Vkangpè Yesuò Vshé mvsøn nvrøm Bóy (Feast of the Sacred Heart)
Shóngshø’ng we pèmè vnvmchvngmaq Ya lvban nø Vkangpè Yesuò Vshé mvsøn nvrøm mvré zā Mvkok dvdí shóngnønt svng vpø’ shvring we bóy lvban àngni gø íē.
“Vgo mvcí í shøn Kà nø vlíng vpō sháò nø, Mvsøn nvrøm vdòng kèní shøn Kà nø nvnnvn dvdvmshì nø màlíng”wàe.
Mongkà ciqrì;-
Bungam 19:2-6
Roma 5:6-11
Mati 9:36-,10:8
Vpø’ íwe we pèmè vnvmchvngmaq, Ya lvban nø Vkangpè Yesuò Vshé Mvsøn nvrøm mvré zā Mvkok dvdí shóngnønt svng vpø’ nø shvgùn shvring we bóy lvban àngni íē.
Mati 9:36-,10:8 vdòng svng dvdvm vjáng taqsórí nònggùn zí mvyøng we taq;- Na, Ngà Nøngmaq shvngbe nø Gvray gvsangí dvgøò we, pvn mvn we Hang taq dvgvngcerì íshàe. Dèni talúnì we Gvray gvsang móngkà nø Bāsha vsvngrì Àng kaq vwvngshi lúnlvm rvt dvzaq dvkvngshì we taq, “Mvjòr” walòng mà-vl we Vkangpè Gvrayò Mvkok dvdí shóngnønt Mvsøn nvrøm Hang gømlā rì svng chaqdvp dvtánòe. Bungam Mongkà taq , Israel dvcirì kaq Vshuq lvpat taqkèní shvlutnò nø Gvray gvsangò angcø angcè rvzvngcerì wáshì lúnlvm Gvray Mongkà svng tashì lúnòe. Dvzvr Polo ígø, tùbùm dvbvng ra, dvgø’qshì ra , vlømshì ra màda we vsvngrì kaq svng chutchvng we taq, shvt vhø’m bø’à we Vkangpè Yesu Kristuò tvrà svng vrá tiqkvt dvtánòe. Yadang svng Mati dvbùshang Mongkà taq gø Vyvng roqshú màdá íwe vsvng loksokrì mvdvm Mvkok dvdí shóngnønt vl we Vkangpè Yesuò mvré zā shóngnønt lòng svng dvtánò tvrà yv’nglúnshìe.
Langda me nø Angò chékùngí angcèrì svng roqgar vsùngò pàdø , Vyvng roqshú ígø tiqnønt tiqmvyung wáshì dvzvr we í mvshøng we sønrìp tøm kaq svng gōè, yadang síngràl lúnì Gvray nø nøngmaq Bāsha vsvngrì nvng tiqdø rvtø vrvm nítvp dø vl mvyø’è, walòng svng shvlá wace síngràl lúnlvm vlē. Bāsha vsvngrì nø Gvray vdòng kaq vrá vtv’ng lvm lòng taq Àng shóngshì we Angce pè taqkèní Svngzace ku shvléshì nø shvt vhø’m bø’à we tvrà svng nøngmaqí síngràl lúnì nìnø Bāsha vsvngrì mvdvmø gvlshì we Gvray gvsangò Shóngnønt lòng nø bé á:mì wàwe mà-vl walòng svng yv’nglúnshìe. Vsvng shvngbe nø Vkangpè Gvray kaq vwvngshi lúnlvm nvng Gvray gvsangí nø Angò Mvkok dvdí shóngnønt dvnùng mvnggá vdòng taq Bāsha vsvngrì, rvzvngcerì shvngbe lúm lvm dvpvt dènio Gvray gvsang móngkà jømciqrì taqkèní gø ègō íē.
