Shvngbe mvdvm Vkangpè mongzøl lòng laqtuqdaq!
Kristu vdòng taq Vpø’ íwe pèmè vnvmchvngmaqè , Nvpni Vkangpè angni Nár ni nø Zun Bóy Rvtø lvban (5)lvban wà lvban, Kangpè angni svng gòng bø’shà we íe. Ya lvban taq rø v-du we Pvlàcè nònggùn kūnga lùshì lvm Gvray móngkà jømciqrì vzàng shá dvzvr mvyø’è. Mongkà jømciqrì;-
(1) Dvzvr 6:1-7
(2) 1 Piter 2:4-9
(3) Yohan 14:1-12 ciq vdòng taqkèní íē .
Shóngshø’ng we pèmè vnvmchvngmaq, Ya lvban Vkangpè Yesuò dvbùshang Mongkà taq,
“Ngà nø tvrà øngàe, Dìngman lòng nvng gø̀nshaq gø ǿngàe,” wā nøngmaq kaq svng mvkok dvdí shóngnønt taqkèní shvngøt dètú nø dèká:mìe.
Vpø’ íwe pèmè vnvmchvngmaq, Ya lvban Gvray Mongkà jømciqrì svng vjángì taqsórí mvtú (5) dang taqkèní dvshat nø nònggùn zí mvyøngè. Nvmlat…
- Dvzvr 6:1-7…. Dvzømshú mvdò ínø, Dvzvrì í dvtú dø tiqdvchá, Nønt tøng vsvng shvngøt gø’ kaq svng rvzvngò nø Dvzvr rì kaq svng vp tvleò sórí, vm-lvm dó we dvzø’m bvnlì taq bvnlì shvrìoe. Dvzvrì nø vjúrøt we bvnlì nvng móngkà dvshvng we bvnlì taq tøptøp wā cvndvgøm lúnòe.
- 1 Piter 2:4-9…. Kv’m vsvngrì nø, Vkangpè Yesu Kristu vdòng taq rvzvng we vhø’m nø, rvzvngshaq Dvci (chosen generation), Nóngpà Shvrúng we Koqkvm dvci cerì (a royal priesthood) nvng Shànshér we dvci rì ( holy nation)wáshì lúnlvm dvpvt rvzvng bø’à rì íē , wā Dvzvr Piter í dvshvngò nø shvngøt dvtú yangì.
- Yohan 14:1-12..
Yesuí Dvzvrì kaq svng shø’n we móngkà taq, “Ngà nø tvrà øngàe, dìng lòng nvng gø̀nshaq gø ǿngàe, wàe.
(1) Mvtú
Namaq Nønt mecvm nøngnì, wàe.
Nøngmaq rvzvngcerì taq, Svre we, Shaqcvmì rì, Nønt cvmì rì mvmè v-lìe. Vkvtdø í rì shvngbe svng Vkangpè Yesu ínø sháòe. Wervt Vkangpè Yesuí nø, Angò lvmboqrì svng shø’n yangà. Vkangpè Yesu shøn we taq, “Namaq nøt mèdeshànøngni; Gvray kaq gø èkv́mnøng, Ngà svng gø èkv́mshà. Ngà Vpè chø̀m taq nø, v́lrà gvzà v̄le. Wedø màvl pà í nìnø Ngàí namaq svng vzv̀ng kèní dvtáì ni we íe, wàe..” (Yh14:1-2). Ya Kà nø Vkangpè Yesuí lvmboqrì kaq svng lvngdøm taq lvpmò taqsórí dvkv’m yangà Mongkà taq vbá we dvkv’m Kà íe.
(2) Mvtú
Vrá nø, Vkangpè Yesu dvtut shøn we taq,..Namaq dvpvt v́lrà dvgǿa nvng ngà longvme, wàe.
Vkangpè Yesu shøn yangì we móngkà taq, Namaq dvpvt v́lrà dvgǿa le ngà nø longvme. Ngà vl yv́ngø namaq gø v́l lúnlv́m dvpvt, Ngàí namaq svng vrá lù daqìe. “Ngà nø tvrà ǿngàe, dìng lòng nvng gø̀nshaq gø ǿngàe, wàe..(Yh14:6). Yalòng nø Dvzvr Toma svng Vkangpè Yesu vtv’nshì Kà íe. Dvtut Dvzvr Philipmò Kà svng vrá vtv’nà we Kà taq gø yadø wàe,..
