Valenkanni koqkv́m mè bóy àngni lvbán

Christu vdòng taq shóngshø̀ngwe pè,mè, vnvm vchvngrì dèni September 8 ni taqnø Catholic shvngø̀mré vdòng Valenkanni koqkv́m mè svng dvgùng shvring we bóy àngni wáshì we gø íe. Ya bóy àngni taq nø mòngzø̀l we tvrà ò koqkv́m mè wawe Valenkanni wamà taqø vtán yv̀ngì we Mari koqkv́m mè kèní ìshøt jejú rì vtoshì lv́m dvtit tvle vjúrøt shàì we àngni gø íe.

Nøngmaqò Myanmar móngdàn vdòng taqø gø cvn cvn cø̀mcaq mòngzø̀l lòng laq tuq ra wàì nø gø vjúrøt lv́m wàì. Valenkanni Mari koqkv́m mè svng nø vsv̀ng dvcì shvngbe taqkèní vpǿì we, shvring vpǿwe koqkv́m mè gø íe. Pàwálv́m wani Lòngzàpè Yesu nvng mònggv̀n vsv̀ngrì dvhø̀ taqø dvzà tiqlòng dø wáshì nø ìshøt jejú rì dvtit tvleā we nvng èrøtāì we rvt íe.

Dèni ò yabóy taq nøngmaq Myanmar móngdàn vdòng v̀lì we móngzøngcè rì ò dvshà mvhøt we tvrà rì, nøt yòl lv́m tvrà rì shvngbe nø mvjàn rì shvngbe zø̀mvm nø mòngzø̀l we tvrà svng vpo lv́m, Kanan kùngrán bóy taq vtì yv́ngkèní svbiq vpo dø mv́n dvzv́r we àngmè ò vsv̀ngrì mvdàm dvsháza shóngnøt kèní røtním shàì we àngni gø íe.

Ya bóy àngni taqnø nøngmaq taqkèní àngmè Mari nø ìshøt shvleā shú tiqgǿ ku vpǿ shvringì wewa mǿí nø̀ kámnøt tvrà, shø̀ngran rì, shvdún mvlúnshì we dvsháza shóngnøt zø̀ngwe Mari ò lvpat tvrà svng dvdam dvtøp nø cvn dvgøm lúnlv́m dvpvt gø íe.

Dvløt gvzàm we tvrà rìí wa vkǿnwe nøngmqaq lvpat taq àngmè Mari nø nøngmaq dvpat kùnga/ nvng gálòng jejú gø íe. Velankanni wamà taq dvshá mvré íwe cv̀mrécè tiqgǿ taqkèní àngmè Mari svng nvngwànong zíò we yv́ngkèní nvngwànong vtì shvyǿā ò we høqshaq luqpø̀n we ìshøt svng vrá shvmv́n dvgǿngā ráà we màná dø̀mrø svng yv̀ngì nø àng svng vdè taq rà vchvk we shvnmv́n jejú rì shvmv́nā lv́m dvtit tvle vjúrøt dvzaq shàì.

Àngmè Mari nø àngyv́ng svng dinø røtshì ra vsvng kagø kaq ínìgø vtiqò we mv-vl, àngyv́ng divm we vsv̀ng tiqgø nø kadvgvp gø nøt dvt nøtcv̀n lv́m mv-vl nø Gvrayò shvmv́n jejú rì vtoshì lún dvzv́r we dang shvkse dvtanā we bóy àngni gø íe.

Marií Gvray kaq shvrī:ngò we (Luka 1:46-55)

46 Wekvt Mari nø yadø wae: “Ngà dòngnø:tní Vkàngpè svng shvrīngòe. u 47 Ngà pvlàcè gø ngà Chv́ngkàngpè Gvray taq dvbònge. 48 Kadø íe wani màpǿng we Ang vshuqmè svng A:ngí yv́ng ètv̀mvm bǿngà. Eyv̀ngnøng, akvt kèní kukaq mvrīl nø mvrīl vrà:mí ngà svng, ìshøt ìgv̀n lún mè, èv̄l longe. v 49 Kadø íe wani nònggùn jòrpè A:ngí nø, ngà dvpvt rīng we bv̀nlì èwv́ngāng bǿngà; Ang bø̀ng gø shànshére. w 50 Ang svng vpǿ svre vsvngrì kaq nø, mvrīl larīl A:ngí dvsházāòe. x 51 Ang wur nònggùn kv́ng we bv̀nlì A:ngí wà bǿà. Shvrīngshì rì svng nø, A:ngí dvkāng bǿà. y

52 Dùgàmzø̀rì svng nø øpkv́ng rúngtv̀ng kèní dvjáò nø, cipshì rì svng mv̀ng A:ngí shvri:ngòe. z 53 Svrí shìrì svng nø gv̄m we v́mpàí dvkāò nø, mvgàmrì svng nø A:ngí vhúng shvlō bǿà. a 54 Nøngmaq vkop Vkàngmaq svng dv́n yà:ngà dø tiq dvchá, A:ngí nø Ang vshuq Israel svng dvbvng daqà. b 55 Abraham nvng ang dvcì cèrì svng dvciq lvpat Ang dvsházā nøt dvtan daqà,” wae.

