Kristu vdòng taq Vpø’ íwe pèmè vnvmchvngmaq Dèni nø October (22)ni lvban vbì ni svng gòng bø’shà. Shvngbeí shiqshan mongzøl lòng vtoshì leqlúnøng Shvngbe svng Pamvra.
Dèni nònggùn lùshì lvm Gvray móngkà nø Luka 12:49-53 vdòng taqkèní íē.
Yesu rvt nø vwálshì long we, Mongkà mvshøl taqkèní íē.
“Ngà nø rvgaq tø̀m svng svmi shùrlv́m dø̀ng dakngà we íe. Akvtni lādv́ng vkat nìnø Ngà dvbòngnøng we! 50 Iwe Ngà løpshì ràng we tìløp tiq long shini èv́lānge, welòng màdvdv́ngò dv́ngte Ngà svng vtv̄ng kèní shènv̄lkēnge, wàe.
Kristu Gvray ínø Mongzøl lòng mø-í nø, Nønt vtøp lvm, mvdò vwángshì lvm lòng svng mvng rìòe, wā dvshvngòe. Mongzøl lòngò angkang pè, mvkok dvdí shóngnønt angkang pè, mvré zā shóngnønt dvnzøng pè, wàì nø shønì we, Gvray nø Mongzøl lòng mø-í nø, Pàrvt Nønt mvsøn mvdò vwálshì lvm lòng svng rí lú:ngà mà? (Mati 10:34) “Rvgaq tø̀m svng Ngàí mòng dvzø̀llv́m lòng èlv́nga daqshà mèlv́nnø̀ngni. Ngà nø mòng dvzø̀llv́m dvpvt dø̀ng dakngà we mø̀í; shv̀mshvnaq lv́ng dakngà we mv̀ng íe, wā dvkv’mè. Vrá nø, Kristu Gvray ínø àng mvdvm Chøm Døngku svng téwa shóngshì gø’ nø, ang zí mvyø’ lòng lún mà pø’ wā shangshang wā shø’n yangì.
Vrá nø Kristu mèpvng cvnè wàwe taq, vzaqshi Nøntní, Nønt rvtshì lvm nø gvzà vchvkngè. Nønt rvtshì dødø, Nønt mvrvtshì dødø wáshì mvdaq. Kàshvbóng; shø’n mvyø’ we taq,.Mung í ní mung, Naq í ní naq rvcvngshì lvm vchvkngè. Mèpvng ‘cvnè’ wàwe taq vpnóngshì lvm, røtnímshì lvm, dvshá kámshì lvm nø mvyòr walòng svng shø’n mvyø’ dang íe.
Gvray kaq shóngshìlvm nvng àng mèpvng cvnlvm rvt vchvk lúng dvgvp rvgaqtøm taq vl rì shvngbe nø mé v-ní taqwā vlē, walòng svng shø’n mvyø’ dang íe. Kristu Gvray nø Døngman we Mongzøl lòng Svmi mvlá:mp dø vcór nø gá we Nønt mvsøn vjang laqyà rì svng dvtánòe. Vzing we nønt mø-í dø, Angí ègo daqì dvgvp vzaqshi Nøntní, nønt rvtshì nø, Gvray gvsang nvng màbóng mà tuk we, shvrúng we mà-vl dø dvshér lúnlvm rvt ègo íe. Wervt Gvray gvsang shvrúng we taq rvtø v-rvm cvndvgømì taqsórí cúnshì laqlúnì, Shvkse wáshì laqlúni wvng dvshat nø nònggùn zí mvyøngè. Shvngbe svng oqā.