” Ngà nø Vpè vdòng taq vl nø, Vpè gø Ngà vdòng taq vl we svng nà mèkv́m ma? ” a:lòe.
(Yh 14:10a). Vrá nø, Ngàí namaq svng shø̀nò we kàrì nø, Ngà nø:tní shø̀nò we mø̀í, Ngà vdòng taq vl pè Vpèí Ang bv̀nlì svng wàò we mv̀ng íe, a:lòe… (Yh 14:10b).
Mvtú (3)
Vkangpè Yesuí Nønt shvløm Kà shø’nè.
Vkangpè Yesu shøn we Nønt shvløm Mongkà taq, Namaq svng nònggùn kūnga dvnzøng dvzvrì lòng nø,” Ngà svng Kv’m gø’ ínø, ngàí wv’ngò we bvnlì rì svng wà lúngòe; wè mvdvm té tēwe bvnlì gø wà lúngòe, wā shø’n yangì..”(Yh 14:13).
Vpø’ íwe pèmè vnvmchvngmaq, Mvdvm kaq tálún bø’shà we móngkà rì nø Dvzvrìo Nønt mvsøn vdòng taq vl we Svre lvm lòng, Nønt yòr Nønt dvshà lòng svng dvshérào we vchvk we móngkà rì íē. Vrá nø, Àngmaq svng nònggùn kūnga zíò we, angmaqò Nønt mvsøn svng a:tdv’ngào nø Pvlàcè nònggùn kūnga dvnzøng dvzvrò we móngkà gø íē.
Mvtú (4)
Bvnlì døngja vwál nø Dvzvròe
Lvmboqrì lvpat taq dvzømshú dvzvr shiwa vsvng mvdòrì svng shølò we taq, bvnlì døngja vwálò nø Vsvng tiqmaq svng bvnlì shvrìo we nvng dvzømshú dvzvr shiwa vsvngrì í dvbù Nøntshøm lòng svng vtoshì lúnòe, lvmboqrì taqkèní gø wá rà we vjúrøt lvm bvnlì nvng móngkà dvshvng lvm bvnlìrì svng vbóng vtuk dø wá lún yangà tvrà dang rì svng Dvzvr Kàru taq yv’nglúnshìe. Yalòng nø Dvzvrìo shølshú hang Dvla íe.
Mvtú (5)
Dvzvr Piter ò Mongkà taq yadø wàe.
Dvzvr Piter í shvngøt dvtú nø shø’n we móngkà taq, Kv’m vsvngrì nø rvcv’ngshaq í bø’ì we dvci, Gvray kaq Nóngpà Shvrúng we Koqkvm dvci rì, Shànshér we dvci rì vpōá:mì wā Kv’m Vsvngrìo dvgùng svng shvring shvta taqsórí Pvlàcè kvmnønt nònggùn kūnga zì nø shøn yangì.
Lvngdøm dvtøm
Vkangpè Yesu àngtiqgóng taqkèní shøn we móngkà taq yadø wàe;-
(1) Namaq Nønt medèshànøngnì… wàe.
(2) Tvrà gø ǿngàe, Dìngman we nvng gønshaq gø ngà øngàe.
(3) Ngà svng Kv’m gø’ nø, ngàí wv’ngò bvnlì svng wá pvng lúngòe; wèlong mvdvm té te we bvnlì gø wà lúngòe, wā dvkv’mè.
Vpø’ íwe pèmè vnvmchvngmaq, Yadang nø Vkangpè Yesu Kristu kaq svng nøngmaq Kv’mì nø àng nvng tiqdø Cúnshàì lòng yv’ngkèní vtoshì lúnlvm Gvray mongzøl lòng nvng dvbù Nøntshøm lvm lòng íe.
Wervt “ Namaq nøt mèdeshànøngni; Gvray kaq èkv́mnøng, Ngà svng gø èkv́mshà ” wā ( Yohan 14;1) taq Vkangpè Yesu Kristu àngtiqgóng taqkèní dèkv’m yangshà. Vlømshì ra èzí yangshà dø tiqdvchá Vkangpè Yesuò dvkv’m Kà rì svng rvtø vrvm cvndvgøm nø Cúnshì taqsórí lvmboqrì dø Shvngømré Sasvna Kvmnønt tvrà taq Shvkse wáshì nø dvzaq dvkvngshì laqlúni, wvng dvshat nø nònggùn zí mvyøngè. Shvngbe mvdvm Gvray mongzøl lòng laqtuqdaq.