Marií Gvray kaq shvri:ngò we taq Gvrayí nø cipshì vsv̀ngrì kaq shvri:ngò we, shvnip shvnvr vhǿ:mò vsv̀ngrì kaq shvlut we dvsháza bv̀nlì rì wàò we dang svng dvdvm lún dvzv́r wegø íe.

Marì nø Elizabet yv́ng di we (Luka 1:39-45)

39 Wemèpvng nilaí Mari búng nø, Yuda rvgaq shigùng móng tiq mvrìng svng cancan dìá:mì. 40 Zakaria chø̀m svng ang gòngá:mì nø, Elizabet svng pàmvrà a:lò nø dvhø̄mshìe. 41 Mari pàmvrà wa kà svng Elizabetní tá bǿà chàng, ang góng taq cv̀mré gǿ chóngshì lú:ngì nø, Elizabet gø Shànshér Pvlàcèí dv̀nzø̀ng taqsórí, r 42 shaqmèí shø̀n we nø, “Svmarérì í dv́ngte dvhø̀ taq nàí nø ìshøt ìgv̀n èlú:nòe. Nà góng taq vl we cv̀mré cèí gø ìshøt ìgv̀n lú:nòe. s

43 Ngà Vkàngpè angmè ngà yv́ng svng tùng di høq nø, kadø í nø yadø nàpǿngvtnà ma? 44 Ku, nà pamvra èwā kà ngàí tángò chàng, ngà góng taq v̄l we cv̀mré nø dvbùnø:tní chóngshì lú:ngì. 45 Vkàngpèí ang svng shø̀n daqà kàrì shvngbe nø vhø̄m longe, wa nø kv́m we svmaré yamèí mv̀ng ìshøt ìgv̀n lú:nòe,” wae. Wanø rà vchvk we vsvng kaq dvzømshú shvlá tiqgǿ wáshì we dang vtàn ráà we íe.

Wedvng svng yv̀:ngì nø vdè shvnvng gùr gùr rì taqgø dvzøm mvkok lv́m rà vchvk we vsv̀ngrì kaq mvkok dvzømā shálv́m tvrà svng gø shvdǿmā we íe. Tiqgǿ nvng tiqgǿ tasv̀ng nònggùn vzí kewe, dvzøm mvkok we tvrà rì nvng dvshaza bv̀nlì tvrà ri taq dvzaq shìlv́m cvnā we nvng shvdǿmā we gø íe.

Kana rvwá zvmì shvzøng bóy

Wekvt bìmtì dvbévm daqà dvgvp, Yesu angmèí nø Ang svng, “Angmaq bìmtì béaá:mà,” a:lòe.

Yohan 2:3 . Yalòng jømciq vdòng taq àngmè Marií nø vsv̀ngrì mvdàm yvklv́m tvrà rì taqkèní lutshì lv́m tvrà svng tóngā we dvsháza nøt vshøp we taqkèní mvkok nø dvbvngā we svng cvnshì lúnì we mvtaq àngyv́ng svng dìì nø vjúrøt dvzaq shàì we ínìnø jø̀ng jǿngni dvtit tvleā we taqkèní Gvray shvmv́n jejú rì svng vtoshì lúnlv́m íwe dang dvkám ráà we tvrà gø íe.

Mari nø Lòngzàpè Yesu ò wurgáng tvrà mvdàmø gø àngnvng tiqdø riwe dang

Yesu Ang wurgang shvnvngø angmè gø, angmè ang nvm mè Klopa ang chø̀mmè Mari gø, Makdala Mari gø ripme.

Yohan 19:25 wanø nøt yùr we tvrà taqgø mvréza nøt gv́lshì we, nøt shvlø̀m we taqkèní shìwvt dǿng vdòng taqgø tiqdø ripā we tvrà svng svkse dvtānā wegø íe. Mònggv̀n vsv̀ngrì ò záyv̀ng ziqyv̀ng rì mvtaq nøt mvsø̀n, pv̀làcè dang zá vtøp we tvrà taq shvzǿmā we gø gvzà yv́nglúnì e. Nv̀mløp móngdàn rì taq Lude Mari koqkv́m mè nvng Nv̀msvr móng rì taq Valenkanni Mari koqkv́m mè bø̀ng vdòng kèní rø mvtǿm shìwe shvzøm bv̀nlì rì nvng nvmik gømla rì dvtan ráà wegø íe.

Dvshà mvhøt we vsv̀ngrì kaq tubúm dvbv̄ngā lv́m, vjúrøtā lv́m wáā lúnwe vsv̀ng nøngmaq tiqgǿ vrv̀m nø bǿndaq we vsv̀ngrì wani íshàe. Wedø íwe ìshøt kù:ngà rì vtoshì lúnlv́m dvpvt Koqkv́m mè Mari kaqsvng dvtit tvleā lv́m vjúrøt shàì.

Àngmè Mari koqkv́m ò lvpat tvrà svng yv̀:ngì nø nøngmaqò mvsø̀n nvrø̀m rì svng gø àngmè Mari kaq apnúng shàì nø vjúrøt dvzaq shàì. Nøngmaq v̀lì we Myanmar móngdàn ò shìwvtrì zø̀mlv́m tvrà dvpvt vjúrøt dvzaq shàì. Kàngpè Yesuí vsv̀ng kaya svng shvzǿmā we bóy, bashàrì ò necì shøqā we, mòngzø̀l we jejú ìshøtrì dv̀nzø̀n we bóy àngni laqí daq. Amen!