Shvrúngshú kønmvn bv̀nlì døngjá nø móng lvmvng mvdàm mònggv̀n vsvng døngku rì kaq tubúm dvbangā we bv̀nlì døngjá íràwe
2026 April 27 ni taq Pope Leo XIV taqkèní Pontifical Ecclesiastical Academy ò 315 nǿng gøm àngni lvmvng svng di nø Shvrúngshú kønmvn rìò bv̀nlì døngjá dang dvtú bǿà we íe.
Kristu vdòng tiqnøt tiq mvyù:ng wáshì ràwe (Unity in Christ)
Weni lvmvng tvyø nvng singnø̀ mvshǿl rì mvdàmø oqà wawe kà shǿn vtàn bǿà we íe. Mònggvn móngdàn vrv̀m kèní kø̀mngǿm ráì we shvrúngshú rì dvhø Kristu vdòng taq tiqnøt tiq mvyù:ng wáshì we nø kù:ngà tiqlòng íwe dang dvkám bǿà we íe. Wedøni vrv́m vrá we nø kønmvn mvdò dvpvt kámnøt tvràò svkse tiqlòng ku gømla íwe svng vtàn bǿà we íe.
Nøt mvsø̀n vlíng vpo we nvng Laq yà (An exercise in conversion)
Academy ò dvrá uqbvdi, wulaq tvrà nvng móng lvmvng dvtú we tvrà rì vlíng vpo shìráì we ínìgø pvlacè dang vlíng vpo we tvrà nø téwa vchvk mvdø̀ng tiqlòng íráì we dang dvtú we íe. We Academy zùng svng dvkám we tvrà rì taq vsvngrì kaq mvsø̀n vnàí táā we tvrà nvng nøt krǿm mvngushì we tvrà nø vchvk mvdø̀ng íwe dang dvkám bǿà. Kámnøt tvrà, dvbùshvng tvrà taq cipshì we nvng nøt mvsø̀n mv́ngshèr we tvrà kèní àngnvm àngchvng mvdø̀ng nøt kèní vzø̀m lv́m vchvk we dang dvkám we íe.
Mvshǿl rì svng dvtanā we dvzàrì (Bridges that shape history)
Svrabín koqkv́mpè taqkèní kønmvn shvrúngshú rì kaq Yesu zun lú:ngì we mòngzø̀l we shvngkà svng dvsherā we vsvngrì ílv́m dvkám we íe. Mònggv̀n vsvngrì dvhø̀ shvrv́m shvráshì nø̀ vrashì we tvrà rì, vlǿm ràrì vmv́ng ráì we dvjà taq mòngzø̀l we shvngkà svng zílúnwe vsvngrì bǿnlún lv́m dvzaqshì ràwe dang dvkám bǿà we íe. Kàngpè Gvrayò ìshøt jejú rìnø bashàrì dvpvt mvshǿl rì nvng shìwvt rì dvhø̀ dvzàrì nvng tvrà dø wáshì ràwe dang dvtú we íe.
Kristuò dvsháza shóngnøt gømla (A sign of Christ’s love)
Mònggv̀nò kønmvng rì nø Kristu wawe døngmvn tvrà svng cvn dvgøm lúnwe vsvngrì írà loonge. Kønmvng tiqgǿ wawe nø Kønmvng gvsa shì mvbø̀n dvgvp kèní vyv̀ng roqshú (Pastor) tiqgǿ bø̀nlv́m vchvk we íe wanø̀ dvtut dvkám mòngkà vtàn bǿà.
Vdu vbóngwe dvrá svng dvhà:ngò we vsvngrì (Promoters of Justice)
Shvrúngshú kønmvng bv̀nlì wawe vsvngrì nø Catholic shvngø̀mré tiqlòng dvpvt wa mǿí nø̀ mònggv̀n vsvng dvcìrì shvngbe dvpvt bv̀nlì wárà we dang dvkám we íe. Vsvng shvngbe taq kǿlshì we Kàngpè Gvrayò bv̀ngzì svng dvgùng dvtanā lv́m vdu vbóngwe dvrá svng dvhàng lv́m dvzaq shì ràe wanø̀ dvtú bǿà we íe.
Vsvngrìò dvgùng svng roqgvrā we vsvngrì ( Guardians of human dignity)
Tasvng vzīngwe, vzi vrùngwe shìwvt rvmè vkǿnwe mònggv̀n taq tiqkvt vrá shvrv́m shvrá shìlv́m tvrà rì nø tiqkvt kvt vhúng íe wa lánshì we ínìgø vsvng dvgùngrì svng roqgvrā we bv̀nlì nø vpǿ ring vtangwe bv̀nlì tvrà íwe dang dvkám we íe. Dèni vbat mònggv̀n dvjà taq mvjàn rì vkǿn we dvjà mvdàmø v́l vdu we ínìgø tiqdv́ng vsvngkaq mvsø̀n vnàí táanø̀ shvbóng shvmvtshì, shvrám shvrá shìlv́m tvrà svng vrang dvzaqshì ràwe dang mvdø̀ng mvdaq dvkám bǿà we íe.
