Kristu vdòng taq Vpø’ íwe pèmè Vnvmchvng, shvngømré rvzvngcerì shvngbe mvdvm Gvray mongzøl lòng laqtuqdaq.
Ya lvban nø Angwa Nár (30) lvban wà lvban svng gòng bø’shà. Ya lvban taq vrá tiqkvt Pvlàcè kvmnønt nònggùn kūnga lùshì lvm dvgø’shì lúnì rvt gø Gvray jèjú svng gvzà oqā wàlvm ra íe.
Ya lvban taq Rø v-du we Gvray móngkà jømciqrì nø;–
(1) Bungam 22:20-26
(2) 1 Tesalonia 1:5-10
(3) Mati 22:34-40
Vpø’ íwe pèmè vnvmchvngmaq,
Bungam Mongkà taq, Gvray gvsangí yadø dvkv’mè.
Gvray gvsangí Israel dvcirì svng shvngøt dvtú nø cvnào we móngkà taq, Tiqdvng vsvng zaqle rì nvng dvsháhoq í rì svng mvré zā shóngnønt dvtán lún ràe, wā shvdømè.
Dvzvr Polo í Tesalonia shvngømré vsvngrì kaq shvrìo we móngkà taq nø yadø wàe..
Àngmaq Gvray gvsang mèpvng cvn lúngì tvrà nø, Kv’m vsvngrì tiqmaq dvpvt shvbóng shvmvtshì ra vpō a:mì, wā shø’nè.
Mati dvbùshang Mongkà taq, Parisi rì nø, Dvrá lòng dang Yesu svng dvtut vløtnòe. Jip we Dvrá rì taqkèní té vtv’ng nø, Ka lòng íe mà? wā røtnò tvrà yv’nglúnshìe.(Mati 22:34-40) vdòng taq,… Yesuí Sadukirì svng dvrā dv́ngke bǿà we svng Farisirìí tá bǿà kvt, angmaq gø dvkǿmshì ráì nø, p 35 angmaq taqkèní dvrá kàciq vrálshú tiq pèí Yesu svng vlø:tnò sórí yadø rø:tnòe. 36 “Svra pèá, Dvrá lòng taq rīng vtv̄ng we dvkv́mkà nø kàciq í ma?” a:lòe. 37 A:ngí wepè svng, “‘Nà nø nà tiqnøt shvngbeí gø, nà dòngnøt mvsø̀n shvngbeí gø, nà shánøt dvdvmnøt shvngbeí gø, Vkàngpè nà Gvray kaq shóngshì ràe,’ wa shø:náòe.
Shóngnønt we pèmè vnvmchvngmaq, Gvray gvsangò dvkv’m Kà rì taq shóngnønt Dvrá nø ring vtv’ng vpø’ vtv’ng nvng Nvmlat mvpvng cvndvgøm ra Dvla í lòng svng Vkangpè Yesu í vkvtdø shvngøt dvtú taqsórí dvkv’mè nø shø’n lòng svng yv’nglúnshìe.
Shóngnønt, wàwe Kàru tiq chang í nø, ídv’ngte shvngbe svng gòng dvzvrè. Mongkà taq, Shánøt dvdvmnøt shvngbeí gø, Vkangpè nà Gvray kaq shóngshì rà dø èshóngshì nø, Angò angcø angcèrì shvngbe svng gø tā rá èshóngshì nìnø, ngv’mshì we dvkv’m Kà rì shvngbe nø yalòng taqø lúmè, vbá è, wàe.
Shóngnønt Dvrá ínø Tiqdvng vsvngrì kaq shvla lòng dvtan lún we, Tvrà dvtú lún we, Vroqā lún we, cíngà lún we vl nø shóngnønt Dvrá nø mvdøng angké í lòng svng Vkangpè Yesuí shengøt dètú íe. Shèdø’mì we móngkà íe.
Vpø’ íwe pèmè vnvmchvngmaq, Bungam Mongkà taqgø, Gvray gvsangí Israel dvcirì svng shvngøtnò we móngkà taq, Tiqdvng vsvng zaqle rì nvng dvsháhoq í rì svng mvré zā mvkok dvdí shóngnønt dvtán lún ràe, wā shvdøm yangì dø tiqdvchá Vkangpè Yesu Kristu í gø shóngnønt Dvrá nø mvdøng vchvk vtv’ng í dang, Gvray gvsang móngdàn dvpvt shvkse wáshì lúnlvm, Pvlàcè kvmnønt nònggùn kūnga lùshì lvm shèdø’mìe, nònggùn èzí íwe móngkà íe.
Mongkà ètashìnøng we Shvngbeí Gvray mongzøl lòng, Vkangpè shóngnønt svng vtoshì laqlúnì. Shvngbe svng oqā.
