Mati 18:1-5,10.
Kristu vdòng taq Vpø’ íwe pèmè vnvmchvngmaq, Dèni nø October shvlá (2)ni Nár (5)ni svng gòng bø’shà.
Dèni nø, Roqgār we Muqlang dvzvr rìo Bóy angni gø íe. Deni Dvdvm vjáng nø nònggùn lùshì lvm Gvray mongkà nø Mati 18:1-5,10 vdòng taqkèní íē.
Cipshìlv́m shvngøt we, Mongkà vzàng røshì lvm wàì.
“Muqlàng móngdàn vdòng taq té rīng we nø kagǿ íe ma?” wa rø:tnòe. a 2 Yesuí cv̀mrécè tiq gǿ goa:tnà nø angmaq dvhø̀ø shvri:pmò sórí, 3 a:lò we nø, “Ngàí namaq svng v̄la:tnìni, namaq nàwv́ngshì ránøng nø, cv̀mrécè døni mèí lóngnøng kvt kèní nø, muqlàng móngdàn svng nø kadø ínìgø góng mèlúnnøng. b 4 Kagǿ ínìgø cv̀mré yagǿ dø ang vdè cipshì gǿ nø muqlàng móngdàn taq té ring gǿ íe, a:lòe.
Vpø’ íwe pèmè vnvmchvngmaq, Cvmré tiqgø’ nø angpè angmèmaqò Putbøm yv’ng shvngøt dvtú we vdòng vtoshì nø shvláwace Kà tā nø tē lung nìnø, vsvng mvngpòng dvpvt ring we vpø’ vtv’ng gønpaq tiqlòng íe.(Kà shvbóng) Cvm dvgvp shøngtøngce tiqlòng shvláwace rvmøl nø mèdú:ngào ni, te lúng dvgvp mvdúng dvngwāce te lvm vlē. Pàwàlvm wàni Cvm dvgvp Dvla hang vdòng taq gvlshì rvt íē. Gvray gvsangí nø rvtø vrvm nøngmaq svng Pvlàcè Hang dvla vdòng taq shvngøt dvtú nø dvkv’mè. Shvngøt dvtú rà dvgvp Cvmréce tiqgø’ dø Nønt mvsøn vjang laqyarì wáshì nø vtoshì lúnlvm gvzà vchvkngè.
Vpø’ íwe vnvmchvngmaq, Cvmréce tiqgø’ nø angpè angmèmaq svng gvzà vlømshì nø Kv’mè. Mvsháò lòng svng Cìpshì Nøntní røtnímshì nø cvnshìe. Ma-māshì, mà ya, Sher we Nønt vlē. Nøngmaqò lvpat taqgø Cvmréce dø Gvray gvsang kaq vlømshì nø Kv’m lvm, Cìpshì Nøntní vpnóng tvleshì lúnlvm gvzà vchvkngè. Vsvngí yvngò dø wámèlúnò nigø Gvray vlē, walòng svng ká:mì nø angdèo lvpat svng shvlá vtv’ng vpnóng tvleshì taqsórí dvcøp vdv’ngshì gø wáshì laqlúni. Wè mvdvmø Gvray ínø nøngmaq svng Angò Døngman we tvrà taqø dì dvzvr nø, Angò Dvrá Mongkà rì taqkèní cvndvgøm lvm, kūnga lùshì lvm, v-li we shvra taqø nítvp dø tùbùm dvbvnglvm rvt Vpè Gvray ínø nøngmaq hø’ v-rvm kaq Muqlang dvzvr tiqgø’, tiqgø’ vzíshaq íe. Wervt Nøngmaq gø’ vrvm nø Muqlang dvzvr rì nvng tiqdø v-li lòng svng vpø’ shàì. Angmaqò shóngnønt Kømzøp dvnzøng lòng svng vlømshì lvm nvng àngmaqò roqgār vsùng lòng svng gø vlømshì nø Ká:m ra íe. Vrá nø nøngmaq taqkèní shóngnønt dvtán lúnlvm, shvrvn mà-jø’ lvm, màléshìlvm gø gvzà vchvkngè.
Vpø’ íwe pèmè vnvmchvngmaq Dènio Gvray gvsang Mongkà taq Vkangpè Yesuí Kvmnønt tvrà taq Cvmré ce tiqgø’ dø shvngøt dètú íe. Wè Hang dvla vdòng taq dvcøp vdv’ngshì nø cúnshì lúnlvm rvt Vkangpè dvkv’m Kà vdòng taqø rvtø vrvm cúnshì nø cvndvgøm laqlúnì, wvng dvshat nø nònggùn zí mvyøngè. Shvngbe mvdvm Roqgar we Muqlang Dvzvrìo Gvray mongzøl lòng vtoshì laqlúnì shvngbe svng oqā.
