“Vsvngò Àng dvpø wàwe (9) mvtú”

Vpø’ íwe pèmè vnvmchvngmaq, dèni Døngku Lvmvng Lvmvng tvyø taq nø “Vsvngò Àng dvpø wàwe (9) mvtú” taqkèní dvtit tvle nø dvshvng sórí nònggùn zø’ng mvyøngè.

Nvmlat _

1. Paqzí mv-kø’m mv-dø’p, gvzà vdá nigø Shvla lòng nvng màshvla lòng svng rvdoq rvwvn mvlúnò nìnø vshø’ng mashøng íē, wā shvdømè.
2. Ja Gvmsùng kadv’ngte vdá mvgám we í nigø, í dø’mshì Nøntní àngdeò dv’nggúng sumpoq kaq svng wā zv’ng mvyø’ lòng gø, vshø’ng mashøng íē, wā dvshatnè.
3. Gùndvtøp, dvdvm vjáng we nønt kadv’ngte vháng we íni gø, tiqdvng vsvng kaq síngà dvdvmà lún we Nønt mvsøn mà-vl nìnø, vshø’ng mashøng íē, wā shvdømè.
4. Góng Mvrshvm kadv’ngte vnvp ni gø Tiqdvng vsvng kaq vsvng dø mà dvdut, yv’ng mv-tvmvm lòng gø vshø’ng mashøng íē, wàe.
5. Shá Nønt Paqzí kadv’ngte vl nigø tiqdvng vsvng shøn Kà svng táā we, vpø’ā we mvsha nìnø, vshø’ng mashøng íē.
6. Dvmu Bvnlìrì taq kadv’ngte dvzaq dvgvngshì wàò we í nigø mvngsher nønt mà-vl nìnø yadang gø vshø’ng mashøng íē, wā shvdømè.
7. Kadv’ngte jang nø èsháò we íni gø dvshá zā shóngnønt mà-vl nìnø vshø’ng mashøng íē, wā shvdømè.
8. Kadv’ngte Du gamzø dvgùng vl gø wā, shering shì, dedutshì we nigø tiqdvng vsvngò nēci vbá we Vmpaèvm nìnø, yalòng gø vshø’ng mashøng íē, wā shvdømè.
9. Dìngman lòng svng kadv’ngte vtōngòe wā èshøn nigø, àngde shaqcvm nø kūnga vnø’n dang mvjòr lòng svng dv-tú ra dvgvp, mvshóngshì mv-wámshì nìnø vshø’ng mashøng íē, wàe.

Vpø’ íwe pèmè vnvmchvngmaq, Jø’ngjøng vsvngò àng dvpø wàwe taq Ring vtv’ng Vgo mø-í.
Tiqdvng vsvng mvdvmø dvshá zā mvkok dvdí shóngnøntní dvbvng shì we Nønt mvsøn… Vpø’ Nøntní, shóngnøntní táā lún we vna… Dvshá zā tubùm dvbvng lún we wūr… Shvla vtv’ng yv’ng nø Sher we Nēí yv’ngàlún we, Shøn kà kí nø mvtv’n Kà mvshø’n we nonggup, ya rì máng íē, wàe.

Pàwàlvm wàni Paqzí sha we vsvng kadv’ngte luqni gø Vsvng shvlá wàwe mà-vl nìnø, Dìngman we dvrá rì vmá:ng sháò nø, vsvng àng mvdò vdòng taq gø Mongzøl lòng vmá:ng sháòe, wàe. Yadang nø Nønt cun Paqzí vderì taqkèní Nønt mvsøn vjang laqya tiqgóng shvngbe vnvp dø dvzøp vtvngshì lúnlvm dvshat we móngkà taqkèní vkvtdø dvshangshì we íē. Shvngbe svng oqā.