Shvngbe svng Pamvra! Dèsháng vrá Pvlàcè nònggùn lùshì lvm Gvray móngkà nø Yohan 6:52-59 ciq vdòng taqkèní íē.
Yesu nø Gø̀nshaq Zidòng í We
Wervtnø̀ Yuda vsvng rì nø tasv̀ng vzø̀ng sórí, “Yapèí kadøwa Ang sha nø nøngmaq svng dvkélv́m èwàì má?” wae. b 53 Wervtnø̀ Yesuí yadø a:lòe. “Ngàí kàdøng v̄la:tnìni, namaq nø Vsvng Angcè pè Ang sha mèkénøng, Ang shvwi mèaqnøng nìnø namaq vdòng taq gø̀nshaq màvl. 54 Ngà sha ke nø Ngà shvwi aq vsvng wegǿ nø dvciq lvpat gø̀nshaq v̄le. Vrá, tìsi lv̀ngdø̀m ni taq Ngàí wegǿ svng dvzunlv́m íe. 55 Pàwá wani Ngà sha nø v́mlv́m mvdø̀ng íe; Ngà shvwi gø aqlv́m mvdø̀ng íe. 56 Ngà sha ke nø Ngà shvwi aq vsvng wegǿ nø, Ngà vdòngø v́l dø̄ng nø, Ngà gø ang vdòngø v́l dønge. c 57 Cúnshi pè Vpèí Ngà svng dèzv́r dakngà nø, Vpè taq kèní Ngà gø cúnshø̀ng dø tiqdvchá, Ngà svng èvm we wegǿ gø welòng døni Ngà taqkèní cúnshìlv́m íe. 58 Yalòng nø muqlàng kèní la daqà we zidòng lòng íe. Nvkop nvkàng maq nø Manna v̄m nìgø shì yà:ngì. Inìgø zidòng yalòng vm gǿ mv̀ng nø dvciq lvpat cúnshìlv́m íe,” a:lòe. 59 Yadv́ng pv̀n nø Yesuí Kapernum mvrìng júrøt chø̀m taq shvngø:tnò dvgvp shø̀n yà:ngà rì íe.
Gønshaq Muk íwe Vkangpè Yesu Kàgvp Sacramentu nø Nøngmaq kaq svng Kv’mnøntní Kristu vdòng taq Døngman dø tiqnønt tiqmvyung wáshì dvzvr nø Vkangpè Yesu í wā Dvciq lvpat gønshaq zí lúnè. Yuda shølshú vgo rì í nø Vkangpè svng vtuò dvgvp Vkangpè ínø Àng shing nvng shvwi svng màv’m mvdaq vm-aq nø vtoshì lúnlvm rvt vchvk dang dvkv’mè. Vkangpèo Kàgvp Muk nø Rvgaqtøm taq vl, vm-lvm Vmpà rì nvng bvtut màbóng. Pàwálvm wàni yalòng Gønshaq Muk taq Kv’mnønt kèní Kristuò rvnaq we vpø’ we móngkà rì vbá rvt íe. Vkangpè Yesu Kristuò chutchvng lòng mvbø’n tvrà shvngbe jø’ngjøng bungá:mì lòng rvt mà-vl mvdaq vl Ra lòng nø Kvmnøntnì íe.
Vkangpè Yesu Kristuò Kàgvp Muk taqkèní àngde kaq svng Kømzøp dø zílún lòng, té vtv’ng vm-aq vnatshi lòng svng nøngmaqí síngràl lún ra we íe. Yalòng nø shóngnøntnò Shvkse í lòng mvdvmø, Vkangpè Yesu Kristu Kàgvp svng vtoshàì we nøngmaq gø’ v-rvm, wè shóngnønt lòng svng tiqdvng vsvngrì kaq tiqdvtang dvtit tvle lúnlvm rvt ègō ì lòng svng vtoshì lúnìe.
Yalòng Kàgvp Muk taq Vkangpè Yesu Kristu jø’ngjøngni vl rvt Lvmik gømlā rì mvmè Mònggvn taqø bø’n bung we íe. Nøngmaqí gø jø’ngjøngni gvzà vpø’ shvring sórí Kv’m nø vlømshàì nø Vkangpè Yesu Kristuò Kàgvp Sacramentu lòng svng vtoshì laqlúnì. Nøngmaqò lvpat taqkèní gø Dālvm lvmik gømlā rì svng Vkangpè í dvtán we jèjú ìshøt rì svng vtoshì lúnlvm vlē walòng svng gø Kv’mì taqsórí Pvlàcè kvmnønt nònggùn kūnga lùshì laqlúnì shvngbe svng oqā.
