Àngde Wurgang paqshi taqsórí cvnlvm
(22nd Sunday of ordinary time year A)
Kristu vdòng taq Vpø’ íwe pèmè vnvmchvng, shvngømré rvzvngcerì shvngbe mvdvm taqø Gvray yv’ngkèní shiqshan mongzøl lòng laqtuqdaq, shvngbe svng Pamvra.
Ya lvban nø Angwa Nár (22) lvban wà lvban svng gòng bø’shà we íe.
Dèni Rø v-du we Móngkàciq rì;-
(1) Yeremia 20:7-9
(2) Roma 12:1-2
(3) Mati 16:21-27
Mongkà tiqciq;-Yeremia Mongkà taq, Yeremia vbø̄nshì nø shøn we nø shø’nè. Ngà nø, “Akvt kèní Ang dang ngàí mvshø̀nlvm íe. Ang bø̀ng kèní gø kà màdvtutlv́m íe,” la wvngnø̀ng gø, Ang Mòngkà nø ngà nøt nvng ngà shārø̄rì taq svmi dø vcōr rvtnø, vgv́rshì mvjòr høq màtø̄nkéngò, wā Gvray móngdàn dvpvt shvkse wáshì tvrà tálúnìe. Wè dø tiqdvchá dèni Na Ngà Nøngmaq gø’ vrvm kaq svng gø Døngman we Gvray gvsang móngdàn tvrà dvpvt shvkse wáshì lvm Gvray nø shvrúngè. Íwe tiqmaq nø dvzømshú bvnlì rì taq Ngà wàwe Nønt laqyà taqkèní øp shì nø vsvng kaq Nønt vtøp dvzvr we, Nønt vgvng dvzvr we, Shiwvt banchvk rì dvbung dvzvr we mvmè vl lòng svng yv’nglúnshìe. Wervt Gvray shvrúng we Dìngman lòng taq Shvkse wáshì lúnlvm gvzà vchvkngè.
Dvzvr Polo í Roma Shvngømré vsvngrì kaq svng nònggùn zì we móngkà taqgø yadø wàe, Namaqò shagóng svng Cúnshì we, Shànshér we shvrúng nóngpà pō nø Gvray gvsang kaq ènóngnøng, wā Sher we Nønt mvsøn tiqgóng shvngbe taqkèní Gvray kaq vp tvleshì nø Pvlàcè Kvmnønt nònggùn kūnga lùshì lvm dèkv’mìe.
Mahte 16:21-27 taq nø, Yesuí nø angí vzàng lvp taq vhø’m lvm, dvshà mvhøt yvklvm rì dang, Dvzvrì svng shø’n pvngòe. Wekvt Piter í nø, ang kaq mvlvng lvm nvng dvshà mvhøtlvm lòng yv’ngkèní vcar dvzvr mvyø’è, Wekvt Yesu ínø Àng svng ngvtnò tvrà yv’nglúnshìe.
Vpø’ íwe pèmè vnvmchvngmaq, Vkangpè Yesuò Mongkà taq
Vkangpè Yesu Kristu í nø, Angò Sasvna bvnlì døngja lvngdøm wál, dvzvrì svng shá dvzvr shvdømò nø shø’nòe. Wèlong taq, angí nø dvshà mvhøtlvm yvklvm rì mvmè vhø’m nø, shvt we í Vshøm ni wàni taq shì yv’ngkèní vrá Zun lvm dang dvtánòe. Vrá nø, Yalòng Mongkà svng vtoshì lvm gvzà rvzaq we í rvt, Piter í nø,” Vkangpè a, wèlong Na taqø kadvgvp gø laq mvbø’n daqè” wā.. a:lòe. Piter ínø Vkangpè Yesu shøn Kà svng vgám mvyø’è. Nøngmaq Kagø’ í sha nigø, Angdèo shølshú vgo pè dvshà mvhøtlvm, yvklvm vhø’mò lòng svng mvshóngshàì. Bvnlì døngja shvla dø jór lúnlvm lòng svng mv’ng vlømshàìe.
” Yesu ínø Piter svng ngvtnòe “
Lóngdøng wàwe bøng kèní shvgùn shvring bø’à we Piter nø yaboq taq nø, Muqlang taqlvp vl Vpè Gvray í dvtàn we màbá rvt, vsvng í dvdvmì dø wā dvdvmò nø, Yesu svng vgám mvyø’è. Wervt, Yesu ínø Piter svng, Gvray gvsang nvng sing we tvrà mø-í, Na ínø vsvng nvng sing we tvrà svng wā dèdvmòe, Ngà mèpvng ècārshì, wā ngvtnòe..” Satan “e Ngà mèpvng ècārshì natvng, wàhøqshaq ngvtnò tvrà svng yv’nglúnshìe. Yesu dvtut shøn we taq, Ngà dvpvt Nønt vtøp ra na èíe, a:lòe. Vkangpè Yesu àng dì lvm tvrà nvng dvnùng nø wàlvm bvnlì nø, chutchvng we Wurgang tvrà íe. Yadang svng shvlá wace cíngràl lúnlvm gvzà rvzaqè. Vsvngrì shóngwámshàì lòng nø, Jór lòng íe. Vkangpè Yesuò Mongkà taq, dvshà mvhøtlvm lòng nvng Wurgang paqshi lòng nø lvngdøm mø-í, Dvgùng gùngshvng lvm lòng, shini vlē walòng íe.
