Gvray kaq jø̀ng jǿngni èshóngshì we ínìnø àngnvm àngchvng rì svng gø shóngnøt v́l ràe
Pope Leo XIV taqkèní October 25 ni dvtú mòngkà taq Gvray kaq nà jø̀ng jǿngni èshóngshì we ínìnø we shóngnøt nø àngnvm àngchvng rì yv́ng svng gø we shóngnøt nø tuqlún nø kadvgvp gø tìcèwàng dø vyǿ rà we íe wanø dvtú mòngkà vtàn bǿà we íe.
“Nàò Pv́nmv́n Gvray kaq nàdòng nøt mvsø̀n, tiqgóng shvng be taqkèní èshóngshì” wànø̀ Gvray nø nøngmaq tiqgǿ nvng tiqgǿ shóngnøt vzø̀:mì we dvhǿ taq nv́mrung we dang vtàn bǿà weíe.
“Gvrayí nøngmaq dvhø̀ àngnvng vzø̀m nø vtoq vtip lv́m tvrà tiqlòng ètóngāì we íe. Gvray tiqgǿ wa døngmvn we pv́nmv́n pè Gvray nø nøngmaq shvngbeò Gvray nø íráì wanø̀” vtàn ráà we íe.
Wedø Gvray àngnvng vtoq vtip lúnwe tvrà taq àngò shóngnøt rì nø dvkám kà tiqlòng ku gv̀nráà wenø nøngmaq tiqgǿ vrv̀m kaq mvdø̀ng mvdaq cv́n dvgøm dvzv́r we mǿí pàwálv́m wani vsvng tiqgǿ kaq mvdø̀ng mvdaq dvzv́r we tvrà nø shóngnøt vjø̀ng mǿí wanø̀ shvdǿm bǿà we íe.
Gvrayò shóngnøt wawe nø bashàrì dvhø̀ taq rvnaq vtang we køqzølrà nvng vlǿmrà tiqlòng gø íwe dang dvkám we íe.
Nøngmaq dvhø̀ taq gv́lshàì we shóngnøt wawe nø Gvray yv́ng kèní shóngnøt ìshøt svng vtoshì lúnì we taqkèní wa shvzvt lúnwe íe wanø̀ shvdǿm we íe.
Gvray àngò dvkám kà taq nà shvnvng tiqdv́ng vsvngrì kaq nà tiqgóng døni shóshì ràwe dang dvkám we íe. Wedø ínø̀wa vsvngrì dòngnøt taq bø̀nbung we rvwìng nøt, mvnúr nøt rì dvshér lúnwe dang dvtú we íe.
Gvray yv́ngkèní vtoshàì we shóngnøt taqkèní wa shvngø̀mré, kámnøt tvrà svng gø ngàngdøng dø vrang lúnì we nvng we shóngnøt walòng mv-vl yv̀ngwe ínìnø dvzv́r rìò vbat taqkèní dvbùshvng mòngkà walòng gø vl longwe mǿí wanø̀ dvkám we íe.
Shóngnøt wawe mv-vl longwe ínìnø nøngmaqò kámnøt tvrà gø vhúngni ílonge wanø̀ shvdǿm we íe.
