Shvngkà ètashìnøng we Shvngbeí Gvray mongzøl lòng vtoshì leqlúnøng Shvngbe svng Pamvra.
Dèni nø October shvlá lvban (4)ni svng gòng bø’shà. Desháng vrá tiqkvt Pvlàcè nònggùn kūnga lùshì lvm dvgø’shì lúnì lòng gø Gvray gvsangò Shvmán jèjú íe.
Dèni nònggùn lùshì lvm Gvray móngkà nø, Luka 11;47-54 vdòng taqkèní íē. Vpø’ íwe pèmè vnvmchvngmaq,Dvrá svrarì ngā:nò we móngkà mvshøl taqkèní íē. Mongkà taq;.. Namaq nø mèhøt lóngnønge. Kadø íe wani nvkop nvkàng maqí shvt yà:ngà we kàdvtutshúri dvgv̀m rì nø namaqí ni dècøpnønge, wā Dvrá Svrarì svng ngā:nòe.
Vpø’ íwe pèmè vnvmchvngmaq,
Shvla we shánønt Paqzi ínø vsvng kaq dø we vdòng yv’ngkèní shvlut lúnè. Wè mvdvmø, wè shánønt Paqzi í nø, angdè tiqgóng cúnshì lún nø Tiqdvng vsvng kaq cvnà lúnì, àngde tiqgóng lutshì lún lòng mvdvm, vsvng mvmè dvpvt gálòng wáshì lúnlvm vlē.
Parishi rì, Mongkà Dvrá Svra rì tiqmaq nø Yuda Vsvngrìo Kvmnønt tvrà dvrá Upvdi nvng Tong laqyà rì svng tøptøpwā shálúnòe. Angmaqí sháò shánønt Paqzi ínø vsvng kaq shvngøt dvtú lvm rvt le íe. Angmaq tiqgóng taqkèní cvndvgøm nø dvzaq dvkvngshìe wàwe nø mà-vl. Wervt Vkangpè Yesu ínø ” Namaq ínø Muqlang móngdànò shvmzoq puq èlvngnøng taqsórí angde ni megòngnøng, gòng lvm rvt dvgø’shì rì svng gø Namaqí nàgv’mnøngè, wā vl yangà. Àngmaqò tvrà nø kvlángpòng mvdvmø vyit pàdø íe, wàe. Kvláng vm mvyø’ nø dì ra we Nangwà svng jūòe. Zí mà mvyø’. Angmaq dvpvt gø kvláng nø Pà vjú gø mà-vl. Rvzvngcerìo tvrà nø, Vkangpè Yesu Kristu pàdø, angdèo lvpat taqkèní vsvng mvmè dvpvt vpnóngshìe, Kà í wā shvngøt dvtú we, dvkv’m we wa mø-í nø, bvnlì nvng vjang laqyà mvré zā mvkok dvdí shóngnønt taqkèní chutchvng we tvrà svng dvtánshì lòng íe.
Wervt Vpø’ íwe pèmè vnvmchvngmaq, Vkangpè Yesu Kristuò dvkv’m Kà rì svng vtoshì nø ká:mì lòng, cvndvgøm nø cúnshàì lòng , Tiqdvng vsvng kaq mvré zā shóngnønt dvtanì lòng nø, Gvray gvsangò Mvkok dvdí shóngnønt svng vpø’ shvringshì lòng íe. Wèwa mvtaq, Vsvng mvmè dvpvt Gvray gvsangò gálòng shvkse wáshì, dvtanì lòng gø íe. Gvray gvsangí zi we Shánønt Paqzi Nyan Bvnya í Døngman we tvrà svng vchvng nø, Gvray gvsang shvrúng we, dvkv’m Kà rì svng cvndvgømì taqsórí vsvng mvmè dvpvt Gvrayò gálòng shóngnønt shvkse wáshì laqlúni, wvng vrashì taqsórí nònggùn zí mvyø’è. shvngbe svng Pamvra.
