Vkangpè Yesu Dvzvr Toma svng dvgùng shvring shì we bóy àngni
Shvngbe mvdvm Gvray mongzøl lòng laqtuqdaq! Vpø’ íwe pèmè vnvmchvngmaq Dèni Vkangpè Yesu Dvzvr Toma svng dvgùng shvring shì we bóy àngni gø íe.
Dèni tashì lúnlvm Gvray Mongkà nø Yohan 20:24-29 vdòng taqkèní íē.
Vpø’ íwe pèmè vnvmchvngmaq, Dèni nø, Catholic shvngømré me taqkèní Dvzvr Toma kaq dvgùng shvring we bóy svng wáshì pàdø, Dvzvr Toma ò lvpat mvshøl taqkèní zi we mvkøm mvdøp Paqzi rì svng dèni talúnì we Yohan Gvray dvbùshang móngkà taqkèní vkvtdø yv’nglúnshìe.
Dvzvr Toma taqkèní zi we mvkøm mvdøp Nvmlat (1) lòng nø ” Absence” wàwe Mvdì lòng, mà dvkømshì lòng íe. Kristu Gvrayí Lvmik gømlā dvtánò lòng, Kristu dì lúngì rvtø taq Dvzvr Toma nø wè shvra yv’ngø dvgá dø dvzvr rì nvng tiqdø mà-vl yang. Vsvng mvngpòng, àng mvdò nvng tiqdø mà-vl lòng íe. Vsvng mvngpòng àng mvdò nvng mà-vl Lòng, mvdì lòng, mà dvkømshì lòng ínø, Vlún vkvng me tiqlòng svng krvtzø’mè, wàwe mvkøm mvdøp mvbø’n tvrà svng vkvtdø yv’nglúnshìe.
Dvzvr Toma í zi we mvkøm mvdøp vní (2)lòng walòng nø, mvjò lòng, vléshì lòng yv’ngkèní Gvray kaq lá lúnshì lòng íe. Vní baq wà baq taqø Dvzvr Toma nø dvgá dvzvr rì nvng tiqdø vlē. Nøngmaqò Gvray, nøngmaqò Vkangpè wā vtánshì yangì.
Lvngdøm vshøm(3) Kà wàkà taq nø , vjang laqyàrì língshì nø Kvmnønt Pvlàcè jèjú Gønpaq svng vtoshì lúnò lòng íe. Vrá nø, Ang vléshì lòng yv’ngkèní àng lvpat svng vlíng nø Kvmnønt vl lvm Vkangpè Yesuí dvkv’m yangà. Kristu nvng vhø’m bø’ì yv’ngkèní lvpat àngshvr, Kvmnønt lvpat àngshvr svng vtoshì lún yangà pàdø, Nøngmaq taqkèní gø Pvlàcè kvmnønt nònggùn kūnga àngshvr àngshvr vtoshì lúnlvm dvpvt dvzaq dvkvngshì laqlúnì wvng dvshat nø nònggùn zí mvyø’è, shvngbe svng Pamvra.
