Mvtú
Shvq bevm we rvtø̀ yalòng shagóng nø shìvm nø̀ nvr shìbøe. Kagø ínìgø tiqni rvtø̀ taq nø lvpat gønshaq vtvngvm nø̀ shagóng dvjø̀ng shìlv́m wani íshàe.
Cúnshàì we lvpvt wawe nø nv̀msvr we nvng nv̀m vlevm dvhø taqò vngvt shìwe hang tiqlòng ku íwe mǿí má?
Lvpat walòng svng kadø wa lvjøm pǿn lv́m íe má? Vsvng kaya taqkèní lvpat wawe àng lvjøm svng kàciq àngpvn pvn kèní lvjøm pǿnvtnò we ínìgø kadø íwe kàciq nø chvk íe wawe vtán mvlún shì.
Lvpat taq vdè góng vdè nøt dvshǿm shìrà wawe “Sacrifice” wawe vsv̀ngrì kaq dvzøm dvzi we bv̀nlì nøt mvsø̀n laqya wani íe wanø̀ paqzí vdè rì taqkèní vtànò we íe.
Shǿngtø̀ng rìnø calóng cacøn rì dvpat nvrshì rà nvng dvgø wáa nø vjúzí lúnòe. Calóng cacøn cèrì taqkèní mv̀ng nø shvngbe dvpvt ngø̀r ngun we mvkí shaqí yoshì nø shvngø̀rò e. Tìcè tìmè rì nø rvgaq mvdàm cúnshì we shvngbe dvpvt vjúzí lv́m dvpvt vyøe.
Nøngmaq tiqgǿ vrv̀m nø pàwálv́m vdè dvpvt wa dvdam shàì nø cúnshì lv́m íe má? Rvgaq mvdàm vlwe pv́nmv́n dvrè rì shvngbe nø àngmaq tiqpv̀n pv̀n cè dvpvt nø vjú zinø cúnshì we, vlwe wani íe.
Rvgaq mvdàm vlwe pv́nmv́n dvrè rì nø vjú lushì lv́m dvpvt mǿí nø, vjú zílv́m dvpvt mv̀ng íwe svng dvdam shàì we taq sórí cúnshì shvla we svng we dvrè rì taqkèní cvnshì shvlae. Jø̀ng jǿng taq cúnshì we lvpat wawe nø gvzà ni vpǿ nø vnvp we íwe taq “Sacrifice” wawe kà taq kadvgvp gø zǿm shvngáng shìwe taqsórí Lvpat mvtú shvlá ku cúnshì lúnlv́m vchvk:ì we íe.
