YESU Muqlang kaq ngvng we bóy (A) Easter (7)

Shóngshø’ng we pèmè vnvmchvngmaq, ya lvban nø Vkangpè Yesu Kristu Muqlang kaq jór pòngbang taqkèní ngāngá:mì we bóy angni, lvban svng gòng bø’shà.

Ya lvban taq rø v-du we Gvray móngkà jømciqrì nø;-

(1)Dvzvr 1:1-11.
(2)Efesu 1:17-23.
(3)Mati 28:16-20. Mongkà ciqrì taqkèní íē.

-Dvzvr 1:1-11…. Dvzvrì mvrdvng yv’ngø, Yesu svng Muqlang kaq vbun bø’à nø, shvngør í gø àngmaq mvrdvng yv’ngnì wàm bø’à.

-Efesu 1:17-23 …. Gvray gvsangí nø Kristu svng shì yv’ngkèní dvzún bø’à nø, Muqlang taqlap Gvray vbàngpà yv’ng rung dvzvròe.

-Mati 28:16-20… Yesuí Lvmboqrì svng, bvnlì døngja shvrìo we taq, svngpvn dvci vrvm svng dvzvr dvzømshú wáshì dezvrnøng. Mònggvn rvgaq vlè ni høqshaq Namaq nvng tiqdø vl lvm íe, wàwe Kà shvdiq svng zí yangà.

Yesu Kristu Muqlang kaq jór pòngbang taqkèní ngāngá:mì

Vpø’ íwe pèmè vnvmchvngmaq,
Ya lvban nø, Vkangpè Yesu Kristu Muqlang kaq jór pòngbang taqkèní ngāngá:mì we bóy svng Dvdvm màná wáshì nø dvgùng shvring shì we bóy gø íe. Vkangpè Yesu Kristu Muqlang kaq ngāngá:mì we mvnggá nø pàlong í mà? Dvdvm dvké è. Vkangpè Yesu Kristu Muqlang kaq svng ngāngá:mì lòng nø;-

(i) Àngí vtō lvm jór pòngbang svng Kømzøp dø vtoshì lúnlvm dvpvt íe.(Efesus 1:20)

(ii) Nøngmaq dvpvt vl ra dvgø’à lvm rvt íe.(Yh 14:2b)

(iii) Vpè Gvray kaq svng nøngmaq dvpvt vjúrøt dvbvng lvm rvt íē.(Yhn 15:16b),

(iv) Shànshér Pvlàcè svng dvzvrà lvm dvpvt íē.(Yhn 14:16).

Dvzvrì kaq svng dvkv’mò Tvrà

Vkangpè Yesuí nø Angò lvmboqrì svng dvkv’m ra we dvkv’m Kà mvtú rì svng shøn yangà móngkà nvng bvnlì døngja rì svng shvrìo we taq;-

(a) Namaq èdìv́mnøng nø vsvng dvcì í dv́ngte taqkèní rvcv́ngcè wáshì dèzv́rnøng
(Mati 28:19a),

(b) Vpè, Angcè pè nvng Shànshér Pvlàcè bø̀ng taqkèní angmaq svng tiløp èløpmanøng.(Mati 28:19b),

(c) Ngàí namaq svng dvkv́m bǿshà dv́ngte shvngbe angmaqí lvcv̀n lú:ngò dø shèngøtnøng. (Mati 28:20),

Yalòng nø Vkangpè Yesu Kristu Àng tiqgóng taqkèní dvkv’m we móngkà, lvp yangì we Kà rì íe. Yadang svng dvdvmì nø, Nøngmaq gø’ v-rvm taqkèní gø Vkangpè Yesu Kristu lvp Kà, dvkv’m Kà rì svng kadv’ngte cvndvgøm nø dvnúng lúnì e mà? Nøngmaq Catholic shvngømré vdòng taq, shvngømré rvzvngcerì taqkèní mà cvnshì mvdaq cvnshì ra we Kvmnønt tvrà rì vlē. Mongkà svng mvtú shì nø Dvrá Kàru (Catechism) svng Vsvng tiqgø’ lvpat taq cvndvgøm nø, cvnshì ra we bvnlì døngja gvba vdá íwe íē. Yalòng Nvmlat mvpvng svng cvnshì lòng í;-
(a) Nøngmaqò rvzvngce vtong laqyà rì,

(b) Vsvng mvngpòng nvng V-toq V-tip vzøm vzap we tvrà rì,

(c) Angdèo Kvmnønt tvrà svng Nønt mvsøn vdòng yv’ngkèní téwa síngràl lúnshì we í Shvkse wáshì lúnè,

(d) Vjúrøt Noqngøm we dang taq téwa vbóng vtuk dø lúm lúnè,

(e) Gvray móngkà svng dvtut cvnshì mvyø’ we Nønt vlē, vkvtdø shø’n mvlúnshì we Jèjú ìshøt rì svng vtoshì lúnè.

