(21st Sunday of the year cycle A)

Kristu vdòng taq Vpø’ íwe pèmè vnvmchvngmaq shvngømré rvzvngcerì shvngbe svng Pamvra.

Ya lvban nø, Vkangpè Yesu Kristu í Dvzvr Piter mvdvmø Angò shvngømré svng shvzøngò Tvrà tāshì lúnìe.

Ya lvban Rø v-du we Gvray Mongkà jømciq rì;-
(1) Esaya 22:19-23
(2) Roma 11:33-36
(3) Mati 16:13-20.

Nvmlat taq,
” Vkangpè Yesuí Dvzvrì svng Kà røtnò we” tvrà svng vzàng mvshønshì vzvng kaq Mongkà (1)ciq,
Esaya 22:19-23 …… Gvray gvsang ínø, koqkv́m Tø̀ngnø bv̀nlì øpshú pè Shebna svng vyā dvjáò nø, Ngà dvzø̄mshú Eliakim svng Ngàí gōngòe wā shø’nè.

Roma 11:33-36 ….… Dvzvr Polo í nø, Vngàé, Gvray Ang zit rálnøt nvng paqzí bvnya shòní pv̀n kadvngshìni pǿng nø rvnaq ráìé!
Ídv’ngte shvngbe nø Vkangpè yv’ngkèní wā dì we í rvt, àng jèjú svng shvgùn shvringòe. Àng nø Dvciq lvpat jór dvgùng laq vl daq! Yadø laqì daq, wā mvkun zaywa taqkèní shvgùn shvringò tvrà yv’nglúnshìe.

Mahte 16:13-20.… Simon Piter í nø, Yesu svng Na nø Kristu è íè, wā tvnshì rvt, Àng kaq Muqlang móngdànò shv’msoqpuq(key) Sòshi svng Yesuí vp tvlèo dang yv’nglúnshìe.

” Vkangpè Yesuí Dvzvrì svng Kà røtnòe”

Vkangpè Yesu nø, Àng Kagø’ í dang (identity) svng Dvzvrì i shvlá wā mvshvl lúnè mà?.. wā Kà røtnòe. Yalòng nø Vsvngrì í Àng Kagø’ íe, walòng svng shálvm rvt nvmlat røtnò tvrà gø íe. Wè mèpvng Dvzvrì taqkèní kadø lvnè, walòng svng vrá røtnòe. Vkvtdø røt Kà taqkèní røtnò lòng nø, Yesuò àng bøng kadv’ngte dvgùng gùngshvngè walòng svng shá mvyø’ rvt mø-í.
Dèni, Nøngmaq gø’ vrvm nvng gø gvzà singè. Nøngmaq àngde tiqgóng nvng sing we Dìngman lòng svng vchànglvm, vtv’nshì lvm dvpvt, Vkangpè Yesu ínø nøngmaq svng è rø:tnìe. Àngdeo Nønt mvsøn vdòng kèní bung we Døngman lòng svng vchàng nø vtv’nshì lvm nø mvdøng vchvk vtv’ng íe. Tiqmaq í nø Dìngman lòng svng sháì nigø mvsháì dø māìe. Vsvngrì í shø’n rvt, mvdìng mvmv’n we íni gø Kv’m dv’ng, vsvngrì wáshì rvt wáshì dv’ng, àngmaq nø luq rvt wa wáshì dv’ng, dvkømshì dv’ng mø-í dø, àngde tiqgø’ taqkèní Dìngman we Gvray móngdàn, Døngman we shvngømré svng dvdvm vjáng rvdoq rv-wvn, gundvdøp nø vtoshì lúnlvm lòng nø, mvdøng vchvk vtv’ng nvng Dinggvng lúnlvm íē.

