Muqlang móngdàn svng góng lún bø’à we Shànshér Vsvngrì svng shvgùn shvring we bóy lvban àngni

1 November 2026 Homily (31) Shànshér vsvngrì Shvngbeò bóy àngni (Feast of All Saints)

Shóngshø’ng we pèmè vnvmchvngmaq, Yalvban nø November shvlá (1)ni, Kangpè angni svng gòng bø’shà. Ya lvban taq nø, Kv’m vsvngrì Shvngbeí mvrøtnì we Muqlang móngdàn svng góng lún bø’à we Shànshér Vsvngrì svng shvgùn shvring we bóy lvban àngni tiqni gø íe.

Vrá nø, Yalvban nø Angwa Nár (31) lvban wà lvban gø íe. Ya lvban taq, Kv’m vsvngrì íwe, Muqlang móngdàn svng góng lún bø’à we Shànshér vsvngrì Shvngbe svng dvgùng shvring ínø vjúrøt Noqngømì taqsórí Pvlàcè kvmnønt nònggùn kūnga lùshàì we bóy lvban àngni (Feast of All Saints)gø íe.

Vpø’ íwe pèmè vnvmchvngmaq, Nvmlat taq, Shànshér vsvngrì, Kvmnønt shvrē rìo lvpat mvshøl svng shini mvshønì vzàng, Yalvban taq Rø v-du we Gvray móngkà jømciqrì vzàng shá dvzvr mvyø’nge.

Mongkà jømciqrì;-
(1)Dvtán 7:2-4,9-14
(2)1 Yohan 3:1-3
(3)Mati 5:1-12

(1). Dvzvr Yohan í shingran yvngò lòng svng shø’nò we taq, Mung we belaq gwashì we vsvng yarì nø, dvshà mvhøtlvm rì mvmè svng shalēò nø, angdèo belaq svng vyvngce ò shvwi í shvlshì rì íē.

(2) Gvray gvsangò angcø angcèrì Nøngmaq vkvtnì í shàe, wàe.

(3) Yesu ínø ìshøt ígvn lún we Dvrá (8) lòng (Beatitudes) svng shvngøt dvtú nø, Døngman we Mongzøl lòng tvrà rì svng cvnàe.

_ Kristu vdòng taq Vpø’ íwe pèmè vnvmchvngmaq, Ya lvbanò, Mongkà jømciqrì svng nøngmaqí tálúnì dø tiqdvchá, Muqlang móngdàn svng góng lún bø’à we Kv’m vsvngrì (Shànshér vsvngrì) shvngbe ínø Gvray gvsangò Mvrshvm svng yv’ng lúnò nø Noqngøm lún bø’à rvt Shànshér vsvngrì í á:mì. Wè Kv’m vsvngrì nø rvgaqtøm taq Cúnshì dvgvp Mvra vl we, màshvla we vjang laqyàrì pà tiqlòngce gø mvwàò rì íē. Íni gø, nī vrvm Cúnshì we lvpat yv’ng wà ra we, dvnúng rà we, bvnlì rì svng Gvray shóngnøntní, vpø’ Nøntní, Nønt mvsøn tiqgóng shvngbe taqkèní vwángshì nø Gvray shóngnønt kèní wàò rì íe, Gvray shóngnønt svng dvtánò rì íē. Gvray gvsang kaq Kvmnøntní, Cìpshì Nøntní shóngshì pàdø, angdèo tiqdvng vsvngrì kaq svng gø àngde tiqgóng dø shóngshì rì íe. Àngde Nønt shvrúng lòng svng gurò nø, Kvmnøntní angdè tiqgóng svng Gvray kaq vp tvleshì rì íē. Kristu í shvngøt dvtú cvnà we ìshøt ígvn vl Dvrà (8) lòng nvng vbóng vtuk dø cvndvgømò nø dvzaqshì taqsórí Shvkse wáshì nø Cúnshì rì íe. Namaq shvngbe gø Gvray gvsang móngdàn taq Vpø’ vtv’ng rvzvngcerì èínøngè, wā Shànshér vsvngrì í ègōì taqsórí vjúrøt dèbvngìe we àngni gø íe.

