Vrá nø, Gvzà tá byō we Kà, gvzà kí we kà í nigø, vtōshì lvm mvyòr. Wervt, tiqmaq Vna taq tá màshvlahøq kā we í rvt, mvsøn nvrøm taqø shøp yòr nø, mv-wúmshì, shvngōshì, shø’m nø shv’mna rí we, v-zi v-rùng wàwe, tvle tèqshì mvyø’e, vkvtdø í vsvngrì kaq àngdeò tiq lvpat taqkèní rvmja ku vzø’m nø gvl ràe. Vkvtdø bø’nbung we nø tiqgø’ nvng tiqgø’ vpø kèwe mà-vl, shóngnønt wàwe mà-vl, mvré zā, dvshá zā Nønt mà-vl, shóngnønt mà-vl, rvmnvng kaq síngà we mà-vl, Vrashì we gø mà-vl, vroqā we gø mà-vl rvt íe, walòng svng yv’nglún shìe.
Dènio Gvray Mongkà taqkèní shèdø’mì we taq, Vgo íwe Hkristu taq, nøngmaq shvngbe nø shagóng àng dvgàngcerì íshàe. Cv’m vtv’ng shagóng àng dvgàngce, tiqzàng zàng ladv’ng zāvm nìnø dvgá Shagóng àng dvgàngrì shvngbe gø zā we íe. Wervt Shagóng angdvgàng shvngbe nø, àngshvra nvng angshvra taq vchvk pàdø, rvzvngcerì gø’ vrvm gø shvngømré vdòng taq àngshvrà nvng àngshvra taqø vchvk ínø, zø’m dv’ngì we, Vpø’ í we rvzvngcerì í shàe. Wervt tiqgø’ nvng tiqgø’ Gvray shóngnøntní vzø’m ra íe. Vpø’ ké ra íe. vsíngà ké ràe. Døngmàn ràe, mvré zā mvkok nønt vl ràe. Vrashì nø àng mvtúrì svng lálún ràe. Wè kvtwa Lvngdøm taq shvdún mv-lúnshì we Gvray shóngnøntní tasvng tale vroq kélvm vzøm lúnlvm vlē.
Yadang nvng singdø Vkangpè Yesu Hkristu ínø shvbóng shvmatshì ra ku, àngdeò tiq lvpat taqkèní shvkse dvtán bø’à we íe. Gønshaq shini male dvgvp Wūrgang mvdvm kèní Vkangpè Yesu shø’n Kà nø…. “Vroqángòe” wà kà íe. Wervt “Vroqā we talen” svng nøngmaq rvzvngce gø’ vrvm taqkèní cvndvgøm nø shvkse wáshì laqlúnì wvng dvshat nø nònggùn zí mvyøngè.
Vrá nø Vkvtdø cvndvgømì lòng nø tvn dvgá nī, Vpè Gvray mvrdvng yv’ng, Nøngmaq vléshàì we Mvra rì yv’ngkèní vroqā we, chutnà we jèjú vtōshì lúnlvm vlē, walòng svng dvdvm lúnshìe. Wervt Vroqāe wàwe talen nø nøngmaq rvzvngcerìò Vpø’ vtv’ng “Dvla” hang tiqlòng gø èíā íe. Wervt Vkangpè Yesu Hkristu mèpvng cvnì rvtø taqø shvlá vtv’ng coqcvn lvmboqrì dø, shvlá vtv’ng rvzvngcerì wáshì lúnlvm rvt, àngdeò lvpat taqkèní Gvray dvkv’m Kà rì svng Kvmnøntní cvndvgøm nø cúnshì laqlúni wvng dvshat nø nònggùn zí mvyøngè,Shvngbe svng oqā.
