Luka 21:1-4
“Ngàí kàdø̀ng tiq kà vla:tnìni, dvshà we memà yamèí nø shvngbe mvdv̀m té zv́ng bǿà”
Shóngshø̀mwe Pèmè, vnvm, vchvng maq Dèní tálúnì we mòngkà ciq taq Memà mè svng Kàngpè Yesuí shvgùn:ò we svng tashì lúnì we íe. Mvgàm rì taqkèní v̌lu luq luq záng:ò we svng shvgùnò we mǿí nø̀ Memà mè taqkèní V̌lu kàmø vní gø̀m zá:ngò we svng a:ngí shvgùnò we íe.
Memà mè taqkèní pø̀ gv̀msùng tiqhancè wa vlwe yv́ngkèní àngyv́ng vl dángte svng Noqngø̀m chø̀m taqø V̌lu zíshì bǿì we íe. Kàngpè Yesu nø vsv̀ng rì Gvray kaq kadángte shóngshì nø apnúngshì lúnò we, Gvray yv́ng svng kadv́ngte vlǿmshì we svng yv̀ngnø vløt we gø íe.
Kàgvp ànglí taqø gø Memà tiqmè nø Gvray yv́ng svng vlǿmshì we kámnøt zangwe dang yv́nglún shìe. Koqkv́m 17:7-16 taq Elia nø Zarephat mvrìng svng di nø̀ Memà tiqmè yv́ng vlwe zidòng mok tiqgø̀m svng røtvm we dang yv́nglún shìe. “Svmarémè nø tì lú nvng di ke, à:ngí ang svng vrá a:lò nø, “Zidòng tiq kwit gø èlv́ngangvtnà,” a:lòe.
We rvtø̀ taq Zarefat mvrìng taq dvkøqwàng vkǿnwe rvtø̀ ínø̀ vsv̀ng rì nvng nìnà rì luq luq shìwe rvtø̀ gø íe. Ínìgø Memàmè nvng àngcèpè mv̀ngnø Eliya nvng tiqdø we dvkøq wàng kèní lutshì lúnbǿà we íe. Pàwálv́m wani Memàmè àngyv́ng vlwe mvzáng shvngbe svng Gvray kaq kv́mnøt kèní Eliyá svng zíò wervt Yehówa í àngní mè svng àngcé àngyá dvtàng vrá shvmv́:nā ráà we íe. Gvray gvsv:ngò shvmv́n jejú kèní we dvkøqwàng kèní lutshì lún ráà wegø íe.
Kàgvp ànglí nvng kàgvp àngshv́r taq yv́nglúnì we Memàmè níò Gvray kaq kám vlǿmshì we tvrà rì svng yv̀:ng lú:ngì wekvt nøngmaqò kv́mnøt tvrà rì nø gvzà ni vcip:mì we svng yv́ngshì wegø íe. Memàmè ní nø Gvray kaq kám vlǿmshì we kámnøt kèní àngní taq vlwe dvrè rì shvngbe svng Gvray kaq zíshì we dang yv́ngshì we íe. Nøngmaq taq tiqkvt kvt Gvray svng V̄lu zíshàì we ku mǿí nø vsv̀ng mv́rdàng taq vnvp lv́m dvpvt wa Vlū vdán rì zishàì we gø vlwe íe.
Vdè taq vlwe yv́ngkèní Gvray kaq kámnøt kèní zí shá ràì we gø íe. Àng kaq svng vlǿm shàì we nøt kèní Gvray kaq zíshàì we vsv̀ng rì bǿnlún lv́m nøngmaq shvngbe dvzaq shìlv́m wàì.