Dènio Gvray dvbùshang Mongkà taq rvmá dvmu taq bvnlì wà vsvngrì téwa lúnlvm dvpvt go we wā mø-í nø, Àng nvng tiqdø Dvbùshang bvnlì dvnùng lvm dvpvt, Dvzvrì kaq svng go nø rvcv’ng taqsórí bvnlì tvlèo dang tálún shìe. Yalòng Dvbùshang bvnlìrì taq Na nvng Ngà nøngmaq shvngbe í gø lúnì dv’ngte vpnóng tvleshì lúnlvm, síngràl dvdvm lún we í Cúnshì we Gvray gvsang móngkà taqkèní Pvlàcè kvmnønt nònggùn kūnga lùshì laqlúnì wvng dvshat nø nònggùn zí mvyøngè.
Vgo mvcí í shøn we Kà nvng Mvsøn nvrøm vdòng kèní shø’n we Kà nø pàlong, dvdvm lvm shøn lvm ra íe?
Vgo mvcí í shøn Kà nø vlíng vpō sháòe, Mvsøn nvrøm kèní shøn Kà nø màlíng.
Vgo mvcí taqkèní shø’nshì Kà nø shø’n dv’ng í vnáshìe, Mvsøn nvrøm kèní shø’nshì Kà nø shø’n dv’ng í Mvsøn nvrøm vdòng taq dvdvmshie, ngámshìe, Angdèo lvpat taq vhø’mshì Kà rì, Vpø’ vtv’ng Kà rì, Dvshà zā, mvré zā shóngnønt laqyàrì , Vrá nø Mvsøn nvrøm vdòng kèní bung ra we Kà svng shø’nshì yv’ngkèní Tiqdvng vsvng dvpvt dvbù Nøntshøm lòng svng zí lúnè, Mongzøl lòng svng zí lúnè.
Shóngshø’ng we pèmè vnvmchvngmaq, Nøngmaq ni vrvm Cúnshàì lvpat taq shø’nì we Kà v-rvm nø gvzà vpø’è walòng svng Mongkà taqkèní yv’nglúnshìe.
Téwa nø angpè angmèmaq ínø angdèo angcø angcèrì kaq svng mvtv’n mvdaq, lvsha wáshì lvm pè (mø-í ni) vgi wáshì lvm pè wàì nø tiqkvt kvt Angpè Angmèmaq taqkèní v-dú v-nà shø’n sháìe. Yadø íwe Kà rì svng shø’n mvdaq wā Mongkà taqkèní gø shvngøt dètú íe. Pàwálvm wàni, dèni tashì lúnì we móngkà taq Nøngmaqí shø’ni we Kà nø jèjú ìshøt vbáè, Dìngmanè, Sher we Kà nø Tiqdvng vsvngrì mvdvmø vjú zílúnè, walòng svng Mongkà taqkèní yv’nglúnshìe.
Wervt shóngshø’ng we pèmè vnvmchvngmaq, Nøngmaq ni vrvm Cúnshàì we lvpat taq Rvtø vrvm pvrvnì we bvnlì tiqlòng vbáè, wèlong nø pà lòng i mà? wā èshøn lúngò dvgvp … Yúmvm Nønt mà-vl vsvng nvng Dìngman lòng svng shø’n lún gø’ nvng nahømvm dvgvp,… Lvpat taq vlíng vpō lòng lúnlvm vlē, wà Kà íe.
Wervt shóngshø’ng we pèmè vnvmchvngmaq, Ya lvban vdòng taq nøngmaqò Pvlàcè dvpvt Mongkà tiqkàce mvsøngshàì nø nònggùn lùshì lvm wàì. Wè Kà nø Nøngmaq ni vrvm shø’ni we Kà v-rvm taq jór nònggùn vl nø Dìngman we taq Gvray gvsangò jór pòngbang Jèjú gømlā rì , shvkse rì wáshì lúnlvm vlē, walòng svng dvdvmì taqsórí Pvlàcè kvmnønt nònggùn kūnga lùshì laqlúni.
