Shvngbe svng Pamvra! Dèsháng vrá Pvlàcè nònggùn lùshì lvm Gvray móngkà nøMarko 16:15-20 vdòng taqkèní íē.
Vpø’ íwe pèmè vnvmchvngmaq Mongkà vzàng røshì lvm wàì.
Kàngpè Yesu dvkv́m kà
A:ngí angmaq svng, “Namaq nø móng døngtáng svng èdìnøng nø, svng pv̀n í dv́ngte svng Dvbùshv̀ngkà dèshvng bǿnøng. g 16 Kv́m nø tìløp løpshi gǿ nø gø̀nshaq chutchv́ng lúne; mvkv́m gǿ mv̀ng nø kàngé we vhǿmlv́m íe. h 17 Vrá, kv́m vsvngrì svng nø shálv́m mvshv́lpvrá yadv́ng pà:ní cv̀n lú:ngòe; Angmaqí nø Ngà bø̀ng kèní cángrì lùng bǿòe; dvgá pv̀n kà angshv́r gø angmaq shø̀n longe; i 18 Bø̀ svng angmaqí zø̀:mò nìgø, shì rā pà mvtøq pvla tiq pv̀npv̀n angmaqí aq vdu nìgø, angmaq kadø gø mø̀í long. Vrá, zarì mvdv̀m angmaq wur hapshì kvt nø zarì ban longe,” a:lòe.
Yesu muqlàng kaq rvlv̀ngám we
19 Vkàngpè Yesu nø angmaq svng kà shø̀n dá:ngí, Ang nø muqlàng taqlap svng tv̀m vbun bǿà nø, Gvray vbàng pa yv́ng rúngá:mì. k 20 Wekvt coqcv́nrì angmaq búngl á:mì nø, kayv́ng màyv́ng mvshǿl dvshvng bǿà. Vkàngpè gø angmaq nvng tiqdø bv̀nlì wa nø, angmaqí dvsha:ngò we mòngkà nvngnvng shálv́m gømlā dvzà:nò weí shvkse wàò nø shvdøng shvngà:ngòe.*
Vpø’ íwe pèmè vnvmchvngmaq, Marko nø Dvzvr Piter rvt rvzvngce bø’n lúngì. Yerusalem mvring taq vl àngo Chøm nø rvzvngcerì vtu vre dvki vhø’mò rvtø rì taqø shvngømré rvzvngcerì mvzøq mv-ngūshì shvra í a:mì. (Dvzvr 12:12) Marko nø Roma myoq kaq Dvzvr Piter ò rvmnvng ku cvn lúngì nø tvpmò we í tong rúng yangà. Angí nø dvbùshang Mongkà svng Roma myoq taq vrù yangà. Dvzvr Piter i shvngøt dvtú cvnà lòng taqø mvdøng dì nø vrù yangà. Dvrá móngkà rì dvshvngò rvt lúngtàng mvdvmø vtu vre gø vhø’m yangà. Tong vdòng yv’ngø Vkangpèo Lvmik gømlā rì svng yv’ng lúnò we í dvbù Nøntshøm lvm rì vhø’m yangà. Marko ínø Mongkà dvshvng we wa mvtaq Kàru vrù taqsórí gø Sasvna bvnlì wà yangà.
Vpø’ íwe pèmè vnvmchvngmaq, Nøngmaq gø’ v-rvm taqkèní gø witness ku vl nø lvpat taq shvbóng shvmvtshì ra cúnshì taqsórí Sasvna bvnlì wá ra íe. Shvla vtv’ng Nønt mvsøn, vjang laqyà, dvshá zā dvtit tvle we shóngnøntní, Nøngmaqò lvpat taqkèní Kristu svng hang mvshøl dvtàn nø, Shvkse wáshì laqlúni wvng dvshat nø nònggùn zí mvyø’è.
