Kà ta we svmaré (5) me nvng Ka mvta we svmaré (5) mèo Kashvbóng
(32nd Sunday in year A)
Shvngbe svng Pamvra! Vpø’ íwe pèmè vnvmchvngmaq yalvban nø tiqnøng vdòng Angwa Nár, Noqngøm lvban (34) lvban vl yv’ngkèní lvngdøm (32) lvban wà lvban svng gòng bø’shà.
Shóngshø’ng we pèmè vnvmchvngmaq, Noqngøm rvtø lvngdøm lvban rì kaq gòng ráshà dø tiqdvchá, lvngdøm àngni rì dvpvt Pán vshat wáshì nø dvgø’shì lvm Mongkà rì taqkèní shèdø’mìe.
Mongkà jømciqrì;-
(1) Paqzí Bønya 6:12-16
(2) 1Tesalonia 4:13-18
(3) Mati 25:1-13
Tálúnì we móngkà Jømciqrì svng dvdvm vjáng taqsórí (5) mvtú taqkèní gonggùn zí mvyø’è.
Mongkà jømciqrì;-
(1) Hpaji Byeng-ya 6:12-16 ……
Hpaji Byeng-ya ínø, angdè shvrúng lòng svng yv’ng lúnhøq, tiqdvshaqí dvtánòe, wàe.
(2) 1Tesalonia 4:13-18 …… Yesu Kristu nø shì yv’ngkèní vrá Zun a:mì lòng svng Kv’mìe. Àng kaq Kv’m nø, shì vsvngrì shvngbe àng nvng tiqdø Gvray í gō bø’ò lòng svng gø Kv’mìe, wàe.
Mati 25:1-13… Vkangpè Yesu Kristu í nø ‘ Kà ta we svmaré (5) me nvng Ka mvta we svmaré (5) mèo Kashvbóng svng vtv’nà taqsórí, Pán vshat wáshì lúnlvm, dvgø’shì lúnlvm nø gvzà vchvk dang shvngøt dvtú cvnàe.
“Wè ni, wè Rvtø svng mvsháì”
Vpø’ íwe pèmè vnvmchvngmaq, Vkangpè Yesuí shvngøt dvtú nø shø’n we Kà shvbóng mvshøl taq, lvngàshvr pè svng vtōlvm rvt búng lúngì we svmaré(10) me íe. Àngmaq taqkèní (5)me nø vzàng, mèpvng yv’ng lún we zitnønt, Nønt shvgup Nønt vl rì íē. Kà shvbóng taqkèní lvngàshvr pè nø Yesu Kristu svng tvnùo nø shø’n mvyø’ dang íe. Zitnønt, Nønt shvgup Nønt mà-vl we svmaré (5)me nø, Vkangpè Yesuò lvpat taq Yuda Du Vji shaqré rì svng shø’n mvyø’ dang íe. Svmishvr rvmnvng rì nø, shvngømré svng tvnù nø shø’n mvyø’ dang íe. Svmi gwin só nø Shànshér Pvlàcè svng tvnùo nø shø’n we tvrà íē. Svmi gwin nø Shànshér Pvlàcè dvgøqshì lv’m íwe Pvlàcè Nønt mvsønò gømlā íe.
” Yuda Vsvngrìo vtóng laqya rì “
Yuda Vsvngrìo vtóng laqya taq, Svmishvr me nvng shvzøngshì we lvngàshvr pè nø, Svmishvr me svng dvtáò we rvtø taq, mvyø’q Chøm kèní shølò vtóng vl yangì we tvrà svng shálúnshìe. Wervt Svmishvr me svng shøl nvng dì lòng we lvngàshvr pè svng dvbù shvwéshì we í vtō yangà. Yaqdøng rvtø í rvt, Svmigwìn lv’ngshì nø dvciqshì taqsórí vtoshì ya:ngì. Svmigwìn èlv’ngò we taq, Svmi só gø luqhøqshaq rīshì ràe. Lvngàshvr pè tuqlvm angrvtø svng shvláwa mvsháshì rvt, tvlú wáshì nø dvgø’shì ràe.
Àngde gø kadø wā dvgø’shàì mà?
Vpø’ íwe pèmè vnvmchvngmaq, Nøngmaq ni vrvm Cúnshàì we lvpat taq, wàì we bvnlì rì jór lúnìe, Vrá nø krvtzø’m lòng nø angdè nø kadø ku dvgø’shìe, walòng taq mvdøng íe, wā lega vrùshú Svra gvbarì í vrùo Kàru rì yv’ngkèní shálúnshìe. Àngde Nøntshøm, Nønt byō lvm rvt, vdú lùng we ” Gàm ” wàwe taq Nønt vlømshì nø Kv’m màshvla. Àngde taqkèní chvk wā dvgø’shì lún kvtwā, àngde sherúng lòng àng zìbè mvnggá svng vtoshì lúnlvm vlē. Rvtø vrvm dvgø’shì èlúnò we taq, Paqzi Bønya gø cvn lòng we íe. Paqzí Bønya nø, angdè svng shèrúng lúngì yv’ng luqhøq, tiqdvshaqí dvtán lúnè, wàwe Mongkà nø, àngde taq jø’ngjøngni vhø’m lvm í lú:ngè.
