Kristu vdòng taq Vpø íwe pèmè vnvmchvngmaq, rvtø vrvm Nár vrvm Gvray gvsangí kùpgar we jèjú vdòng taq Pamvra ce cúnshì lúnì lòng gø Gvray gvsangí zì we lvksan Shvmán jèjú Gønpaq tiqlòng gø íe. Yà lvban nø àngwa Nár (28) lvban wà lvban svng gòng bø’shà, zàngshì bø’shà.
Ya lvban taq, dvdvm vjáng nø rø v-du we Gvray Móngkà jømciqri;–
(1) Esaya 25:6-10
(2) Philip 4:12-14,19-20
(3) Mati 22:1-14
Vpø’ íwe pèmè vnvmchvngmaq,
(Esaia 25:6-10) Gvray gvsangí nø, vsvng dvcìrì shvngbe dvpvt gvzà gv̄m we v́mpà v́mbóy, bìmtì anglí aqbóy, vtv̄ngshaq shvlā we shā kébóy, vtv̄ngshaq gv̄m we bìmtì aqbóy dvgø̀ daqòe. Wè bóy taqø shvlá vtv’ng v́mpà v́mbóy nvng bìmtì aqbóy àngmaq í vtoshì lún lúngòe, wā chutchvng angkang pèo Brimtì vmpa vmbóy svng góng lúnlvm nvmlat yv’ngkèní dvkv’mè. Wè dø tiqdvchá..
( Mati 22:1-14 ) Vkangpè Yesu ínø, Muqlang móngdàn svng zvmi shvzøng v́mpà v́mbóy Kashvbóng mvshøl taqkèní shvngøt dvtúè.
(Hpilipi 4:12-14, 19-20) Dvzvr Polo Mongkà taq nø, Ngà svng shaq nònggùn dèkv́ng pè Ang taq kèní ngàí pà gø wá dv́ngòe, wā Gvrayò nònggùn kūnga shaq taqkèní Shvkse wáshì nø shø’nè. Wè dø tiqdvchá dèni Na Ngà Nøngmaq shvngbe í gø Gvray gvsang yv’ngkèní vtoshì lúnì we Shvmán Jèjú ìshøt rì svng dvdvm vjáng taqsórí jèjú vwángshì nø Gvray dvgùng shvring lúnlvm shvkse wáshì lúnlvm ègō íē, shèdø’mìe.
Zvmì shvzø̄ng bóy kàshvbóng
Vpø íwe pèmè vnvmchvngmaq Zvmi shvzøngkung wáshì dvgvp lúnò gø’ ínø lúnò dø, vdá gø’ ínø vdá dø dvté nø wàò lòng svng yv’nglúnshìe. Dari dvgvp Yuda vsvngrì nø àngmaq wáshì we Dvla tiqpvn vlē. Zvmi shvzøngkung svng dì ra dvgvp gwashìlvm góngwá belaq ngáò nø bóy kaq dìlvm, goò tvrà vl yangì. Vrá nø, Mongkà kèní Koqkvmpè nø Pø zaqshøp dvt dvt mø-í. Vsvng pvn dvci, vrá shamùng, shanaq, vdá mv-gam, dvrvt wàwe mà-rvwèng shvngbe svng gō nø tiqdø vm-aq dvzvrè. Íwe àng lún mvyø we tiqpvn vlē. Wèlong nø, Àngí zi we zvmi shvzøngkung svng gònglvm góngwabelaq gwá dvzvrè lòng íe.
Zvmi shvzøngkung kaq gòng we góngwabelaqò àng lvjøm svng (Dvtan 19:8)yv’ng yv’nglún shìe. Shø’n mvyø we taq, kwín we góngwabelaq nø Dìngman Shànshér Vsvngrìò Dvla rì íe, walòng svng yv’nglún shìe. Dvtut 9 ciq taq nø vyvngceò shvzøngkung vmpa vmbóy kaq lúmlvm rvt gō vhø’mō rì nø ìshøt igvn vlē walòng svng yv’nglún shìe. Wervt nøngmaq gø, Shànshér Vsvngrìò Dìngmanè, wàwe shvzøngkung bóy góngwá belaq svng gwáshì nø vyvngceò shvzøngkung bóy taq Dvciq lvpat mongzøl lòng, Shvmán jèjú vtoshì lúnlvm dvzaqshì laqlúnì, wvng dvshat nø nònggùn zí mvyøngè.
Vrá nø, Gvray gvsang ínø vlún vkvng rì svng zi nø Angò vmjàmp kaq gō we ínigø, Nøngmaq nø lvpatnò mvnggá rì màdá, Dìngman tvrà màláshaq dvtiqshàìe. Vkvtdø dvtiqshàì lòng mvdøng angké nø, Gvrayí go lòng svng kvmnønt Vna í mvtáì rvt, tiqmvlv’nì rvt, mà ì rvt íe.
Nøngmaq nø, vsvng lvpatnò mvhøtlvm, yvklvm, vlishì we døngja rì í shvnip shvnar vhø’mì nø Gvrayí nøngmaq svng gō we, Pvlàcè kvmnønt nònggùn kūnga lún dvzvr we vmpa vmbóy, Vkangpè Yesuò Kàgvp Missa nóng we Noqngøm rvtø rì svng mà pø’ì, mà shvringì. Vkvtdø íwe àng dvja, laqyà rì taqkèní pv’n vshat língshì lúnlvm,Shvmán Jèjú ìshøt rì vtoshì lúnlvm dvpvt Kvmnøntní Gvray kaq røtnímshì laqlúnì wvng dvshat nø nònggùn zí mvyø’nge. Shvngbeí Vkangpè Zvmì shvzø̄ng bóy kàshvbóng mvshølò Gvray mongzøl lòng vtoshì laqlúnì Shvngbe svng oqā.