Sasvna Bvnlì Døngja

Vkangpè Yesu Kristu í dvkv’m dø tiqdvchá, ” rvzvngce wáshì dvzvrè, Trinity Vshøm gø’ tiqgóng bøng taqkèní Tìløp zíòe,
Vkangpè Yesuò dvkv’m Kà rì taqkèní shvngøt dvtúè,” wàwe Sasvna bvnlìrì í v-dùe. Vkvt Nøngmaq v-li we Cúnshàì we Mònggvn yachang taqø vlíng vpō lòng mvmè vl we svng nøngmaqí yv’nglúnshìe, shá lúnshìe. Angdungce ku èshøn lúngò dvgvp vsvngrì vháng vlún tvrà nvng sing we bvnlìrì taq téwa Nønt lúmè. Sasvna bvnlìrì taqø nònggùn kūnga yúm lúngì. Vkvtdø shø’n shì rvt, vháng vlúnlvm bvnlìrì svng wá mvdaq wā shø’n mvyø’ lòng nø mø-í. Vkangpè Yesuò dvkv’m Kà rì svng téwa vbóng vtuk dø dvnúng lúnlvm dvpvt, Shvngømré taq vl we nònggùn kūnga svng lv’ngshì we taqø, vbóng vtuk nø døngman dø í ràe, walòng svng mvdøng shø’n mvyø’ dang íē.

Yalòng nø Shvngømré shiwa vsvngrì shvngbeo bvnlì døngja íe, walòng svng gø téwa síngràl lún ràe. Shvngømré bvnlì taq dvbáshì taqsórí, chaqdvp dvzaqshì ra pàdø, wè rì svng tùbùm dvbvng rì gø mvme vl ra we íe. Døngku vrvm taq, angpè angmèmaq ínø angdèo Kvmnønt lòng svng angcø angcèrì kaq svng dvtit tvle zí lún ra íe. Yalòng gø Vkangpè dvkv’m Kà, Vkangpè Yesuò talen íe.

Vkangpè Yesuí zi we dvkv’m Kà, Kà shvdiq

Vkangpè Yesu Kristu Àng tiqgóng taqkèní shøn yangì, èzí yangshà ” Kà shvdiq”nø, “Èyvngnøng, rvgaq vle ni høqshaq, Ngà namaq nvng tiqdø vl lvm íe..”( Mati 28:20b).
Nøngmaq “Sasvna wàì we bvnlì”
(missionary activities) rì svng dètøp lúngò dvgvp, nònggùn lúnshì lvm rì mvmè vl pàdø, nònggùn mvlúnshì we tvrà rì gø mvme vlē. Sasvna wàe, wàwe taq, Angdèo bvnlì svng wáshì lòng mø-í, Sasvna angkang vgo pè íwe Yesu Kristuò bvnlì svng wáshì lòng íe. Vkangpè shvrúng lòng svng síngràl lúnlvm rvt gvzà vchvk we íe. Vkangpè Yesuí lvngdøm taq bvnlì døngja svng shvrì we nø, ” rvzvngce wáshì dvzvr lvm, Tìløp zí lvm, Vkangpè dvkv’m Kà rì svng shvngøt dvtú nø cvnà lvm” yarì íe.

Dvtøp Kà

Vkangpè Yesu Kristu Muqlang kaq svng ngāngá:mì we bóy nø, jór pòngbang dvgùng shvring shì lòng svng vlømshàì we, Muqlang móngdàn taqø Vkangpè Yesu Kristu nvng tiqdø vhø’m lúnlvm lòng svng vløm ra èzíì lòng íe. Nøngmaqò Pvlàcè chutchvng tvrà svng vshvlā nø shvdømè. Vrá nø, Nøngmaq gø’ v-rvmo dvciq lvpat dvgøqshì ra narshì ra Chøm Jø’ngkvp gø Muqlang móngdàn i lòng svng shvdøm we Nár lvban angni gø íe.

” Eyv̀ngnøng, rvgaq mvpìm yabàn lv̀ngdø̀m høq Ngà nø kadvgvp gø namaq nvng tiqdø v̀llv́m íe,” wàe.(Mati 28:20b)

Móngkà ètashìnøng we gø’ v-rvmì Vkangpè Gvray Mongzøl lòng vtoshì leqlúnøng Shvngbe svng oqā.