Gvrayí zì we Jèjú ìshøt rì svng v-du vbóng dø lv’ng lún ra dang

Kristu vdòng taq Vpø’ íwe pèmè vnvmchvngmaq Ya lvban nø, tiqnøng vdòng Angwa Nár (34) lvban vl yv’ngkèní lvngdøm (33) lvban svng gòng bø’shà.

Yalvban rø vdu we Mongkà ciqri nø;..
(1) Paqzí Bønya 31:10-13,19-20,30-31.
(2) 1 Tesalonia 5:1-6.
(3) Mati 15:14-30.

Mongkà (1)ciq, Paqzí Bønya 31:10-13,19-30 taq, Zit we svmaré nø lòngsíngrì mvdvm vpø’ nø, Gvray gvsang kaq vpø’ svreò mèí mvng nø shvring we lún lú:ngòe.

Mongkà (2)ciq,
Dvzvr Polo í Tesalonia shvngømré rvzvngcerì kaq shvrìo we, dvshat we móngkà taq nø, ” Vkangpè àngni” svng vzàng kaq tvlú shø’n mvlúnshì rvt, pán vsha:t nønt shvriqshì nø ècānøng, wā shø’nè.

Mongkà (3)ciq taq Mati 25:14-30 taq nø, Vkangpè Yesuí nø “Gvmsung Talent tvleò we” kàshvbóng mvshøl taqkèní shvngøt dvtúè. Yalòng Kashvbóng mvshøl taq Gvray gvsangí zi we Talen svng, Gvray gvsang móngdàn dvpvt Noqngøm nø shvgùn shvring we taq, lv’ng lúnlvm rvt shvngøt dvtúè.

Gvray gvsangí zì we Talent

Nøngmaq Bāsha rvzvngcerì svng Gvray ínø, Talent jèjú Gønpaq ku zi we ìshøt rì mvmè vlē. Wè Gønpaq rì svng ‘Dvgùng’ mø-í ni ‘nònggùn vzàm ‘ wàì nø shø’nìe. Àngde í vtoshì lúnì lòng nvng Tiqdvng vsvng í vtoshì lúnò lòng ìshøt màbóng. Mvdøng vchvk we tiqlòng nø, Angdèo nònggùn kūnga vzàm svng Tiqdvng vsvngò nònggùn kūnga vzàm nvng shvdún nø shvbóng lòng svng, shø’m we Nønt taqkèní mv-wàlvm rvt gvzà vchvkngè. Vkvtdø íwe Nønt mvsøn vjang laqyà í dvdvmì lòng nø, angdèo Nønt mvsøn tiqgóng svng Nønt cvm dvzvr lòng nvng vbóngè.

Gvmsung Talent Kashvbóng
(PARABLE OF TALENTS)

Mvgam tiqpè yv’ngø dvzømshú vshuq vshøm pè vlē. Ang nø vrúm vcār we zaqle wang svng
búnglvm dv’nshìe. Wervt, angí nø dvzømshú vshuq vshøm gø’ svng gvmsung, tiq gǿ svng nø gv̀msùng pungwà talent; tiq gǿ svng nø vní talent, vrá tiq gǿ svng nø tiq talent zíò dá:ngí búngá:mì. Vkvtdø zíò we gvmsung Talent nø gvzàni vpø’ nø ring we íe. Mongkà taq Angdèo kūnga vzàm vl dø tiqdvchá wàwe Kàru chang vbáe. Wè lòng svng eyvng lúngò dvgvp, Nøngmaq tiqgø’ nvng tiqgø’ taqkèní vtoshì lúnì we kūnga vzàm, síngràl lún dang màbóng walòng svng téwa dvdvm síngràl dvzvrè. Parvt, mà bóng walòng svng natìo nìnø mvmè yvng sháòe.