“Vwv’nà mvlúnshì we ìshøt “
Vkangpè Yesu Kristu shøn we ‘ Kà shvbóng ‘ mvshøl taq, lvngàshvr pè svng vtō lvm dvgø’shà íwe svmaré rì yv’ngkèní (5) me nø, Svmi só mvluqāò rvt, dvgá me la svng só vwv’nà lv’m rvt røtnímshìe. Wè dvgvp, Rvmnvng rì vtv’nshì Kà nø, Namaq svng vwv’nà ì nìnø, nøngmaq dvpvt mvluq, nà:mò yv’ngkèní èwvnshì nø:ngnìnø gvzà vtuk dang shø’nòe. Àngmaq ná:mò yv’ng svng dì a:mì, wvnshì a:mì dvgvp, lvngàshvr pè nø tuq lúngì. Tvlú wáshì dvgø’shì lún we vsvngrì í wā, lvngàshvr pè svng vtō lúnò sórí shvzøngkung bóy shvra kaq góng lúnòe. Vpø’ íwe pèmè vnvmchvngmaq, Tv’n dvgá ni Pvlàcè tvrà taq vwv’nà mvlúnshì we ìshøt rì vl lòng svng shèdømìe. Àngde tiqgóng dèzaq dèkvngshì kvtwā Pø zaqshøp nàngshì ra lòng, vsháshà íe. Wè pàdø Tv’n dvgá ni dvpvt Pvlàcè ìshøt Shvmv’n jèjú rì nàngshì lvm, dvgø’shì lvm rvt dèkv’mì we móngkà gø íe.
“Mònggvn tìsi lvngdøm angni rvtø”
Mònggvn tìsi lvngdøm angni taq, Vkangpè Yesu nø Mònggvn rvgaq yachang svng vrá tiqkvt dìdaq lòng svng Shvngbeí vsháshaq íe. Íni gø, wè Mònggvn lvngdøm àngni nø kadvgvp í lúng we svng Kagø’ í gø mvsháì. Vkangpè Yesu ínø Dvzvrì kaq svng shvngøt dvtúò pàdø, Nøngmaq shvngbe svng gø shèngøt dètú íe, shø’n we Kà íe. Wè ni, wè rvtø svng mvsháshì rvt, tvlú wáshì nø dvgø’shì lúnlvm mvdøng mvdaq shvdø’mè. Yalòng Mongkà svng angdèo Nønt mvsøn vdòng taqkèní cíngràl lúnìe mà? Angdè tiqgóng svng røtshìlvm rvtø gø íē. Vsvng gø’ vrvm ínø shvla we bvnlì rì svng wàì taqsórí dvgø’shì v-dùe. Pvlàcè tvrà taqgø Nønt pv’n dvshatshì nø dvgø’shì ra lòng svng Vkangpè Yesuí nø nøngmaq svng Mongkà kèní shvngøt dètú íe.
Paqzí Bønya
” Yesu shì nø vrá zun lú:ngì we svng nøngmaq ká:mì rvtnø, welòng dø Yesu vdòng taq shìvmrì svng gø, Gvrayí Yesu døni dvzun daqòe.”(1Tesalonia 4:14). Muqlang móngdàn nø nøngmaq dvpvt Wāma Chøm mvdøng tiqlòng íe. Wervt nø, rvgaqtøm lvpat svng vzàng kaq, mèpvng kaq dvdvm taqsórí Cúnshì ra íe. Paqzí Bønya nø zitnøt rálnønt taqkèní téwa tēè. Paqzí Bønya nø Muqlang móngdàn tvrà nvng shvbóng dvzvrè. “Paqzí Bønya nø angdè shvrúng rì yv’ng svng yv’nglúnhøqshaq tiqdvshaqí dvtán dvzvrè”.
(Hp.Beng-ya 6:12).
” Wervtnø̀ pán nàshatnøng. Kadø íe wani Vsvng Angcè pè dìlv́m angni ang rvtø̀ nø namaqí mèshánøng.”(Mt 25:13)taq Vkangpè Yesu Kristu àng taqkèní ni shvngøt dvtú nø ècvnàì tiqdvchá, Zitnøt vl svmaré (5) me dø shvbóng shvmvtshì nø Cúnshàì we lvpat taq Pán vshat wáshì taqsórí dvgø’shì Pvlàcè Kvmnønt nònggùn kūnga lùshì laqlúnì, shvngbe svng Pamvra.