Simon Piter vtv’nshì Kà,
“Na nø Kristu wàwe Cúnshì we Gvray gvsang Angcè pè”

Ya Kà nø Simon Piter vtv’nshì Kà lòng íe. Simon Piter í nø Yesu svng Messiah, Gvray gvsangò Angcè pè èíe, wā vtv’nshì nø shø’n bø’ì. Yesu í nø, Simon Piter svng Angò kvmnønt kèní vtoshì lúnò rvt shvgùn shvringòe. Vkvtdø vtv’nshì è lúnò we nø Muqlang kèní Vpè í dvtàn rvt íe, a:lòe. Dvtut Vkangpè Yesu shøn we taq, Ngàí rá nà svng v̄lvtnøng: ” Nà nø Piter èíe. Ngà shvngø̀mré (Church)nø lóngdø̀ng yachv̀ng mvdv̀m taqø Ngàí shvzønglv́m íe. Zùpvng dāng ang jórnònggù:ní* shvngø̀mré svng mvdv́ngké lú:ngò.” a:lòe.

“Muqlàng móngdànò shv̀msòpuq nø, Ngà í nà svng tvlēlvm íe”

Mongkà taq Shv̀msòpuq (Sòshi) wàwe gømlā ku lv’ngòe. Du gamzø vmíng vkvng vyā nvng vlún vkvng tvrà (power and authority) svng shø’n Kà íe. Vkangpè Yesu shø’n we taq, Muqlàng móngdànò shv̀msòpuq rì Ngà i Na svng tvlengòe, wàe. Rvgaq tø̀m taq nàí èdù:ngò we kapà ínìgø, muqlàng taqlapmø gø vdóngshaq ív̄me. Rvgaq tø̀mø nàí shèlà:ngò we kapà ínìgø, muqlàng taqlapmø gø shvlángshaq ív̄me,” a:lòe.
Shvlánglvm nvng Dù:nglvm vmíng, Vlún vkvng, Shølshú vgo pè í we Dvzvr Piter wur kaq Shvngømré svng vp tvle yangà. Yalòng nø, Pvlàcè Kvmnønt Tvrà dang nvng sing we vmíng, vlún vkvng svng shø’n mvyø’ we tvrà íē. Wedø tiqdvchá dèni, Shvngømré angké Dvzvr Piter tvle Svrabyín Koqkvm tiqpè mèpvng tiqpè tvleshì nø è øpmìe, èshøl ì we taq, Cúnshàì lòng, Kvmnønt shvdø’ng shvngvng shàì lòng íe.

Vrá nø, “Yesu í Vlún vkvng zíòe”

Vkangpè Yesu Àng íni, “Shvlánglvm nvng Dù:nglvm vmíng, Vlún vkvng vyā “(Binding and loosing) svng Dvzvr Piter nvng Dvzvr mvdò svng zí yangà.
Mt 16:19c, Mt 18:18, Yh 20:23 taq nø, ” Shv’msòpuq” wàwe Kàru màbá bø’ì. Kàgvp anglí pat Kadvtutshú Esaya Kàru 22:22 taq ” Wekvt Dawi rvp vyā ang shv̀msòpuq nø Ngàí ang raqpù taq hapmò nø, a:ngí tàn bǿò lòng svng kagǿí gø cøt mvlún lú:ngò. A:ngí cøt bǿò lòng svng tán ngu:tnò we kagǿ gø màvl long.” Shv̀msòpuq (Sòshi) svng zìe, vp tvlèe walòng nø, bvnlì døngja me svng shvrì lòng, du gamzø vmíng vkvng vyā svng zi lòng gø íe.