Vpø’ íwe pèmè vnvmchvngmaq, Shànshér vsvngrì nø nøngmaq nvng tiqdø v-lìe. Nøngmaq gø Shànshér vsvng mvdò taq, tiqni rvtø taq nø tuq a:mìe, wàì nø ká:mìe. Jø’ngjøngni nøngmaq gø Gvray gvsang móngdàn svng góng lúnlvm dvpvt Cúnshàì we lvpat taq Shànshér vsvngrì, Kvmnønt shvrē rìo Pvlàcè
Kvmnønt Dvla, ကျင့်စဉ် svng cvndvgømì taqsórí tvleshì laqlúnì, Kvmnønt shvdiqshì laqlúnì,.. wvng dvshat nø nònggùn zí mvyøngè.

Dèni nø, nøng v-rvm “Shànshér vsvngrì Shvngbe svng lvksan shvgùn shvringshì we àngni” íe

Vpø’ íwe pèmè vnvmchvngmaq, Catholic shvngømré me taq, Shànshér vsvng, wā shá dvzá:r we vl pàdø, Bøng mvsháshì we íni gø, Muqlang móngdàn svng góng lúnò we Kv’m vsvngrì gø mvmè vlē. Yarì shvngbe svng bóngzøp wànø,” Shànshér vsvngrì Shvngbeò bóy” àngni wàni nø shvgùn shvringì lòng íe.

“Pvlàcè kvmnønt tvrà Mvshøl” svng shá dvzvr mvyø’è.

Vpø’ íwe pèmè vnvmchvngmaq, ” Shànshér vsvngrì Shvngbeò bóy” svng AD 609 nøng taq Svrabyín Koqkvm Bonaface IV pè wà pè taqkèní, mvsatnò nø shvdø’ng yangà. Nvmlat dvgvp May 13 ni taq wà yang tvrà shálúnshìe. Wè mèpvng Pope Gregory IV pè í vrá, wèni svng tvlíngò nø November (1)ni svng vrá mvsat yangà. AD 837 nøng kèní vrá nø, ‘Shànshér vsvngrì shvngbeò bóy’ svng November (1)taq wáshì yv’ngkèní, dèni høqshaq wáshì lòng íe. Catholic Shvngømré me ò mvshøl taq, Nvmlat dvgvp ” Kvmnønt Tvrào Dvrá Shvkse rì” svng shvgùn shvring we tvyø (Feast of All Martyrs) svng wà yangà. Wè mèpvng, Kv’m vsvngrì shvngbe svng bóngzøp wào nø ‘ Shànshér vsvngrì Shvngbeò bóy ” wā bøng tø’shì lúngì tvrà íe. Svrabyín Koqkvm Pope Gregory (IV) ínø Catholic shvngømré me taq yalòng Bóy svng Dvrá shàng wàlvm dvpvt, vringò nø mèsatnà yangà. Wè yv’ngkèní Mònggvn móngdàn v-rvm taq wáshì lúngì, lòng íe.

Vrá nø, Vkangpè Yesuí shvngøt dvtú we” ìshøt vl Tvrà” svng shá dvzvr mvyø’è.(BEATITUDES)

Rvzvngcerì í Døngman we Mongzøl lòng svng vtoshì lúnlvm dvpvt, Hang dvla mvsatnà we bvnlì (framework)ku yalòng ‘ìshøt vl Dvrá ‘ svng Vkangpè Yesuí shvngøt dètú ráshā,.. wàì nø shø’n shvlāè. Jøm Mongkà svng tvlíngò vsvngrì í ‘ ìshøt vlē ‘ wā tvlíng yangà. “Blessed” wàwe English Kàru chang svng tvlíngò lòng íe. (Blessed wàwe àng lvjøm svng “happy”, “fortunate,” “favored” wànø àng lvjøm svng tvlíng yangà.) Mongzøl nø dvbù lúnè, wàwe ànglvjøm lùshì shvlāè.

