Muqlàng móngdàn nø, rvlogwìngshíng shvlá láò we wulaq wa vsvng nvng vbónge

Muqlàng móngdàn nø, rvlogwìngshíng shvlá láò we wulaq wa vsvng nvng vbóngePè me Bóy.(17th Sunday of the year cycle A)

Kristu vdòng taq Vpø’ íwe pèmè vnvmchvngmaq Ya lvban nø Angwa Nár(17) lvban wà lvban svng gòng bø’shà.

Ya lvban Nár ni taq Rø v-du we Gvray gvsang Mongkà ciqrì nø:-

(1) 1 Koqkvm 3:5,7-12.
(2) Roma 8:28-30.
(3) Mati 13:44-52.

Mongkà ciqrì;-

1Hkawhkam 3:5,7-12 …
“ Nà bashàrì svng øp shálv́m rvt, Nà dvzø̄mshú pè ngà svng
Shvlalòng nvng mvgvmlòng svng rvwíng shálv’m zitnøt èzø’ng dakngà, wā Solomon nø røtnímshì yangì. Vkvtdø røtnímshì lòng svng Gvray gvsang nø shóngwámshìe, vtō nø Shvmv’nàòe.

Roma 8:28-30 …. Gvray gvsang ínø, Darì kèní Angcè pè mv̀rshv̀m vmvtlv́m rvt, A:ngí Nøngmaq svng rèhiq yangshà, wā shvngøt dètú íe.

Mahte 13:44-46 … Yesu hkristu ínø Muqlang móngdàn nvng sing dø ‘Kashvbóng mvshøl’ taqkèní dvtut dvshvngò nø shvngøt dvtú we tvrà svng tálúnshìe.

Vpø’ íwe pèmè vnvmchvngmaq Vkangpè Yesu Kristuò Kashvbóng mvshøl (2) lòng taq:-

“Muqlàng móngdàn nø, rvmá tiq hv́ng taq vmáshaq vpø̀ tiq bø̄m nvng vbónge, wàe. Vsvng tiq gǿí yv̀ng bǿò kvt nø, mā máò nø, welòng rvt dvbù weí, div̄m nø ang vdá we í dv́ngte nv̄mshi dv̀ng rvmá wehv́ng wv̄nshie. t Vrá, muqlàng móngdàn nø, rvlogwìngshíng shvlá láò we wulaq wa vsvng nvng vbónge, wàe. Vtv̄ngshaq vpǿ we rvlogwìngshíng tiq chv̀ng lá lún bǿà kvt nø, div̄m nø ang vdá we í dv́ngte nā:mò nø wechv̀ng wv̄nshi bǿì, wàe.

Vpø’ íwe pèmè vnvmchvngmaq,
Vdá dv’ngte nvmò we

Gvzà ring we vpø’ svng lúnlvm dvpvt, Kashvbóng mzvshøl taq vbá we Vsvng vní(2) gø’ nø, àngde í lúnò lòng svng nā:mshìe. Gvray Mongkà kèní Nøngmaq kaq svng shvdøm we taq, Mònggvn pøshí pømèrì shvngbe mvdvm té vtv’ng ring vtv’ng Vpø’ nø, Gvray gvsang móngdàn íe, wā shø’n yangì. Kashvbóng mvshøl yv’ngkèní vsvng (2) pè nø, àngnií lvngà í láò we Vpø’ svng lá lún bø’à dvgvp, dvbù Nøntshøm we í lo a:mì nø, zí v-du we gvmsung svng zíò sórí wvnshìe. Àngní lvngà ínø Tiqdvng vsvngrì yv’ngkèní dvpø màdá lùshì we mà-vl. Tiqdvng vsvngrì kaq svng yùmvm we gø mà-vl. Svre dvkut nø lùshì we gø mà-vl. Àngde taq vl lòng nā:mò we í téwa shvla lòng vpø’ lòng svng wvnshìe. Yalòng nø, v-du vbóng dø àng dvpø’ svng zí ra dang dvtánò tvrà íe. Nøngmaq shvngbe svng gø shèdø’mì we móngkà íe.

Shvbóng Shi Ra

1 Koqkvm Kàru taq, Solomon nø Gvray gvsang shvrúng dø Vjú røt shìe. Na, Ngà nøngmaq nø Solomon ladvng í sha nìnø, Pàlong røtshì mvyø’ íe mà? Du gamzø vya mø-í ni, Vdá mvgam lvm mø-í ni, Ja gvmsung mø-í ni, jór lúnlvm tvrà rì dang taq wā téka røtshì sháìe! Shvlalòng nvng mvgvmlòng svng rvwíng shálv’m zitnøt, v-du vbóng dø vtuk dø kaciq rvt lúnlvm vzàm rì svng nøngmaq ni vrvm zø’m dv’ngìe. Solomon Koqkvm nø Paqzi pvnya zitnøt svng røtshì rvt, Paqzi pvnya zitnøt svng vtoshì lún yangà. Wè mvdvmø Vdá mvgam nø vl lúnshì lvm, lvpat gø’ngzøl nø bøngshàng lvm nvng jór lúnlvm gø Gvray gvsang í dvtut Shvmv’nà yangà.
Nøngmaq gø Gvray yv’ngkèní Shvmv’n jèjú Gønpaq rì svng Nønt shvgup Nønt, zitnøt, Cìpshì nønt taqkèní røtnímshì lúnlvm, gvzàni vchvkngè. Wervt vpø’ íwe pèmè vnvmchvngmaq, Ngà wàwe Nønt mvsøn vjang laqyàrì svng dvsher nø, gùn dvtøp lún we Nønt mvsøn vjang laqyàrì taqkèní mvng Gvray kaq røtnímshì nø tvleshì laqlúnì!Vrá, muqlàng móngdàn nø, rvlogwìngshíng shvlá láò we wulaq wa vsvng nvng vbónge. (Mt 13:45).