Àngde Wurgang paqshi taqsórí cvnlvm
Yesu ínø, àngo lvmboqrì svng dvkv’m nø shø’nò we taq, Ngà mèpvng cv’n mvyø’ we kagø’ íni gø, angdè tiqgóng cipshì lún ra we ínø, angdèo Wurgang svng paqshi taqsórí laqcvnlù:ng, laq dì ra wàe. Vsvng nø ídv’ngte shvngbe shanglut vlún vkvng, vmyat lúnò sórí, àngde gønshaq shø’mvm nìnø, àng dvpvt pà vjú lú:nì mà? Dvzvr, dvzømshú wáshì lòng nø Vkangpè Yesuò Wurgang tvrà taq tiqdø dì i lòng íwe svng shvngøt dètú íe. Pèmè vnvmchvngmaq,
Kadvtutshú Yeremia
Àng nø Gvray gvsang móngkà, Dvrá rvt, Àng Nønt vdòng taq svmi dø vcōr nø, ngà shārø̄rì taqgø svmi dø vcōr we i rvt, vgv́rshì mvjòr høq màtø̄nkéngò, wā shø’n yangì. Wervt Gvray gvsangò Mongkà taq dvtut dvshvng lvm, cúnshì lvm, rvdoq rv-wvnshì ra bø’ì. Kadvtutshú pèo mvr taq yv’nglúnshì rì nø, nònggùn lùshì lvm pàgø mà-vl. Íni gø Àng vlømshì lòng nø, Gvray gvsangò Mongkà ínø mongzøl lòng svng shvbø’n lúnè, walòng íe. Íni gø, wè rvtø taqø vrøl vcvt we tvrà rì, banchvk rì nvng dvnzøng we rvtø rì íe. Angò Mongkà svng vsvng mvmè í vgámò lòng svng yv’nglúnòe. Wervt, yalòng Kadvtutshú bvnlì svng mv-wàlvm íe, wā angboq boq dvkv’mshì, dvdvmò nø yílshì bø’ì. Íni gø, Angò Nønt mvsøn vdòng, sharø rì vdòng taq vcór we Svmi dø v-gvlshì màshvla, vl mvnà:mp. Gvray gvsangò Mongkà svng mà dvshvng nø ang taq vl mvnāmp, v-gvlshì màshvla høq íe. Vkvtdø í rvt, àng nø Kadvtutshú bvnlì døngja svng àng lvpat Benihøqshaq vrá dvzaq dvkvngshì nø dvzømshì yangì, tvrà vkvtdø yv’nglúnìe.
Shànshér we nvng Cúnshì we Nóngpà
Dvzvr Polo í Roma Shvngømré vsvngrì kaq nònggùn zí Kà shø’n we taq yadø wàe.
Namaqò shagóng svng Sher dø Cúnshì we Shvtnóngpà èwanøng nø Gvray kaq sherúngnøng, wàe. Rvgaqtømò laqyà vdòng taqø namaq mèna lengnøngnì. Gvray gvsang nø shvlāè, mvkok dvdí shóngwámshì lòng svng shvgaq leqlúnøng, Nønt mvsøn àngshvr vtoshì lúnlvm dvpvt nø vjang laqyà kūnga vzàm rì svng língshì ràe. Vpø’ íwe pèmè vnvmchvngmaq, Yalòng Mongkà ciqrì taqkèní dvzømshú dvzvr wáshì we taq kadv’ngte vpnóngshì ràe, àngdenì angdèo Wurgang paqshi ra lòng svng mv-kv’mkaq dvkv’m nø nònggùn èzíìe. Shèdø’mì we móngkà íe.
“Ngà mèpvng cv́n mvyǿ we kagǿ gø, vdè svng ngálshi nø, vdè wurgang baqshi sórí Ngà mèpvng laq cv̀n ra.” (Mt 16:24).
taqgø Vkangpè Yesu Kristu í mvdøng mvdaq dèkv’mì dø tiqdvchá Nønt mvsøn tiqgóng àngshvr àngshvr wáshì nø Pvlàcè Kvmnønt nònggùn lùshàì wvng dvshat nø nònggùn zí mvyøngè.
