Yesu nvng Beelzabul
Angmaq nøt vdòng dvda:mò rì A:ngí sháò rvtnø angmaq
svng yadø a:lòe. “Ang nø ang vpokē we móngdàn kamóngdàn
ínìgø vcatnv̄me; angmaq nø angmaq vpōke we vsvng karvp
ínìgø vcatnv̄me, a:lòe.
Vpø’ íwe pèmè vnvmchvngmaq, Ngà nvng tiqdø mà-vl gø nø Ngà nvng màpø, wàe.
“Ngà svng mvcv̀n gǿ nø Ngà kaq vtù gǿ íe; Ngà nvng màdvkømvm gǿ gø, dvkangshú íe.” wàe.
Vkangpè Yesu ínø Nvmchàng gø lvdøvm dø, Rvgaq chang gø la vná:nshì ra dø, wálúnòe nònggùn kūnga vlē walòng svng nøngmaq ká:mìe. Ínigø Vkangpè íni nø Angò jór dvgùng pòngbang svng zā rì, dvsha mvhøt vhø’mò rì mongzøl lòng lúnlvm dvpvt lv’ngò lòng svng vkvtdø yv’nglúnshìe. Ring we Vmìng vkang vl vsvng, Dvrá Svra, Mvgàmré rì vdòng taq mø-í dø, Ang dì we tvrà taqø vhø’mò we Dānmàn vsvngrì dvpvt vjú zílúnlvm dvpvt le íe. Vkvtdø í we gømlā rì svng kayvng kèní lúnò mà? wa røt ra, dvdvm ra í á:mì. Vkangpè svng vtú v-rè shúrì í mvng nø wè jór nònggùn kūnga nø cángpèo kūnga taqkèní wàò we íe, wā dvdvmòe. Ínigø màshvla lòng svng màshvla lòng í, kadø wā lú:ng lvngutnò ni mà? wàe.
Kashvbóng..Nàmshi tiqbø’ nø angshí svng eyv’ngò we í shá lúnshìe. Wè pàdø, Cúnshàì lòng, kømzup lòng nvng Sher lòng shvngbe svng bø’n dvzvr lòng gø Gvray gvsang yv’ngkèní wā dì we íē.
Màrv’m màrá lòng, Vgàng Vkang lòng, mv-wámshì lòng yarì nø Satan pè yv’ngkèní dì lòng íē. Nøngmaq kaq svng Nønt vtøp dvzvr lòng, mv-síng mv-ràl dvzvr lòng nø, Sataní tiqlvng màlé Gvray gvsangò Gá lòng vdòng taqø Gvray kaq la vpnóngshì ra dø dvtan wá sháòe. Dvzvrè. Vsvngrì nø Gvray gvsangò angbøng svng vchvngì taqsórí mvzan rì dvbùng shá íe, mvding mvmàn dø wulaq bvnlìrì wá sháìe, dvshà vsvngrì kaq svng lù:ngìe, Nítvp vsvngrì kaq svng dvci ku, shvngømré ku vgám shá íē. Wervt nøngmaq í we rìò angshí angwut rì svng shvláwāce gùndvtøp lvm dvpvt gvzà vchvk ngè. Yadø í rì ínø, Tiqdvng vsvngrìo gønshaq svng roqgaràe mà?, Vsvng àng dvgùng rì svng vpø’ shvringà lúnè mà?, Mongzøl lòng nvng vrvm vrá lòng svng jø’ngjøngni dvnúngàe mà? wàwe røt Kà rì mvdvmø mvdøng dvnúng we taqø Gvray gvsangò gvsvt nvng Satan pèo gvsvt rì svng shvlá wā rvdoq rvwvn lúnlvm Vkangpè Yesuí shvngøt dvtú we, shèdø’mì we móngkà íe.