Vjú vl dø lv’ng rà dang

Àngde svng Gvrayí zì we kūnga vzàm svng vjú vl dø lv’ng ra lòng svng, Mongkà taqkèní shvdø’mè. Muqlang móngdàn vrvngshì lòng nvng Tiqdvng vsvngrì kaq tùbùm dvbvngshì lòng dang taq dvzaqshì taqsórí, Gvray gvsangí zì we jèjú Gønpaq íwe nònggùn kūnga vzàm svng lv’ngshì kvtwā shvgùn we nvng shvring we Gønpaq mvzv’n mvzv’n vtoshì lúnlvm dang, ‘ Kashvbóng mvshøl ‘ taqkèní shèngøt dètú íe. ‘ Kashvbóng ‘ mvshøl taq nøngmaqí tálúnì dø tiqdvchá, Gvmsung 5 Talent vtoshì lú:nò pè di rá ì nø, vmit 5 Talent tvlēòe. Wè dø tiqdvchá, Gvmsung 2 Talen vtoshì lú:nò pè í gø, vmyat 2 Talent lún høq dvzaqshì bø’ì. Ya pèní svng Angkangpè í shvgùn shvringòe. Gvmsung 1 Talent vtoshì lúnò pè ínø, mamvng dø vbā taq løpmòe. Àng taqkèní gvsat vjø’n, dvzaq dvkvngshì nø bvnlì wàwe mà-vl rvt, pà vmit gø lá mvlúnò. Wervt angí nø, dàm zi lòng svng vhø’m ya:ngà.

Gvrayí zì we Jèjú ìshøt rì svng v-du vbóng dø lv’ng lún ra dang

‘ Kashvbóng mvshøl ‘ taq vshøm pè wà pè nø, àng svng tvlèo we Gvmsung 1 talent lòng svng vmit lá we mà-vl. Màmvng mvnghøq angí wà bø’à. Vmit lá nø luqhøqshaq angí mv-wào.
Wervt, angí nø dàm zì lòng svng vhø’m bø’à. Angí lúnò hvnce gø vtv’ngvm bø’à. Yalòng mvbø’n nø, língshì we mà-vl, tōdøni nvnvn í lòng svng, Gvray nø mvshóngshì, mvwámshì walòng svng shálúnshìe. Gvrayí zì we Shvmv’n jèjú ìshøt rì nvng tiqdø, Nøngmaq í wá ra we ‘ bvnlì døngja rì ‘ svng talent tvlèo nø èzí íe. Talent Bvnlì døngja svng rvweng nø shvring Gønpaq svng vtō mvlúnshì, walòng svng shèdø:mìe.

Gvrayí Talent tvle rì

Rvgaq mvdvm Cúnshàì we lvpat taqø, angdè taqkèní angkang wáshì lúnì we rì nø, Gvray gvsangí Talent tvle rì wa íe, walòng svng dvdvm vshat ra íe. Àngde tiqgø’ò dvpvt wā mø-í, Shiwa vsvng, Vsvng mvngpòng svng vjú zílún dang taq lv’ng sháràe. Àngde svng Gvray gvsangí Shvmv’nà we Jèjú ìshøt Gønpaq shipvn rì svng, dvtán lún ra íe. Jèjú Gønpaq taqkèní shvring lòng svng vtoshì lúnì pàdø, bvnlì tvyø rì svng gø vtoshì ra íe. Døngman dø tvleshì nø vlømv’mdaq gø’ wáshì lún ra íe. Bvnlì tiqhvnce taq vlømvmdaq gø’ wáshì mèlúnò nìnø, bvnlì mè taq àngde svng vlømv’mlvm rvzaqè, walòng svng dvdvm shvlāè.

(Mt 25:21) “Shèla nø nøttǿng kv́mv́m nàrv̄m we vshuq nàí nø, vdū døni èwà bǿà. Dvrè tiq hvncè taq gø nà nø kv́mv́m nàrv̄m we í rvtnø, ngàí nà svng mvme pv̀n mvdv̀m øpshú wáshì dvzv́rlv́m íe. Nvkàngpè dvbúrà taq mèngūshi rā,”a:lòe. Shèdø’mìe.

Mongkà ètashìnøng we gø’ v-rvmì Gvray yv’ngkèní shiqshan mongzøl lòng Pvlàcè ìshøt vtoshì leqlúnøng Shvngbe svng Pamvra.

Leave a Reply

Your email address will not be published. Required fields are marked *