“Vsvng 5,000 shvá:mò we” tvrà svng yv’nglúnshìe.
Kristu vdòng taq Vpø’ íwe pèmè vnvmchvng, shvngømré rvzvngcerì shvngbe mvdvm Gvray mongzøl lòng laqtuqdaq.
Ya lvban nø Angwa Nár (18) lvban wà lvban svng gòng bø’shà. Ya lvban taq nø, St.John Veanney svng dvgùng shvring taqsórí Shvrúngshú Wajau rì dvpvt vjúrøt dvbvngì we lvban àngni gø íe. “Namaq shvngømré rvzvngcerìo vjúrøt Kà í nø àngmaqò lvpat taqø téwa nònggùn vl nø Sacramentu nvng singwe tvrà rì svng gø shvlá vtv’ng dø cvndvgøm nø wálúnlvm vlē. Namaqò tùbùm dvbàng lòngí nø Vsvng shvngbe dvpvt dvbùshang Mongkà rì svng dvshvng nø pø’n we taq àngmaqí nøntshøm dvbù lúnlvm vlē ” wā mà-vl bø’ì we Svrabyin Koqkvm France taqkèní vkvtdø vjúrøt dvbvng lvm rvt dèkv’m yangshà. Wervt Vpø’ íwe pèmè vnvmchvngmaq Gwørwang øp Wajau, Shvrúngshú rì dvpvt vjúrøt dvbvngì taqsórí dvgùng shvring oqā wá laqlúnì, wvng dvshat nø nònggùn zí mvyøngè.
Ya lvban Rø v-du we Gvray móngkà jømciqrì:-
(1) Esaya 55:1-3.
(2) Roma 8:35,37-39.
(3) Mati 14:13-21.
Kristu vdòng taq Vpø’ íwe pèmè vnvmchvngmaq, Esaya 55:1-3. Gvrayí dóò we gø̀nshaq ìshøt svng vtoshì lúnlvm dvpvt Gvray gvsang ínø nøngmaq svng ègō íē wā dvkv’mè.
(3) Mati 14:13-21.”Vsvng 5,000 shvá:mò we” tvrà svng yv’nglúnshìe.
Vpø’ íwe pèmè vnvmchvngmaq, Mati dvbùshang Mongkà taq
Zidong Bunga chvng nvng Ngā vní go svng Shvmv’nò nø Vsvng Bunga kíng gø’ kaq svng Vkangpè Yesuí shv-vmò tvrà svng yv’nglúnshìe, tálúnshìe. Àngmaq taq vl we mvluq we íni gø Shvmv’nò nø shvluqò we í svri shì vsvngrì kaq svng vgáhøq shv-vm yangà. Yalòng nø Gvray gvsang mvrdvng yv’ngø cvmè, teè, mvluq walòng nø mvdøng mø-í, Kvmnøntní shvrúng lúnlvm, dvtit tvle lúnlvm lòng le mvdøng íe walòng svng dvtánò we mvbø’n tvrà gø íe.
Gvray gvsangò angcø angcèrì íshà we nøngmaq shvngbe gø tiqgø’ nvng tiqgø’ tasvng tale shóngnøntní tùbùm dvbvng ke taqsórí Cúnshì lúnìe. Tiqdvng vsvng tiqgø’ò tvrà nø Angdè tiqgø’ò tvrà ni íe. Wervt Nøngmaq tiqgø’ nvng tiqgø’ nø bvnlì døngja vdáshaq í bø’shà. Vsvng loksokrì svng shvrúngò nø zidong muk svng luòe, Shvmv’nàòe, Muk svng vmøtnò nø zíòe. Yarì nø Gvray gvsangò bvnlì íe. Yalòng mvbø’n tvrà ínø Vkangpè Yesu Kristuò Kàgvp Sacramentu svng gø tvnuò tvrà gø íe.
Àng tiqgóng svng vmøt we vhø’mò nø, vsvngrì í dvtit tvle lúnlvm dvpvt Mung we zidong muk vdòng taqø vl lòng svng Vsvngrìo ne taqkèní yvng we taq bø’n mvdaq wā shø’n v-dùe. Íni gø Gvray gvsang dvpvt nø bø’n daqè. Kv’m we vsvngrì dvpvt nø bø’n daqè, walòng svng yv’nglúnshìe. Gvray gvsang nvng tiqdø àng lvjøm svng lá lún kvt jø’ngjøngni shvlá vtv’ng lvpat, gønshaq svng lá lúnlvm vlē. walòng svng vkvtdø shèdø’mì we Lvmik gømlā mvbø’n Mongkà gø íe. Gvray gvsangò Cúnshì we Mongkà svng tāshàì we gø’ vrvmì Gvray mongzøl, Gvray Pvlàcè ìshøt vtoshì laqlúni shvngbe svng oqā.
