Rvwvl nøt
Rvwvl nøt wawe nø tiq pv̀n pv̀n ò àng mèpvng yv́ngø kapà bø̀ne wawe àng mvtú svng yv́ng sháò we nøt mvsø̀n svng shǿn mvyǿ we íe. Nga ámpà svng wa yv̀:ngò nø rvhǿ svng mvyv̀:ngò we ku mǿí nø wedø íwe tiqpv̀n pv̀n taq àng mepvng lvp bø̀nwe mvtú svng cun dvtøp lún we rvwvl nøt svng shǿn mvyǿ we íe.
Rvgaq mvdàm taq kapà ínìgø tiqpv̀n ku wa tuqlong we mǿí. Jò lòng nvng mvjò lòng, vko vkáng nvng bv̀nlì døngjá dø íwe vní lvp kèní ang mvtú ku bǿn sháò we íe. Mvtú tiqpv̀n wawe àng mèpvng taq dvgá ang mvtú tiqlòng cv̀n long we íe.
Yalòng nø kapà ínìgø vdè shóngshì døwa tiqpv̀n cè kuwa lúnshì lv́m tvrà mv-vl wawe ang lvjøm gø íe. Wervtnø̀ rvwvl nøt wawe nø wedø íwe vní lvp svng cun dvtøp lúnwe zit nøt svng shǿn mvyǿ we íe.
Zit nøt nvng rvwvl nøt wawe gø màbóng we íe. Mèpvng tiq rvtø̀ taq yalòng bv̀nlì svng kadø wa vháng dø wá shvlae wanø cun dvtøp lúnwe nøt mvsø̀n nyan nø zit nøt ínø̀ wedø vháng vlún we dvtàng svng tuqlún høq ewàvt nò we rvtø̀ taq tuqrawe, vhǿm shìlongwe shìwvt rì svng shvlá vtang kèní pvran lúnwe nøt rvwvl nøt íe.
Rvwvl nøt wawe nø Pvlàcè Gvrayò jejú ìshøt tiqpv̀n gø íe. Pvlàcè jejú ìshøt lúnlv́m dvpvt nø mvrà wawe tvrà svng nvr rà longe. Wedø ínø̀wa rvwvl nøt vjǿng svng lúnshì shvlae wae. Rvwvl nøt wawe taq kadø íwe tvrà svng rvcv̀ng lv́m, kalòng nø shvlae, kalòng nø mà shvla wawe svng shvng shvng wa síng shálúnò we tvrà íe.
Vdè taqkèní shá nø shá:ngòe, ínìgø chvpdvp taq nø wá mvlúnò we la ínìnø rvwvl nøt chvk wa zø̀ng we mǿí lòng svng síngshá lún ràwe íe. Svmi wawe svng èzø̀:mò we kvt vkvt shìe wanø èshá bǿò mèpvng nø welòng svng mv̀ng mv̀ngí kagǿ ígø mvzø̀mvtnò. Vsv̀ng tiqgǿò lvpat taq tiqkvt kvt dèláshì bøwe rvtø̀ mèpvng nø vyá shìnø v́l sháìe. Welòng nø síngshá nøt ílonge.
Vsv̀ng lvpat wawe taq mèsháò nø èwàò wervt vlé shàì we mvdàm rvwvl nøt mv-vl we rvt vléshì we tvrà té luqe wae. Shèrwe nøt mvsø̀n laqyà nvng rvwvl nøt wawe nø tasvng tubùm kelong we ínø̀ pvlàcè ò jejú ìshøt taqkèní gø ya tvrà rì svng cvnshì lúnì we íe.