Vrá nø, Vkangpè Yesuò Mongkà taq…’ Pvlàcè taq dvsháhoq rì, yór vhø’mò rì, Nønt køn Nønt vl rì, Døngman lòng svng bál vsvngrì, dvshá zā Nønt vl rì, Nønt mvsøn sher vsvngrì, Nønt shø’m dvbù dvzvr rì, vtu vre vhø’mò rì ‘… Yarì ínø, Gvray Shvmv’n jèjú ìshøt rì svng vtoshì lúnò nø, mongzøl nø dvbù Nøntshøm lún lú:ngòe, wā shvngøt dvtú ya:ngì. Nvmlat, vzàng kaq tāshì lúnò rì dvpvt nø Dalvm gømlā me íe. Shànshér vsvng bø’nbung lvm dvpvt ” Dvrá ” nø, Vkangpè Yesuí cvnà lòng íe. Nøngmaqí vpø’ shvringì we, Shànshér vsvngrì Shvngbeí nø yalòng ” Ìshøt ígvn vl Dvrà” svng Nønt mvsøn tiqgóng Shvngbe taqkèní vbóng vtuk dø Sher dø dvzaq dvkvngshì sórí Kvmnønt tvrà taq Shvkse wáshì rì íē.

Vpø’ íwe pèmè vnvmchvngmaq, Shànshér vsvngrì nø, Bāsha rvzvngce, Dvci pvn, zidvng angpvn pvn taqkèní vbá we

Shànshér vsvngrì shvngbe nø Bāsha rvzvngcerì zidvng angpvn pvn taqkèní vbá we íe. Du gamzø, Koqkvm, vl lúnshì rì, dvrvt dvrò, dvshá hot, røtvm vsvngrì gø vbáe. Tiqmaq nø angdè taqkèní téwa ring rì gø vbá pàdø, Tiqmaq nø angdè taqkèní naqciqriq gvzà màshvla dø lvpat taq cúnshì bø’ì rì gø vbáe. Íni gø, Nønt mvsøn tiqgóng shvngbe taqkèní tiqdvshaqí Gvray kaq vwángshì nø Shànshér we vsvng bø’n á:mì. Vpø’ íwe pèmè vnvmchvngmaq, Yalòng Shànshér Vsvngrì mvdò taq, nøngmaqò angci angkangmaq, angpè angmè, angnvm angchvngrì nvng angri angrvprì gø vbásháòe. Wervt, vpø’ íwe pèmè vnvmchvngmaq, dèni nø Nøngmaq shvngbe dvpvt dvbù lvm, ìshøt ígvn vl we, àngni shvlá, lvban angni tiqni gø èíā íe.

Vrá nø;-
Shànshér vsvngrì nø Kristu taq shvngbe bóngzøp wáshìe. Pvlàcè Kvmnønt tvrà svng shvngøt dvtú we Dvrá Kàru mvr (ccc 946/947/948/) yalòng Kàru mvr rì nø, ” Dvzvrìo Kvmnønt Dvrá Kà” (Apostles’ Creed) taqkèní íē. Shvngømré nø Shànshér Vsvngrì shvngbe bóngzøp wáshì we mvdò (íe, wā)(communion)ínø, Pvlàcè kvmnønt Dvrá Kàru mvr ccc946 taq shøn yangà. Vrá nø, Shànshér Vsvng mvdòrì í rvt, Shànshér we Vsvngrì shvngbe nvng gø tiqdø V-toq v-tipmì nø vzømìe. Shànshér vsvngrì nvng gø V-toq V-tip vzømì we Shvngømré gø í shàe. Muqlang móngdàn svng góng lún bø’à vsvngrì shvngbe nø, Sher we Kv’m vsvngrì wā íē. Àngmaq nø Kristuò shagóng Tiqlòng taq bóngzøp, muqhøm wáshì nø vrvngò rì íē, walòng svng shálúnshìe.

Yalòng Shànshér Vsvngrìo bóy àngni taq, Muqlang móngdàn góng lún bø’à Vsvngrì svng, Dvdvm nø lvksan Dvgùng shvringshì lòng íe. Muqlang móngdàn svng góng lún i.