Wervt vpø’ íwe pèmè vnvmchvngmaq, Tv’n dvgá ni Gvray gvsang Muqlang móngdàn góng lúnlvm nø, Vkangpè Yesu angí shvzøngò we shvngømré, angí vrvngò we dvkv’m Kà, Dvrá, vmíng vkvng vdòng taqkèní wā góng lúnlvm vlē walòng svng ya lvban taq, tálúnì we Gvray gvsang móngkà, Mati dvbùshang móngkà 16:18-29 taqkèní gø vkvtdø Dìngman we Vkangpè Yesu Kristuò shvngømré angké taqø Dø’ngvng dø mvre lāre Cúnshì lúnlvm dèkv’mì we tvrà tálúnìe. Mongkà taq, Vkangpè Yesu ínø, màléshì dø Vkangpè Yesuò shvngømré vdòng taq shvzøngshì lúnlvm dèkv’m yangshà. Tv’n dvgá ni Ngà nø, Gvray øngàe, Ngà nø Yesu Kristu øngàe, wànø gø dì lungè, wā dèkv’m yangshà. Wervt àngde èzúnshì we Modō nø Múng i mà? Naq i mà? wā shá ra pàdø, angdèo Kvmnønt tvrà svng gø vtøp lún ra íe.

” Dvzvr Polo í Gvray kaq shvgùn shvring Kà” (shvringòe.)

Vngàé, Gvray Ang zit rálnøt nvng paqzí bvnya shòní pv̀n kadvngshìni pǿng nø rvnaq ráìé! A:ngí kàngé kàrvt tvràri nø kadvngshìni vjáng mvtǿmshì ráì! A:ngí wàò tvràri gø kadvngshì ni dak gún mvtǿmshì ráì! Kadø íe wani vl dv́ngte shvngbe nø, Ang yv́ng kèní bung daqì we í nø, shvngbe nø, Ang taq kèní wa íe. Ang nø dvciq lvpat dvgùng laqvl. Yadø laqí daq!Amen.

“Piter wàwe lóngdø̀ng”

Yesu nø kagø’ íe walòng svng, Piter í nø vbóng vtuk Døngman lòng svng vtv’nshì nø, shø’n bø’à. Vkangpè Yesuí gø àng svng shvgùn shvringò nø, vkvtdø vtv’nshì èlúnò lòng nø, Muqlang taqlap v̄l pè Ngà Vpèí dètan rvt íe, wā shø’nòe. Simon wàwe bøng chang luò nø, Piter wàwe bøng chang zíòe. Piter wàwe àngbøng nø, Greek Kà(Cephas) wàwe ínø, àng lvjøm nø lóngdøng wàwe íe. Vkangpè Yesu shø’n we nø, yalòng lóngdø̀ng mvdvmø, Ngào shvngømré (Church) svng shvzøng lvm íe. Zùpvng dāng shì lòng ang jórnònggù:ní* shvngø̀mré svng dv́ngké lvm mø-í. Muqlang móngdànò shv’msòqpuq ( Sòshi) svng Ngàí na svng vp tvle lvm íe. Dvzvr Mati dvbùshang Mongkà taq Piter svng Shvngømréò vgo (Foundation) angké í lòng svng mesvtnà yangshà. Vkangpè Yesu Kristu í èzíì we lvksan Jèjú Gønpaq vlún vkvng gø íe. Shvngømré nø, dvtut Vkangpè Yesu svng angkang ku Ká:mì we mvdvm, angké Gønshaq angkang ku vlømshàì taqsórí mvre lāre Dinggvng dø Cúnshì lúnlvm vlē.

Vpø’ íwe pèmè vnvmchvngmaq, Dèni Mònggvn taqø Shvngømré vrvngò we (30,000)mun,(40,000)mun dv’ngte vl bø’ì. Dìngman we Kvmnønt tvrà, shvngømré svng Gvrayí zi we zitnøt rálnøt í gundvdøp, rvdoq rv-wvnshì nø shvzøngshì ra íe, Cúnshì ra íe. Wervt Dìngman we Dvzvr Piter mvdvm taqø Vkangpè Yesu Kristu a:ngí ni shvzøng bø’à we Døngman we shvngømré angké svng vtoshì lúnì tiqdvchá Dinggvng dø Cúnshì nø shvzøngshì laqlúnì wvng dvshat nø nònggùn zí mvyøngè.