Dvzvr wáshì we (DISCIPLESHIP) lvpat
(13th Sunday of the year cycle A)
Shvngbe mvdvm Gvray mongzøl lòng laqtuqdaq!
Shóngshø’ng we pèmè vnvmchvngmaq ya lvban nø Angwa Nár (13) lvban wà lvban svng gòng bø’shà.
(1) 2Koqkvm 4:8-11,14-16.
(2) Roma 6:3-4,8-11.
(3) Mati 10:34-42.
Mongkà jømciqrì:-
2 Koqkvm 4:8-11, 14-16 …..
Shunem wama kèní mvgàm tiqme ínø, Kadvtutshú Elisha svng vm-lvm Vmpà rø:tnòe. Angí Vmpà shv-vmò lòng ínø, Àng svng ni Gønpaq ìshøt zí bø’à. Lvngasvré tiqgø’ nàdá daqshìe wā Kadvtutshú Elisha taqkèní dvkv’mòe.
Roma 6:3-4,8-11 …….. Nøngmaq nø Kristu nvng tiqdø shì bǿshà kvt kèní nø, Ang nvng tiqdø cúnshì lún lú:ngìe, wa nø nøngmaq ká:mìe. Vkangpè Yesu Zun á:mì lòng nø, Vpè Gvray gvsang nvng tiqdø Cúnshì lòng íe.
Mati 10:37-42 ….. Vkangpè Yesu mèpvng cvn we Dvzvrìo lvpat taq, v-du vbóng dø lúnlvm zibe(cost) nvng vtoshì lúnlvm Gønpaq (reward)rì svng shøn yangì.
Dèni, YESU HKRISTUÒ A MÒNGKÁ taq shvdømè
Nøngmaqí lúnì we Ja, gvmsung, ìshøt shvngbe mvdvmø vpø’ vtv’ng, ring vtv’ng nø ” Gønshaq ” lòng íe.
Yalòng svng nøngmaq shvngbe í gø vsháshaq íe. Nøngmaqí tálúnì we dvbùshang Mongkà taq, Vkangpè Yesu Kristu shønè,
” Ngà dvpvt rvtnø ang gø̀nshaq sǿmv̄m gǿí mv̀ng nø, gø̀nshaq lá lúnlv́m íe.”(Mt 10:39b). Mongkà yalòng svng cvndvgøm lvm dvpvt nø mvmè rvzaqe. Íni gø Mongkào àng lvjøm svng síngràl lúnhøq shálún ra íe. Angpè Angmèmaq svng mvshúngshì vsvng mà-vl. Vdè wurgang baqshi sórí Ngà mèpvng mvcv̀n gǿ gø, Ngàò í màpǿ, wàe. Shø’n mvyø’ we taq, Vkangpè Yesu Kristuò tvrà nvng rvgaqtømò tvrà taq, Vkangpè svng Nvmlat (priority)taq gvl lúnlvm rvt mvdøng mvdaq dvkv’m we móngkà íe. Nøngmaq shvnvng nøngmaqò gurgur taq yv’nglún shì we màshvla lòng svng shøn lvm yorè. Íwe màshvla lòng svng dvshér lvm, gurlvm dvpvt mvng nø gvzà rvzaqè. Yesu Kristu dvpvt gønshaq sø’mè, wàwe taq Angdèo kvmnønt tvrà taqø vtu vre we, dvshà mvhøtlvm, yvklvm rì taq dvshá ká:mshì nø vtoshì lún ra lòng svng shø’n mvyø’ dang íē.
Dvzvr wàwe
Dvbùshang móngkà taq tálúnì we, Dvzvr wàwe àng lvjøm svng dvdvm vjáng shvlāè. Àng Lvjøm nø, “Mèpvng cvn pè” (follower) mø-í ni, cvndvgøm gø’ wā shø’n lòng svng shálúnshìe. Latin Kà taqkèní nø “discipulus” wàwe Kàru chang taqkèní lv’ngshì lúngì we tvrà svng shálúnshìe. Vkangpè Yesu Kristu àngnønt shvrúng lòng svng, àngde Nønt mvsøn vdòng taqkèní síngràl nø cvndvgøm gø’ svng, Yesu Kristuò dvzvr wa shø’nshì lòng íe.
Dvzvr wáshì we (DISCIPLESHIP) lvpat
Dvzvr wáshì lòng nvng singdø vchvk lòng svng, Vkangpè Yesuí nø ‘Kà me’ taqkèní dvkv’m yangà. Vkangpè shøn Kà taq:-
(1) Kagø’ íni gø, Ngà svng èshóng we taq, angpè angmèmaq svng shóngshì gø’ nø, Ngà nvng màpø.
