Kàyvng màyvng evlnøng we pèmè vnvmchvngmaq shvngbe mvdvm Gvray mongzøl lòng laqtuqdaq! Shvngbe svng Pamvra.

Dèsháng Pvlàcè nònggùn lùshì lvm Gvray móngkà nø Yohan 14:1-6 vdòng taqkèní íē.

Shóngshø’ng we pèmè vnvmchvngmaq, Yohan 14:1-6 vdòng svng dvdvm vjáng taqsórí nònggùn zí mvyø’ we taq;–

Nøngmaqò Lvpat taq vhø’m v-du we yvklvmrì ínø, nøngmaqò Nønt mvsøn vdòng mongzøl lòng svng dvsher shvmv’ngò høqshaq Nønt dvshá v-du e mà? Jø’ngjøng èshøn lúngò dvgvp mvhøtlvm lòng nø yíl màshvla, vsvng gø’ v-rvm taqkèní vhø’m v-du we tiqlòng íe. Vkangpè Yesu Kristu gø Vpè Gvray kaq lō á:mì dvgvp Dvzvr rì í vhø’m v-du we yvklvm rì svng shálúnò rvt Ang búng á:mì lòng nø, lvmboqrì mongzøl dø vl lúnshì lvm dvpvt le ídang nvng Gvray gvsangò Noqngøm tøngnu taq àngmaq dvpvt vl ra dvgø’à lvm í dang, dvkv’m nø shø’nè. Muqlang nø nøngmaqò lvngdøm mvnggá íni , wè yv’ng svng nøngmaq kadø wā dì lúnlvm mà? Dvzvr Toma nø Tvrà màshángò wā shø’n dvgvp Vkangpè Yesu shø’nè, Ngà nø Tvrà øngà nø, Dìngman we Dvrá nvng gønshaq gø øngàe, wā shø’n yangì. Vrá nø, Dvmu bvnlì wà vsvngrì svng roqgar we Shànshér pè St.Joseph gø, lvpat taq Kà taqkèní wā shø’n we mø-í dø, Døngman dø, dvzaq dvkvngshì nø Dvmu laqmu rvmør we bvnlì svng wàò we í Shànshér we Gvray døngku Yesu , Maria svng roqgar tùbùm gø’ íe. Nøngmaqò lvpat taqgø Tvrà màman dø Gønshaq tvrà íwe Kristu mèpvng cvnì, Àng nvng mà cār dø cvnì taqsórí, Døngman lòng svng lá lún nø, dvciq lvpat Gønshaq svng angkang wáshì lúnlvm rvt dvzaq dvkvngshì laqlúnì wvng dvshat nø nònggùn zí mvyø’è, shvngbe mvdvm Vkangpè mongzøl lòng vtoshì laqlúnì. Shvngbe svng Pamvra!