The edict of milan
Nvm sār lap taq Galerius shi bøì mepv̄ng angce pè zv̀n dvtut wá shi ya:ngì. Íni gø̄ angnø Licinius í vtù gvcatnò rvt cǿm ya:ngì.
Constantine gø̄ Romá kení Milan kaq svng tuq ráì nø Licinius nvng vhø̄m ya:ngì. We mè pvng angní lvngà nø pagan rì nvng rvcv́ng cerì í cv̀n ngutnò we vming kàrū dvkv̄ng ya:ngà. Mepv̄ng taq Constantine nø shvrúng shú rì gv̀nmsùng gún mvrà we nvng móngdàn bvnlì rì rí mvrà we vkv́ng zí ya:ngà. Shvngøm ré kaq svng gø̄ dvsháza vlū vtō lv́m nvng lúnkv́ng rì zí ya:ngà. Vkangpè angni taq gø̄ bàshà rì bvnlì mvwà lv́m nvng dvkv́ng shi nø bvnlì wà lv́m lòng svng nār ya:ngà.
Romá vsvng rìí lángò we Wùr gáng tøng mvdvm taq shatnò lòng gø vgám ya:ngà. Ang nø rvcv́ng cè tiqlòng mvbø̀n lòng we íni gø shvngøm ré dvpvt shvlā we bv̀nli, vjú vl we bvnlì gvzà wà ya:ngà.
Angí nø noqngøm chyø̀m mvmè wa ya:ngà.St.Petèrò dvgv̀m mvdv̀m taq gø Vnvp we (Basilica) noq ngøm chyø̀m gvbá tiq lòng wà ya:ngà. We lòng zùng chyø̀m nø rvwē mvzuq høq Shaq vl ya:ngì. We mvdv̀m mvtaq St.Polo ò dvgv̀m mvdv̀m taq gø(Lateran Basilica) noqngøm chyø̀m svng wà ya:ngà. (Pope)Wasrabyin v̀llv́m dvpvt gø we zùng shvnv̄ng taq wà ya:ngà. Dvgá dø zùng rì svng gø(Nicomedia, Antioch, Tyre)nvngYerūsalem taq gø wà ya:ngà.
The City of Constantinople nø, nv̀msar lap svng angò(Emperor) dvpvt mvdøng dvkv̀ng lv́m rvt angí dvdv̄m ya:ngà. We rvt nø Grek Myuq shvnvng(Byzantium Myuq shvnvng taq Constantinople Myuq shvzøng ya:ngà.Wedø Constantinople Myuq shvzøng o yv́ng kení mepv̄ng dvpvt gvzà vchvk we ang mvtú tvrà ribǿn sháoe.
Sā rvmv̀ng tóng Laq yà nvng vsvng 0dvcì dang Romá taq kení shvle ò we lún ya:ngà. We dø lā mø̀í kvt nø we rì nø gvzà màlé kē tin gvyaq shá òe. Pa wá lv́m wa ni nø Barbarian rì í tì bø lap nvng Italy svng vtú dáng ò nø gòng rá ì rvt íe.Shvngøm réò Pvlacè nonggø̀n rì móngdàn nvng pà vbān shilv́m mà vl Shaq shvng shvng wa vshēr we lún ya:ngà.Nv̀m sár lam taq shvngøm ré nø móngdan lvngpvng vjá bǿ ì nø(Pope)Wasrabyin í øp we taq vsár ya:ngì.
(337) taq Constantine shi ya:ngì. Ang shi lv́m zàm høq dvshér shi we mv-vl yàng.Ang shi bø ì me pvng angce pèla vshøm gø nø rvgaq rì svng vwál shi yàngì. Íni gø tiq gø nvng tiq gø vzi vrùng wá nø vshat lú:ngì. Lang døm taq Constantius Jòr yà:ngì nø Emperor svng øp shø̀l ya:ngà. Ang nø pagan rì svng bǿn daq we dang kení gvsvt dv́ng kè ya:ngà. pvrá rì svng núngpa shvrúng o we pri svng shi vpǿ we mvrà zi ya:ngà . ang maqò zùng chøm rì svng gø gvyaq a ya:ngà.
Mø̀í ni dvgá tiq pv̀n pv̀n lv́ng ya:ngà.angí vléò we tiqdang nø Pagan paqzí vdeq rì kaq svng zùng rì nvng dvgá dø paqzí zùng rì taq lega shvngøt dvzv́r ò lòng íe.We rvt ang maq nø noq shi we pūng rì svng vtù we nøt rì pagan riò vyuwāda rì svng angmaq í shvngøtnò we dvzv́r shú rì taq kení lú ra dv́ngte zv́ng ya:ngà.