(2) Àngde Wurgang paqshi sórí, Ngà mèpvng mvcvn gø’ gø, Ngà nvng màpø.
(3) Àngde gønshaq mvpáshì gø nø Gønshaq vmàngvmè.
(4) Namaq svng natōnøng gø’ nø, Ngà svng natong gø’ íe.
(5) Kadvtutshú mvrshvm svng vpø’ nø, Kadvtutshú dvzømshú rì svng vtōò gø’ nø, Kadvtutshúò zibe ìshøt svng vtoshì lún lúngòe.
(6) Vsvng tiqgø’ gø’ ínø, Dvzvr dvzømshúò mvrshvm svng vtō nø, Vmpà tiqmáce shv-vm shv-aq zí lúnì, Shvmv’n jèjú ìshøt màlúnshaq, mà-vl lòng, wa dèkv’mìe.
Vrá nø, Vkangpè Yesuò Dvzvr wáshì we taq vpnóng tvleshì lvm rì mvmè vl pàdø, vtoshì lúnlvm zaqshøp Gønpaq ìshøt rì gø mvme luqè. Wèlong ínø, Nøngmaq svng Nønt mvsøn nònggùn kūnga zìe.
Dèni tálúnì we móngkà (1)ciq taq, SHUNEM wamaò mvgàm me lvpat mvshøl svng tálúnìe.
Gvray gvsangò dvzømshú Kadvtutshú Elisha léshì lúngì dvgvp, Shunem wama kèní mvgàm me ínø, Àng døngku pè svng vraò nø àngní Chøm taq vtō nø v́mpà shvv́mòe. Àngni nø angcø angcè mà dá. Àng døngku pè nø Lvpat vshvk té bø’ì. Àngniò Nønt løm we Wur zú Gønpaq lòng svng Kadvtutshú pè taqkèní gvzà Vpø’ shvringàòe. Wervt, Kadvtutshú Elisha ínø Chøm Døngku me dvpvt, kapà wáà lvm lòng svng dvzømshú dvzvr Gehazi svng røt dvzvròe. Gehazi ínø, àngni nø cvmré màdá wa, a:lòe. Elisha ínø, Chøm Døngku me svng vrá Go dvzvròe. Àng shøn we taq, Na nvpnøng ya rvtø taqø, lvngasvré tiqpè ègvl lúngòe, a:lòe . Jø’ngjøngni wè me nø cvmré góng ínø, Elisha í shø’nò dø tiqdvchá, lvngasvré tiqpè svng shøq bø’à. Yalòng nø Gvray gvsang Àng Nønt í lòng, Gvray dvzømshú Kadvtutshú pè svng Vmpà shv-vmò yv’ngkèní vtoshì lúnò we Shvmv’n jèjú Gønpaq Gvray ìshøt lòng íe.
Dvtan we Tvrà
Mati dvbùshang Mongkà taq, rvzvngce lvpat taqø Zaqle vtō lvm gvzà vpø’ nø vchvk we tiqlòng ku dvtánòe. Mongkà taq rvzvngce lvpat, Yesu Kristu bøng taqkèní vsvng tiqgø’ svng vtoshì lòng, shv-vm shv-aq shì lòng nø Vkangpè Yesu svng vtoshàì lòng nvng vbóngè. Wervt Nøngmaq taq Nønt mvsøn vjang laqyàrì svng líng shì nø vtv’ngshì lún ra íe. Rvgaqtømò Nønt laqyàrì svng yvngì, lúnì we taq Nøntshøm lvm mà-vl. Lúnì we taq téwa vdá mvgam mvyø’ íe. Vkangpè Yesuò Mongkà nvng nø gvzà vca:rè, walòng svng shálúnshìe.
Dvzvr Polo ò Mongkà
Dvzvr Polo í shvngøt dvtú we taq, Yesu Kristu svng Kv’mì nø Tìløp kámshàì lòngí, Shiwvt mvra nvng shì lòng nvng vcar á:mì, Yesu Kristu vdòng taqø cúnshì lún bø’shà, wa shøn yangì. Yesu Kristu shì lòng nø Mvra dvpvt tiqbaq wa shì lòng íe. Vrá Zun á:mì lòng nø, Gvray gvsang nvng tiqdø Cúnshì lòng íe.
” Ngà dvpvt rvtnø ang gø̀nshaq sǿmv̄m gǿí mv̀ng nø, gø̀nshaq lá lúnlv́m íe.”(Mt 10:39b) taqgø Vkangpè Yesu Kristu àng taqkèní vkvtdø dèkv’m yangshà. Wervt Vkangpè Yesu Kristu vdòng taqø Kvmnøntní shvdikshì nø cúnshì laqlúnì shvngbe svng oqā.
