Shóngnøt kùlwàng(Family Program)

Shvngkà tashàì we vnvm vchvng maq shóngnøt vzøm we vnígø nø døngku shvzønshìe wawe nø àngníò shóngnøt vzøm nø tiqchøm tiqgóng svng vrangshì we tvrà íe. Wedøni shaqré shaqtangrì taqkèní nøt vráwe tvrà taqø dvkømnø døku shvzøngāwe gø vlwe íe. Welòng nø kadø vsháy we tvrà ímá?

Døngku shvzøngshìe wawe tvrà nø shóngnøtò nvmlat mvpvng gø íe. Nøngmaq cúnshàì we mònggvn yachvng dvpvt nvmbat 2 vchvk vtang nø shóngnø íe wanø kàru rì taq vtà:nòwe gø yvnglún shìe. Vsvng gø vrvm nø shóngnøt walòng svng lún mvyø we vsvngrì wa íe. Vsvngrì ò shóngnøt svng vtoshì mvyøe we shóngnøt nø pvnyvn ngàngdøng dvzvr mvyøe. Tiqkvt kvt shóngnøt cvmri welòng nø rvtø àngdongcè taq dvtvm nø vcvtvmwe gø gvzà vlwe svng yvnglún shìe.

Àngpè, àngmè, shaqré shaqtangrìí dvdutnø døngku shvzøngāwe døngkurì taqgø tiqmaq nø we døngku shóngnøt vzømnø mòngzølvmwe døngkurì gvzà vlwe døni tiqmaqnø vcvtvmwe gø yvng shìe. Welòng nø 2 gøò shóngnøt nø tiqlvp kèní vcatvm we rvtø kèní pvngshì we tvrà íwe svng yvnglún shìe.

Shóngnøt wawe taq nøt mvsøn tiqgóng kørshìrà tiqlòng ku gø íwervt vdèò rvjà, shóngnøt vzømwe døngkupè/mè nvng gø rvtø vrvm shvrvm shvrá shìlvm, nøt vto kelvm, síngsháā kelvm wawe nø shóngnø kùlwàng tiqlòng ngàngdøng lvm dvpvt laqni vchvk we íe.

Shóngnøt waweò kù:ngà nø mònggvn taq zaq vtangwe nòngwòn kù:ngà gø íe wanø shønkà vlwe íe. Shóngnøt walòng taqkèní pàgø wádáng shì we íe. Vsvng tiqgø kaq shóngnøtí mvrà chutā lún we dø shóngnø kèní dvzøm dvzi we, mvkok dvdí we tvrà shvngbe svng wálún we íe.

Wervt shóngnøt kùlwàng walòng døngku vdòng taq tiq dvciq ngàngdøng lvm dvpvt wawe nø tiqgø nvng tiqgø, døngkupè døngkumè nínø kadvgvp gø shvrvm shvrá shìlvm, nøt vránø vzøm lvm, síngshá kelvm, bvnchvtrì vrvm taq vrashìnø nøt vzøm lvm nø mvdøng íwe rvt døngku vdòng taq tiqgø nvng tiqgø tasvng kà táā kenø shóngnøt kùlwàng vdòng taq ngàngdøng dø vzøm lúnlvm dvtit tvle we yayvng nvr:ngòe, shvngbe kaq svng oqà